1 Samuel 21 - Bible in Tzotzil de Chenalhó with Deuterocanon

Ijatov o loq'uel ta stojol Saúl li Davide

¹ Li Davide tuc' ibat ta Nod yo' bu oy li pale Ahimeleque. Li Ahimeleque toj ch'ayel ic'ot yo'nton, bat snup ta be, jech laj yalbe: —¿C'u yu'un ti atuc no'ox chaxanove? —xut.

² Itac'ov li Davide: —Li ajvalile laj yac'bun jventain jun a'yej. Laj yalbun ti mu xu' boch'o cha'ay c'u yu'un ti la stacun tale xchi'uc li c'usitic mantalil quich'oj tale. Ja' yu'un li viniquetic jventainoje calojbe comel bu xu' ta jta jbacutic.

³ ¿Me mu'yuc c'usi oy ta ac'ob chavac'bun jutuc? Ac'bun vo'obuc pan, o ja' li c'usi xatabun tale —xut.

⁴ Itac'ov li palee: —Li pan jventainoje ma'uc sventa boch'ouc no'ox xu' tsve', yu'un ma'uc c'usiuc no'ox panil; ja' pan ti ac'bil o ta stojol Diose. Pero xu' chacac'bot ti me mu'yuc c'usi spasojic xchi'uc antsetic li achi'iltaque —xut.

⁵ Itac'ov li Davide: —Li vu'uncutique volje chabje xa mu'yuc bu jnopoj jbacutic xchi'uc antsetic, yu'un chiloq'uilancutic ono'ox xchi'uc li jvinictaque. Ac'o me xanubal no'ox ta jpascutic, pero li jchi'iltaque mu'yuc bu snopoj sbaic xchi'uc antsetic. Ja' jechic o c'alal liloc'cutic tal, ja' yu'un lec oyic o tana —xut.

⁶ Ja' yu'un li palee ja' laj yac'be li pan ac'bil o ta stojol Muc'ul Diose yu'un mu'yuc yan pan xu' chac'be. Jech la sloq'uesic li pan te ta stojol Muc'ul Diose, yu'un jech xu' chaq'uic yan c'ac'al pan c'alal chich' loq'uesel ti bu te ono'ox oye.

⁷ C'alal jech ic'ot ta pasele, ja'o te oy ta ch'ulna jun yaj'abtel li Saule, Doeg sbi; ja' edom vinic. Ja' banquilal yu'un li jchabichijetic yu'un Saule.

⁸ Li Davide jech laj yalbe li Ahimeleque: —¿Me oy avich'oj junuc alanza, o me avespada? Yu'un toj anil no'ox laj yal mantal li ajvalile, jech muc xa xquich' tal quespada, o me yantic cabtejeb —xut.

⁹ Itac'ov li palee: —Oy cu'un. Ja' li' oy yespada li Goliat filista vinic ti vo'ot ono'ox laj atsal te ta stenlejaltic Elae. Li' nac'al ta spat mocan c'u'il, pixil lec ta poc'. Me chac'an chavich' batele, xu' chavich', yu'un mu'yuc yan abtejebal li' oye —xut. Itac'ov li Davide: —Ac'bun, yu'un mu'yuc yan jech chac c'u cha'al le'e —xut.

¹⁰ Ta jun no'ox sc'ac'alil ijatov o batel ta stojol Saúl li Davide; te ic'ot ta stojol Aquis, ajvalil ta lum Gat.

¹¹ Li j'abteletic yu'un Aquise jech laj yalic: —¿Li'i me mu ja'uc li David xchi'il ta abtel Saúl ajvalil yu'un banamil li'i? ¿Me mu ja'uc li boch'o chq'uejintaat yu'un antsetic c'alal ja'o ch-ac'otajique: ‘Jmil (1,000) la smil li Saule; ja' lajunmil (10,000) la smil li Davide’, ti xiique? —xiic.

¹² Li Davide la stic' ta yo'nton li a'yej le'e, jech ixi' yu'un li ajvalil Aquis te ta lum Gate.

¹³ Jech te lic sjel c'u x'elan stalel. La spas sba ta chuvaj yilel, jech oy c'usitic lic sts'iba ta ti'na, xchi'uc laj yac' beinuc yalel stub ta yisim.

¹⁴ Ja' yu'un li Aquise jech laj yalbe li j'abteletic yu'une: —Me chavilic ti yich'oj chuvaj li vinic li'i, ¿c'u yu'un laj aviq'uic tal li'i?

¹⁵ ¿Me yu'un oy to sc'an chuvajetic cu'un chavilic ti laj avic'bicun tal ta jna li vinic li'i, ti tal yac' xchuvajolil li' ta jnae? —xut.