1 Samuel 20 - Bible in Tzotzil de Chenalhó with Deuterocanon

Li Jonatane la xc'uxubin li Davide

¹ Li Davide ijatov loq'uel noxtoc te ta Naiot ta Ramá; te ibat yo' bu oy li Jonatane, jech c'ot yalbe: —¿C'usi chopol la jpas? ¿C'usi jmul ta stojol li atot ti chisa'un sventa chismilune? —xut.

² Itac'ov li Jonatane: —Mu xc'ot ta pasel yu'un. Mu xacham. Li jtotique mu'yuc baq'uin mu xiyalbun li c'usi tspase, ac'o me tsots, o me mu tsotsuc sc'oplal, persa ono'ox chiyalbun. ¿C'u yu'un mu'yuc chiyalbun li c'usi tsnope? Mu spas jech —xut.

³ Pero li Davide jech to laj yal: —Li jtotique sna' ti lec chquil jbatique, ja' yu'un mu sc'an ti ac'o ava'ye yu'un jech mu xavat avo'nton. Pero chacalbot ta stojol Muc'ul Dios xchi'uc ta atojol ti ta xa xichame —xi.

⁴ Li Jonatane jech la sjac': —¿C'usi chac'an ta jpas ta aventa cha'e? —xut.

⁵ Itac'ov li Davide: —Q'uelavil, oc'ome ja' xa yorail sq'uinal ch-uninaj li ue, jech persa chichoti, ta jchi'in ta ve'el li ajvalile. Pero li vo'ote coltaun batel, yu'un chbat jnac' jba ta te'tic. Ta bat to c'ac'al cha'ej chiloc' tal.

⁶ Me la sjac'bot bu oyun li jtotique, jech xavalbe: ‘Ibat ta slumal ta Belén; ta anil no'ox la sc'an sc'ac'al yu'un la ibat xchi'in xchi'iltac te ta slumal ta Belén, yu'un la ja' yorail chac'beic smoton Dios ta sventa jujun jabil’, uto.

⁷ Me lec no'ox laj ya'ye, jech jun co'nton. Pero me ch-iline, ja' svinajeb ti oy ono'ox c'usi chopol tsc'an chispasbune.

⁸ Ja' yu'un avocoluc pasbun jech, yu'un calojtic ta jamal ta stojol Muc'ul Dios ti lec chquil jbatic oe. Pero me ta melel oy jmule, ja' lec milun atuc li' no'oxe; mu persauc chavic'un batel ta stojol li jtotique —xut.

⁹ Itac'ov li Jonatane: —Mu xanop jech. Me laj ca'ay ti oy c'usi tsc'an chaspasbot li jtotique, ta xtal calbot ava'ay ta ora —xut.

¹⁰ Li Davide jech laj yal: —¿Boch'o chtal yalbun c'alal me chopol itac'ov li jtotique? —xut.

¹¹ Itac'ov li Jonatane: —Loc'cutic batel; batic ta paxal —xut.

¹² C'alal iloq'uic batele, li Jonatane jech laj yalbe li Davide: —Chacalbot ta jamal ta stojol Muc'ul Dios, ja' li Dios cu'untic vu'utic li israelutique. Oc'om, o me cha'ej ja' jech ora chac li'i, ta xcac' persa ta jac'be c'u x'elan yo'nton li jtotique. Me lec no'ox yo'nton ta atojole, ta jtacbot ono'ox tal mantal.

¹³ Pero me oy c'usi chopol tsc'an chaspasbote, ta xtal calbot yu'un jech xu' jun avo'nton chanac' aba. Me muc xtal calbote, tsots ac'o yac'bun jtoj li Muc'ul Diose. Muc'ul Dios chascoltaot jech chac c'u cha'al coltabil to'ox yu'un Dios li jtotique.

¹⁴ C'alal cuxulun toe, ch'uno ti toj lec co'nton ta atojol jech chac c'u cha'al toj lec yo'nton ta atojol li Muc'ul Diose. Pero c'alal me lichame,

^15-16 mu me xach'ay slequil avo'nton ta stojol ec li calab jnich'nabe. Ac'o chapanatuc yu'un Muc'ul Dios scotol li avajcontrae, xchi'uc ac'o stsalbot scotol —xut. Ja' jech la spasic o lec ta co'ol yo'ntonic li Jonatán xchi'uc Davide.

¹⁷ Yu'un li Jonatane toj lec sc'anoj li David jech chac c'u cha'al c'ux ta yo'nton sbec'tal stuque, ja' yu'un la xcha'pas lec ta co'ol yo'nton xchi'uc.

¹⁸ Ts'acal jech laj yalbe: —Oc'ome ja' sq'uinal ch-uninaj u. C'alal chilic xocol achotlebe, sna'ic ti mu'yuc te oyote.

¹⁹ Te oyan oxibuc c'ac'al. Ts'acal yalan batel ti bu laj ono'ox anac' aba ta jun veltae. Te xavac' aba ta sts'el ti bu busul ep tone.

²⁰ Vu'un ta xcac' batel oxmojuc flecha te ta xocon li tone, jech chac c'u cha'al ja' to ta jchan jc'ob ta jpas yilel.

²¹ Ts'acal jech ta xcalbe li jmozoe: ‘Bat t'uno tal li flechaetique’, chcut. Me laj ava'ay jech laj calbee: ‘Li' xa icom avu'une, tamo tal’, me xcute, li vo'ote junuc avo'nton loc'an tal, yu'un mu'yuc c'usi chc'ot ta pasel ta atojol obi. Ta xcal ta jamal ta stojol Muc'ul Dios ti jech ta jpase.

²² Pero me jech chcalbee: ‘Li flechaetique taj to ic'ot’, me xcute, jatovan me batel yu'un jech la sc'an Muc'ul Dios obi.

²³ Li c'usi la jchapantic li'i ja' testigo chcom cu'untic li Muc'ul Diose —xut.

²⁴ Li Davide bat snac' sba ta te'tic. C'alal ista yorail sq'uinal li unin ue, te ital chotluc li ajvalile yu'un chve'.

²⁵ Ja' te ichoti ta xchotleb ono'ox ta nopol c'alna. Li Jonatane te ichoti ta stuq'uil li stote. Li Abnere te ichoti ta sc'al li Saule. Li xchotleb Davide xocol icom.

²⁶ Li Saule mu'yuc to c'usi laj yal, yu'un la snop ti me oy c'usi ic'ot ta pasel yu'un ti mu'yuc to yac'oj sba ta lecubtasele.

²⁷ Pero ta yoc'omal c'alal ja' xa xchibal c'ac'al li q'uine, laj yil ti xocol xchotleb yan velta li Davide. Ja' yu'un li Saule jech la sjac'be li xnich'on Jonatane: —¿C'u yu'un muc x'ay ta ve'el volje li xnich'on Isaie, xchi'uc mu'yuc li' oy ta ora noxtoc? —xut.

²⁸ Itac'ov li Jonatane: —Yu'un ta anil no'ox la sc'anbun batel sc'ac'al, yu'un la ibat ta Belén.

²⁹ Jech laj yalbun: ‘Avocoluc coltaun batel, yu'un li cuts' calaltaque ja' yorail tsmilbeic smoton Dios te ta jlumalcutic. Yu'un la stacun ta iq'uel li jbanquile. Me oy slequil avo'nton ta jtojole, coltaun batel yu'un chbat jvu'lan li cuts' calaltaque’, xiyutun. Ja' yu'un ti mu'yuc li' chaxchi'inot ta ve'ele, ajvalil —xut li stote.

³⁰ Li Saule tsots lic yilinta li xnich'one, jech laj yalbe: —¡Vo'ot yolot jun chopol ants, jbajmantal ants! ¿Me yu'un mu jna'ojuc ti toj lec xavil abaic achi'uc li xnich'on Isaie? ¡Q'uexovanic achi'uc li ame'e!

³¹ Ti c'u yepal c'ac'al cuxul li' ta banamil li Davide, chacalbot ti mu'yuc bu jun avo'nton cuxulot, xchi'uc mu'yuc chapas mantal. ¡Avocoluc taco ta t'unel li Davide. Ic'bun tal yu'un persa ac'o chamuc! —xut.

³² Itac'ov li Jonatane: —¿C'u yu'un ti persa ta xchame? ¿C'usi chopol la spas? —xut.

³³ Li Saule la stsac slanza yu'un xa'ox ta xac'be li Jonatane. Li Jonatane te lic sna' o ti ta melel oy ta yo'nton tsc'an tsmil li Davide.

³⁴ Li Jonatane ta sc'ac'al yo'nton itots batel ta mexa, jech muc xa xve' o ta xchibal c'ac'al li q'uine, yu'un toj abul sba laj ya'ay li Davide yu'un solel bajbil xa o yu'un li ajvalile.

³⁵ Li Jonatane ta yoc'omal iloc' batel ta paxal jech ora jech chac c'u cha'al xchapanojic xchi'uc li Davide. La xchi'in batel jun smozo ti querem toe.

³⁶ Jech laj yalbe li quereme: —C'alal ta jt'iles batel li flechaetique, batan ta anil bat tamano tal —xut. Li quereme ibat ta anil ti c'alal ja' to no'ox tst'iles batel jmoj flecha li Jonatane. Pero li Jonatane nom to laj yac' c'otuc yo' bu x'ech' li quereme.

³⁷ C'alal te xa oy yo' bu metsajtic ic'ot flechae, li Jonatane tsots laj yapta li quereme, jech laj yalbe: —Li flechae taj to ic'ot —xut.

³⁸ Li Jonatane tsots laj yapta yan velta li smozoe: —Batan ta anil; mu me xapaj —xut. Li quereme la stam tal li flechae; laj yac'be li yajvale.

³⁹ Pero me jutuc mu sna'be smelol; ja' no'ox David xchi'uc Jonatán sna'ic.

⁴⁰ Li Jonatane laj yac'be ta sc'ob smozo li yabtejebtaque; laj yalbe ti ac'o yich' batel ta lume.

⁴¹ C'alal ibat xa'ox li quereme, li Davide iloc' tal te ta jot xocon yo' bu busul li tone. Te vul squejan sba ta stojol li Jonatane; oxib velta la squejan sba, la spatan sba ta banamil. Te la sts'uts' sbaic; laj yoc'ta sbaic. Li Davide toj ep i'oc'.

⁴² Li Jonatane jech laj yalbe li Davide: —Junuc avo'nton batan. Yu'un jchibaltic jamal laj caltic ta stojol Muc'ul Dios ti jc'anoj jbatic oe, xchi'uc la jc'anbetic vocol ti j'ech'el ac'o xchi'inutic o jchibaltique, xchi'uc ac'o xchi'inbutic o c'alal ta calab jnich'nabtic jujunutique —xut. Li Davide ibat; jech ec li Jonatane isut batel ta lum.