1 Samuel 19 - Bible in Tzotzil de Chenalhó with Deuterocanon

Li Saule tsc'an tsmil li Davide

¹ Li Saule lic spas ta mantal li xnich'one, ja' li Jonatane xchi'uc scotol li j'abteletic yu'une, yu'un ac'o smilic li Davide. Pero li Jonatane toj lec sc'anoj li Davide.

² Jech bat yalbe ya'ay li Davide: —Li jtotique tsc'an chasmilot. Ja' lec bijan me c'alal to oc'om. Bat nac'o aba.

³ Vu'un chbat jchi'in li jtotique xchi'uc li svinictaque; te chijelovcutic batel ti bu oyote. Te ta xlic calbe lec ac'oplal li jtotique. Xca'itic c'usi chal; te chbat calbot ava'ay ec —xut.

⁴ Li Jonatane te lic lo'ilajicuc xchi'uc stot ta sventa li Davide, jech laj yalbe: —Tati, vo'ot li ajvalilote, mu me xasa' amul ta stojol li avaj'abtel Davide yu'un mu'yuc c'usi chopol spasoj ta atojol. Scotol li yabtele toj lec; ja' sventa la scoltaot.

⁵ Mu'yuc tsots sc'oplal laj ya'ay li sbec'tale jech bat smil li filista vinique, pero icoltaat yu'un li Muc'ul Diose jech icolic o scotol li jchi'iltactic ta israelale. Laj avil ta asat atuc; toj xcuxet no'ox avo'nton ti c'alal jech ic'ot ta pasele. Ja' yu'un mu smeloluc ti chamil, ti chamalbe xch'ich'al li boch'o mu'yuc smule —xut.

⁶ C'alal laj ya'ay c'u x'elan srazón xnich'on li Saule, jech laj yal: —Ta xcal ta jamal ta stojol Muc'ul Dios ti mu'yuc ta xcac' chamuc li Davide —xi.

⁷ Li Jonatane laj yic' li Davide; laj yalbe scotol c'u x'elan li a'yeje. Ja' stuc Jonatán laj yic' batel ta stojol stot li Davide, jech te icom ta abtel yan velta jech chac c'u cha'al ono'oxe.

⁸ Ts'acal ilic yan velta pleito yu'unic noxtoc xchi'uc li filistaetique. Li Davide iloc' batel, bat spasic pleito xchi'uc, pero la stsal comel scotol. Li yantique ijatovic batel.

⁹ Li Saule ital ventainatuc yan velta yu'un pucuj ti tacbil tal yu'un Muc'ul Diose. C'alal ja'o te chotol ta xchotleb chtijbat arpa yu'un li Davide, te stsacoj slanza ta sc'ob.

¹⁰ Te la spajbe batel lanza yan velta li Davide. La snop ti lec tspajbe batel te ta c'alnae. Pero li Davide la stselbun sba yan velta; ja' te pajal ic'ot ta c'alna li lanzae. Ja' yu'un li Davide te no'ox ta yac'ubalil ijatov o loq'uel.

¹¹ Li Saule ta ora laj yalbe mantal svinictac ti ac'o bat sq'uelic ta sna li Davide, te ac'o xchabiic o; ta yoc'omal ac'o smilic. Pero li yajnil Davide, ja' li Micale, bat yalbe ya'ay li smalale: —Me mu xaq'uel aba ta ac'ubaltic tanae, oc'ome ta me xavich' milel —xut.

¹² Li Micale ta ora la xchech yalel ta ventana li smalale, jech ivu' yu'un ijatov batel li Davide.

¹³ Li Micale la stsac jun muc'ta loc'om la xmochan ta vaybal, xchi'uc laj yac'be xonjolin jlic jalbil tsotsil tentsun. Ts'acal la smac ta jlic poc'.

¹⁴ C'alal la stac batel svinictac Saúl yu'un ac'o bat stsaquic tal li Davide, li Micale jech laj yal: “Li jmalale ip cha'ay”, xi.

¹⁵ Pero li Saule la stac batel yan velta li svinictaque yu'un ac'o bat stsaquic tal ta persa li Davide. Jech laj yalbe batel: —Ac'o me mochol ta svayab, ic'bicun tal ta persa yu'un ta jmil —xut.

¹⁶ Jech ibatic li viniquetique; i'ochic ta sna li Davide. Ja' to laj yilic ti ja' no'ox jun loc'om te mochol ta vaybale xchi'uc jlic jalbil tsotsil tentsun xonjolinoj.

¹⁷ Li Saule jech laj yalbe li stsebe: —¿C'u yu'un ti laj alo'laune, ti laj avac' jatovuc batel li cajcontrae? —xut. Itac'ov li Micale: —Yu'un laj yalbun ti chismilun me mu xcac' jatovuc batele —xi.

¹⁸ Jech icol batel li Davide; te ibat sq'uel Samuel ta Ramá, c'ot yalbe scotol c'usi tspasbat yu'un li Saule. Li Samuel xchi'uc Davide te ibat naquiicuc ta Naiot.

¹⁹ Ts'acal oy boch'o jech bat yalbe li Saule: —Li Davide te xa nacal ta Naiot te ta Ramá —xut.

²⁰ C'alal laj ya'ay li Saule, la stac batel svinictac noxtoc yu'un ac'o bat stsaquic tal li Davide. C'alal ic'otique, ja' to laj yilic oy jtsob j'alc'opetic te ch-ac'otajic, te chq'uejinic; ja' te chi'inbilic yu'un li Samuele. Ta ora no'ox iventainbat yo'ntonic yu'un espíritu yu'un Dios li svinictac Saule; te lic ac'otajicuc, lic q'uejinicuc ec.

²¹ C'alal laj ya'ay Saúl ti jech ic'ot ta pasele, la stac batel yan svinictac, pero te i'ac'otajic, te iq'uejinic noxtoc. La stac batel yoxibal velta svinictac li Saule; ja' no'ox jech ic'ot ta pasel noxtoc.

²² Ts'acal ibat stuc ta Ramá li Saule. C'alal ic'ot ta muc'ta joc' ta Secúe, te c'ot sjac' bu oy li Samuel xchi'uc Davide. Te i'albat ti te oyic ta Naiot ta Ramae.

²³ Li Saule te tuc' ibat. Pero te iventainbat yo'nton yu'un espíritu yu'un Dios ec, jech te lic ac'otajuc, lic q'uejinuc ec. Ja' jech tspasilan o batel c'alal to ic'ot ta Naiot te ta Ramá.

²⁴ Te lic sloc' sc'u' noxtoc, te t'anal o sbejel c'ac'al, xchi'uc sbejel ac'ubal; te ch-ac'otaj, te chq'uejin ta stojol li Samuele. Ja' te iloc' tal li lo'il jech chac li'i: “¿Me ja' jun yaj'alc'op ec li Saule?”, xiic.