1 Samuel 18 - Bible in Tzotzil de Chenalhó with Deuterocanon

La xchapanic David xchi'uc Jonatán ti lec chil sbaique

¹ C'alal ilaj yo'nton ta lo'il xchi'uc Saúl li Davide, li Jonatane lic spas ta co'ol yo'nton xchi'uc li Davide. Toj lec la sc'an jech chac c'u cha'al c'ux ta yo'nton sbec'tal stuc.

² Pero li Saule laj yic' xchi'in o ta abtel ec li Davide; muc xa xac' batel ta sna stot.

³ Li Jonatán xchi'uc Davide lic xchapanic ti j'ech'el lec chil sbaic oe. Yu'un li Jonatane toj lec la sc'an li David jech chac c'u cha'al c'ux ta yo'nton sbec'tal stuque.

⁴ Li Jonatane la sloc' li snatil c'u' slapoje; ja' laj yac'be slap li Davide, xchi'uc laj yac'be yantic sc'u'tac. Laj yac'be c'alal ta yespada, ta sflecha, xchi'uc c'alal ta xchuc sjipleb yespada.

⁵ Buyuc no'ox itacat batel yu'un Saúl li Davide, la xch'un batel. Toj lec laj yac' ta ilel sbijil. Jech li Saule la stic' ta jpasmantal yu'un soldadoetic. Toj lec i'ilat yu'un scotol soldadoetic xchi'uc j'abteletic yu'un li Saule.

Li Saule lic it'ixajuc yo'nton ta stojol li Davide

⁶ Ts'acal to c'alal laj xa'ox smil filista vinic li Davide, isutic tal scotol li israeletique. Scotol li antsetic te ta lumetic yu'un israeletique iloq'uic tal scotolic, chq'uejinic tal, ch-ac'otajic tal, tal snupic ta be li ajvalil Saule. Te tstijic tal son; xcuxet no'ox yo'ntonic chq'uejinic tal.

⁷ C'alal chq'uejinic, ch-ac'otajic li antsetique, jech chalic: “Ja' jmil (1,000) viniquetic la smil li Saule; ja' lajunmil (10,000) la smil li Davide”, xiic.

⁸ C'alal laj ya'ay li Saule, toj chopol laj ya'ay. Ta sc'ac'al xa yo'nton jech laj yal: —Li Davide ch-albat ti ja' lajunmil (10,000) la smile. Yan li vu'une yu jmil (1,000) no'ox la jmil. Naca xa muc tstiq'uic ta ajvalilal yu'unic —xi.

⁹ Li Saule ja' yorail te chopol lic yil o li Davide.

¹⁰ Ta yoc'omal li Saule ital ventainatuc yan velta yu'un li pucuj tacbil tal yu'un Diose, jech te ipas ta chuvaj te ta sna yo' bu tspas mantale. Li Davide te bat stij arpa ta stojol jech chac c'u cha'al tspas ono'oxe. Li Saule te stsacoj slanza.

¹¹ Ja' yu'un li Saule ta ora la sjipbe batel lanza li Davide yu'un la snop ti lec tspajbe batel li David te ta c'alnae. Pero li Davide chib velta la stselbun sba.

¹² Li Saule ixi' yu'un li Davide yu'un chi'inbil yu'un Muc'ul Dios; yan li Saule comtsanbil xa.

¹³ Ja' yu'un lic sloq'ues ta stojol; la stic' ta banquilal yu'un jmil (1,000) soldadoetic, jech ja' xa no'ox te yalel muyel ta stojol scotol israeletic li Davide.

¹⁴ Ta sventa ti coltabil yu'un Muc'ul Dios li Davide, jech oy lec sbijil ta spasel scotol li c'usitic la spase.

¹⁵ C'alal laj yil Saúl ti lec chbat scotol c'usitic tspas li Davide, ep ixi' o.

¹⁶ Scotol li israeletique xchi'uc li boch'otic liquemic ta Judae lec sc'anojic li Davide, yu'un ja' chtojobtasatic yu'un ti c'alal chloq'uic batel, xchi'uc ti c'alal tsutic tale.

¹⁷ Ts'acal to li Saule jech laj yalbe li Davide: —Ta xacac'bot avic' li vixil jtseb Merabe yu'un toj lec tsots avo'nton ta paspleito, xchi'uc lec chatsalvan ta sventa li Muc'ul Diose —xut. Yu'un li Saule la snop ti mu persauc ja' tsmil stuque; xu' ja' ac'o milatuc yu'un li filistaetique.

¹⁸ Pero li Davide jech laj yal: —Li vu'une mu'yuc c'usi cabtel, me ja'uc ta stojol li yuts' yalaltac jtot te ta stojol israeletique. Mu'yuc c'usi jtu ti jech sni'un xa jun ajvalil chic'ote —xut.

¹⁹ C'alal la sta yorail c'usi ora sc'oplal chac'be yic' stseb David li Saule, muc ja'uc laj yac'be. Ja' laj yac'be yic' yan vinic Adriel liquem ta Mehola.

²⁰ Pero oy yan stseb li Saule, Mical sbi. Li Micale lec sc'anoj li Davide. C'alal i'albat li Saule, lec laj ya'ay ec.

²¹ Jech la snop ti chac'be yic' o li Davide yu'un jech xu' ac'o slo'la smalal li tsebe, jech xu' ch-och o ta sc'ob filistaetic li Davide. Ja' yu'un li Saule jech laj yalbe xchibal velta li Davide: —Tana ta xajni'anot xa —xut.

²² Li Saule jech lic yalbe li smozotaque: —Bat chi'inic ta lo'il stuc li Davide, jech xavalbeic: ‘Li ajvalile toj lec sc'anojot, xchi'uc lec chaquilotcutic ec vu'uncutic ti te chi'abtejcutic yu'une. Ja' lec ac'o sni'anot li ajvalile’, utic —xi li Saule.

²³ Li smozotac Saule bat yalbeic ya'ay scotol li Davide, pero li Davide jech laj yal: —¿Me chacuyic ti mu'yuc vocol xu' tsni'an jun ajvalil li boch'o abul sba, ti mu'yuc bu ich'bil ta muq'ue? —xut.

²⁴ C'alal laj ya'yic c'u x'elan itac'ov li Davide, bat yalbeic li Saule.

²⁵ Li Saule jech laj yalbe li smozotaque: —Jech xbat avalbeic li Davide: ‘Li ajvalile mu'yuc la tsc'anbe stojol li stsebe; ja' no'ox tsc'an ac'o avich'be tal vo'vinic (100) ta lic snuculil sni' sc'unilic li filistaetique yu'un jech vo'ot chapacbe sutel li yajcontrataque’, utic —xut li smozotaque. Li Saule ja' oy ta yo'nton ti te ac'o milatuc o yu'un filistaetic li Davide.

²⁶ Li smozotac Saule bat yalbeic David c'usi laj yal li ajvalile. Li Davide lec laj ya'ay, jech te ic'ot ta yo'nton ti xu' tsmuni'an li ajvalile. C'alal mu'yuc to tsts'aqui c'u yepal c'ac'al sc'an xic' sbaique,

²⁷ li Davide la xchapan batel svinictac, bat smilic chib ciento (200) filista viniquetic. La xtuch'anbeic tal li snuculil sni' sc'unilique, c'ot yac'be ta sc'ob li ajvalile yu'un jech xu' chich' ni'anel o li Davide. Ja' yu'un li Saule te laj yac'be o yic' li stseb Micale.

²⁸ Pero c'alal laj yil Saúl ti coltabil yu'un Muc'ul Dios li Davide, xchi'uc ti lec sc'anoj sbaic xchi'uc li stsebe,

²⁹ toj ven ep i'och xi'el ta yo'nton. Jech scotol c'ac'al lic scontrain o li Davide.

³⁰ Li banquilaletic yu'un filistaetique scotol c'ac'al chloc' spasic pleito, pero li Davide ja' toj lec xu' yu'un. Jech noxtoc ja' toj ven bij ta scotol ti c'u yepal j'abteletic yu'un Saule, jech toj ep i'ich'at ta muc' li Davide.