1 Samuel 16 - Bible in Tzotzil de Chenalhó with Deuterocanon

It'ujat ta ajvalilal li Davide

¹ Li Muc'ul Diose jech laj yalbe li Samuele: —¿Baq'uin to ch-ech' at-o'nton chava'ay ta sventa li Saule? Yu'un li vu'une mu xa jc'an ti ja' ajvalil o yu'un li achi'iltaque. Ja' lec nojeso batel ta aceite li acachue; batan ta sna Isaí te ta Belén, yu'un jt'ujojbe xa jun xnich'on sventa ch-och ta ajvalilal —xut.

² Itac'ov li Samuele: —¿C'u x'elan xu' chibat? Yu'un me cha'ay li Saule ta xismilun —xut. Itac'ov li Muc'ul Diose: —Ic'o batel jcotuc unin tsebal vacax; albo ti ja' chbat amilbun ta sventa jmotone.

³ C'alal chamilbun jmotone, ic'o li Isaie; te chacalbot c'usi tsc'an chapas. Li boch'o chacalbot ti ja' t'ujbil cu'une, malbo aceite ta sjol sventa ch-och ta ajvalilal —xut.

⁴ Li Samuele la spas c'usi i'albat yu'un li Muc'ul Diose. C'alal ic'ot ta Belene, te ital nupatuc ta be yu'un li moletic te ta lume, pero ta xi'el italic. Jech la sjac'beic: —¿Me tal apatbun co'ntoncutic? —xutic.

⁵ Itac'ov li Samuele: —Tal, yu'un tal jmilbe smoton Muc'ul Dios. Lecubtaso abaic, bat chi'inicun ta smilbel smoton li Muc'ul Diose —xut. Li Samuele te lic slecubtas li Isaí xchi'uc xnich'nabe; laj yalbe ti ac'o bat chi'inatuc ta smilbel smoton Muc'ul Diose.

⁶ C'alal ic'otic xchi'uc xnich'nab li Isaie, li Samuele laj yil li Eliabe, jech la snop: “Ta melel ja' t'ujbil yu'un Muc'ul Dios ch-och ta ajvalilal li vinic le'e”, xi.

⁷ Pero li Muc'ul Diose jech laj yalbe li Samuele: “Mu me ta sbauc no'ox xaq'uel c'u x'elan, xchi'uc mu me ta snatiluc xaq'uel. Le'e ma'uc t'ujbil cu'un, yu'un li vu'une mu ja'uc jech ta jq'uel jech chac c'u cha'al chaq'uelique. Yu'un li cristianoetique ja' no'ox tsq'uel ti bu lec chilique, pero li vu'une ja' ta jq'uelbe c'u x'elan yut yo'nton”, xut.

⁸ Li Isaie laj yic' noxtoc li Abinadabe; te ic'ot sva'an ta stojol li Samuele. Pero li Samuele jech laj yal: —Li'i ma'uc t'ujbil yu'un Muc'ul Dios —xi.

⁹ Li Isaie laj yic' noxtoc li Samae, pero li Samuele jech laj yal: —Li'i ma'uc t'ujbil noxtoc —xi.

¹⁰ Li Isaie la sva'an ta stojol Samuel svucubal li xnich'one, pero li Samuele jech laj yalbe li Isaie: —Li'i mu'yuc t'ujbilic yu'un Muc'ul Dios —xut.

¹¹ Li Samuele jech la sjac'be li Isaie: —¿Me mu'yuc xa yan anich'nab? —xut. Itac'ov li Isaie: —Ja' xa no'ox jun jc'ox nich'on sc'an, yu'un ja' ta xchabi jchijcutic —xi. —Ac'o bat yich' sa'el tal, yu'un mu xu' ta jchol jbatic ta mexa me mu'yuc li' oye —xi li Samuele.

¹² Ja' yu'un li Isaie lic stac ta iq'uel li xnich'one. Li quereme toj c'upil sba, chacvoxan lec yutsil. Li Muc'ul Diose jech laj yalbe li Samuele: —Le'e ja' t'ujbil cu'un. Lican me, bat jaxbo aceite ta sjol sventa ch-och ta ajvalilal —xut.

¹³ Li Samuele la stsac li xcachual yaceitee; te ta sat scotol sbanquiltac la xjaxbe ta sjol li querem Davide yu'un ja' ch-och ta ajvalilal. Jech li Davide lic ventainbatuc yo'nton yu'un li Espíritu yu'un Muc'ul Diose. Li Samuele la sc'opan comel, jech isut batel ta Ramá.

Li Davide bat stij arpa ta stojol Saúl

¹⁴ Li espíritu yu'un Muc'ul Diose iloc' batel ta stojol li Saule; ja' tal ventainatuc yu'un li pucuj ti tacbil tal yu'un Muc'ul Diose. Jech i'ac'bat ep svocol li Saule.

¹⁵ Li Saule jech i'albat yu'un li j'abteletic yu'une: —Le'e ja' pucuj ti chayuts'intaote; ja' tacbil tal yu'un li Diose.

¹⁶ Cajval, ja' lec albo mantal amozotac ac'o bat sa'ic tal boch'o sna' stijel arpa. C'alal chayuts'intaot li pucuje, ja'o ac'o stij li arpae, jech chtal xcuxetel avo'nton —xutic.

¹⁷ Itac'ov li Saule: —Ja' lec bat sa'bicun tal li boch'o lec sna' stijel arpae; ac'o tal stijbun li'i —xi.

¹⁸ Oy jun jech laj yal: —Vu'une quiloj ti oy jun xnich'on Isaí te ta Belén lec sna' stijel arpae, xchi'uc lec tsots yo'nton. Mu sna' xi' ta pleito, xchi'uc lec bij c'u x'elan chc'opoj; lec c'ac'al vinic, lec chi'inbil yu'un Muc'ul Dios —xi.

¹⁹ Ja' yu'un li Saule la stac batel j'almantaletic ta stojol li Isaie, jech laj yalbe batel: “Avocoluc tacbun tal li anich'on David ti te ta xchabibot achije”, xut batel.

²⁰ Li Isaie la stac tal ta stojol Saúl li xnich'one, ja' li Davide. Xchi'uc la stacbe batel jcot ta buro pan, xchi'uc jun yavil noj ta ya'lel ts'usub, xchi'uc jcot unin tentsun; ja' laj yic' batel li Davide.

²¹ Li Davide te ic'ot ta stojol li Saule; te lic scolta. Li Saule toj lec la xc'uxubin li Davide; te lic stic' ta yajcoltaubbail ta abtel.

²² Li Saule la stac batel j'almantal ta stojol li Isaie; la sc'anbe vocol ti ac'o ac'batuc xchi'in o li Davide yu'un toj lec chil.

²³ C'alal chlic uts'intaatuc yu'un li pucuj tacbil tal yu'un Diose, ja'o chlic stij arpa li Davide. Jech li Saule te chpat yo'nton; xcuxet xa yo'nton cha'ay, jech chloc' batel li pucuj te oy ta stojole.