1 Samuel 15 - Bible in Tzotzil de Chenalhó with Deuterocanon

La sbajbe smantal Dios li Saule,

¹ Ta yan c'ac'al li Samuele jech laj yalbe li Saule: —Li Muc'ul Diose ja' la stacun tal ti jech laj cac'bot avabtel ta ajvalil ta stojol li jteclum yu'une, ja' li israeletique. Ja' yu'un ch'unbo me c'usi chayalbot li Muc'ul Diose.

² Li Muc'ul Dios ti tspas ta mantal scotol te ta vinajele jech chal: ‘Ta xcac'be stoj smulic li amalequetic ta sventa ti la smacoxuc ta be c'alal laloq'uic tal ta Egiptoe.

³ Ja' yu'un bat milic, bat uleso o xchi'uc scotol li c'usitic oy yu'unique. Mu me xc'uxubaj ta avo'nton. Milo comel scotol li viniquetique, li antsetique, li ololetique, xchi'uc li ach' jvoq'uel ololetique, xchi'uc li xvacaxique, li xchijique, li scamelloique, li sburoique’, xayutot —xi li Samuele.

⁴ Ja' yu'un li Saule lic yic'an scotol li svinictac c'alal te oyic ta Telaime. La sq'uel sbaic c'u yepalic; ja' chib ciento ta mil (200,000) ta scotolic, xchi'uc lajunmil (10,000) iliquic tal ta Judá.

⁵ Ja' yu'un li Saule ibatic ta slumal li Amaleque; la sa' lec yavilic te ta soplejaltic.

⁶ Jech laj yalbe li quenetique: —Voc'o abaic loq'uel ta stojol li amalequetique yu'un jech mu teuc capal xacham achi'uquic. Yu'un li vo'oxuque lec laj apas abaic ta stojol israeletic ti c'alal iloq'uic tal ta Egiptoe —xut. Ja' yu'un li quenetique lic svoc' sbaic loq'uel ta stojol li amalequetique.

⁷ Li Saule lic yac'beic li amalequetique te iliquic batel ta Havila c'alal to ta yochebal Shur ti te oy ta sloq'ueb c'ac'al yu'un Egiptoe.

⁸ La xchuquic li ajvalil Agage, xchi'uc la smilbeic ta espada scotol li yajsoldadotaque.

⁹ Pero li Saúl xchi'uc scotol xchi'iltaque muc smilic li Agage, xchi'uc li me' chijetic ti ven lequique, li vacaxetique, li ch'ium tot vacaxetic ti lec jubenique, xchi'uc li tot chijetique, xchi'uc li c'usitic lec toyolic stojole; muc xulesic scotol. Ja' no'ox laj yulesic li c'usitic mu'yuc lequique, ti mu'yuc lec stuique.

¹⁰ Li Muc'ul Diose la sc'opan li Samuele, jech laj yalbe:

¹¹ —Manchuc cani ja' la jtic' ta ajvalil li Saule yu'un la svoc' sba ta jtojol; muc xch'un li c'usitic laj calbee —xut. Li Samuele toj tsots laj ya'ay, jech sbejel ac'ubal la sc'anbe vocol li Muc'ul Diose.

¹² Ta yoc'omal c'alal sac xa'ox jutuque, li Samuele chbat ox sq'uel li Saule. Pero i'albat ti te ibat ta Carmele, ti laj xa slats lec ton tee. Xchi'uc i'albat noxtoc ti laj xa spas tal velta, ti te xa isut tal ta stuq'uil Gilgale.

¹³ Ja' yu'un li Samuele te ibat yo' bu oy li Saule. Li Saule jech laj yalbe li Samuele: —Ac'o yac'bot bendición li Muc'ul Diose. Laj xa jpas c'usi laj yalbun li Muc'ul Diose —xut.

¹⁴ Itac'ov li Samuele: —Pero ¿c'u yu'un laj ca'ay ti oy chijetic, vacaxetic xme'te-me'teique? —xut.

¹⁵ Itac'ov li Saule: —Ja' laj quich'becutic tal li amalequetique. Yu'un li jchi'iltactique muc smilic li chijetic ti bu ven lequique xchi'uc li vacaxetique yu'un ja' sventa ta jmilbetic smotonin li Muc'ul Dios cu'untique. Pero scotol li yantique la jmilcutic comel —xi.

¹⁶ Itac'ov li Samuele: —¡Ch'anchan! Chacalbot ava'ay c'usi laj yalbun samel li Muc'ul Diose —xut. —Alo ca'tic cha'e —xi li Saule.

¹⁷ Jech lic yal li Samuele: —Laj to'ox anop ti toj biq'uitot laj ava'ye. Pero vo'ot lac'ot ta banquilal yu'un li jaychop jchi'iltactique. Li Muc'ul Diose la st'ujot ta sventa la'och ta ajvalilal yu'unic.

¹⁸ Xchi'uc ja' la stacot batel yu'un ac'o bat amil scotol li jpasmulil amalequetique, ti mu me junuc cuxul xcom avu'une.

¹⁹ Pero ¿c'u yu'un muc xach'unbe c'usi laj yalbot li Muc'ul Diose yu'un laj avich' tal c'usi laj apojbeic li cajcontratique? Toj chopol c'usi laj apas ta stojol li Muc'ul Diose —xut.

²⁰ Itac'ov li Saule: —La jch'un c'usi laj yalbun li Muc'ul Diose; li'ay tal ti bu la stacun batele. La jchuccutic tal li Agag, ja' li ajvalil yu'un amalequetique, xchi'uc la jmilcutic comel scotol li amalequetique.

²¹ Pero li jchi'iltactique laj yich'ic comel li vacaxetic, li chijetic ti bu ven lequic ti sc'oplal chlaje, yu'un ja' sventa ta jmilbetic smotonin te ta Gilgal li Muc'ul Dios cu'untique —xi.

²² Li Samuele jech laj yalbe: “Li Muc'ul Diose ma'uc no'ox lec chil ti ta jmilbetic, ti ta jchic'betic smotone; ja' toj lec chil me ta jch'unbetic smantale. Yu'un ja' toj lec li xch'unbel smantale; ja' mu sta jech li smoton ta jmilbetic xchi'uc li xepual chijetic chcac'betique.

²³ Li boch'o tstoy sba ta stojole tsta smul jech chac c'u cha'al li jt'unule. Ja' co'ol xchi'uc li boch'o chich' ta muc' c'usitic cuybilic ta diose yu'un ja' tsbajbeic smantal li Diose. Ta sventa ti laj abajbe smantal Muc'ul Dios ec li vo'ote, ja' yu'un chasbajot ec li Muc'ul Diose; mu xa xac' coman ta ajvalilal”, xut.

²⁴ Li Saule jech laj yalbe li Samuele: —Ta melel laj xa jta jmul; ja' la jbajbe smantal li Muc'ul Diose xchi'uc li mantal laj avalbune yu'un ja' lixi' yu'un li jchi'iltactique; ja' la jch'unbeic li c'usi la sc'anique.

²⁵ Avocoluc pasbun perdón yu'un li jmule; chi'inun sutel sventa chbat quich' ta muc' li Muc'ul Diose —xut.

²⁶ Itac'ov li Samuele: —Mu'yuc ta jchi'inot sutel, yu'un laj abajbe smantal li Muc'ul Diose, jech laj xa sbajot ec li Muc'ul Diose. Mu'yuc xa chascomesot ta ajvalilal yu'un li jchi'iltactique —xut.

²⁷ Li Samuele ijoyij jech ibat. Pero li Saule la snitbe yoc snatil c'u', te ili' yu'un.

²⁸ Li Samuele jech laj yalbe li Saule: —Li Muc'ul Diose ja' jech laj xa sli'bot avabtel ta ajvalilal ta stojol li jchi'iltactique. Ja' xa laj yac'be jun achi'il ti lec tuc' yo'ntone.

²⁹ Yu'un li Dios ti ja' slequilal israeletic c'oteme, mu sna' x'epalc'opoj, xchi'uc mu sutes sc'op. Mu ja'uc jech chac c'u cha'al jun vinic ti xloc' x'och no'ox xc'opoje —xut.

³⁰ Jech laj yal yan velta li Saule: —Laj xa jta jmul. Pero avocoluc ich'un to ta muc' jech chac c'u cha'al ajvalil ta stojol li moletique xchi'uc ta stojol scotol li jchi'iltactique. Chi'inun sutel sventa chbat quich' ta muc' li Muc'ul Dios cu'untique —xut.

³¹ Jech li Samuele la xchi'in sutel li Saule. Li Saule te c'ot yich' ta muc' li Muc'ul Diose.

³² Ts'acal jech lic yal li Samuele: —Ic'bicun tal li Agag, ajvalil yu'un amalequetique —xi. Li Agage xcuxet no'ox yo'nton ital ta stojol li Samuele. La snop ti i'ech' xa o yu'un li tsots vocol sventa chmilate.

³³ Pero li Samuele jech laj yal: —Ta scoj avespada ti ep antsetic mu'yuc yolic icom avu'une yu'un laj amilbe. Pero ja' no'ox jech mu'yuc yol ta xcom ec li ame'e —xut. Ja' yu'un li Samuele biq'uitic lic slilin ta stojol Muc'ul Dios te ta Gilgal li Agage.

³⁴ Ts'acal isut batel ta Ramá li Samuele; jech ec li Saule isut batel ta sna te ta Gabaa yu'un Saúl.

³⁵ Li Samuele mu'yuc xa xbat sc'opan yan velta Saúl ti jayib c'ac'al cuxule, ac'o me ep laj yoc'ta ta sventa ti jech laj yal li Muc'ul Diose: “Manchuc cani ja' la jtic' ta ajvalilal yu'un israeletic li Saule”, ti xie.