1 Samuel 14 - Bible in Tzotzil de Chenalhó with Deuterocanon

La spas pleito xchi'uc filistaetic li Jonatane

¹ Ta yan c'ac'al li Jonatán, xnich'on Saule, jech laj yalbe li yajcoltaubbaile: —Batic, jelovcutic batel ta jot uc'um, bat cac'betic li jtsob filista soldadoetic te oyique —xut. Pero li Jonatane muc xalbe ya'ay li stote.

² Li Saule ja'o te spasoj scarpanaic ta slajeb xa yosilal Gabaa ta yolon jpets caranato te' te ta Migrón. Li viniquetic te xchi'inoje oy vaquib ciento (600).

³ Li boch'o slapoj batel li mocan c'u'il sventa palee ja' li Ahías, xnich'on Ahitobe. Ja' li sjunich'on Icabod, xnich'on Fineese; ja' li smomnich'on Elie. Ja' li pale yu'un Muc'ul Dios te ta Siloe. Scotol li yantique muc sna'ic me batem xa li Jonatane.

⁴ Yu'un li Jonatane tsc'an chjelov ta jot sjol ch'entic yo' bu oyic li jtsob filista soldadoetique. Yu'un jujujot jol ch'en yiloj sbaic. Li jote Boses sbi; li yan jote Sene sbi.

⁵ Li jote te xcom ta stuq'uil norte ta yeloval Micmas; li yan jote te xcom ta sur ta yeloval Gabaa.

⁶ Li Jonatane jech laj yalbe li yajcoltaubbaile: —Batic yo' bu oyic li jtsob soldadoetic ti mu'yuc yich'ojic circuncisione. Naca me oy c'usi lec tsc'an tspas ta jtojoltic li Muc'ul Diose. Yu'un li Muc'ul Diose mu'yuc c'usi tsots cha'ay; xu' yu'un tscolta li boch'otic epique xchi'uc li boch'otic mu'yuc epique —xut.

⁷ Itac'ov li yajcoltaubbaile: —Paso me scotol li c'usi chanope. Batic, li' oyun ta jcoltaot ta sventa li c'usi oy ta avo'ntone —xi.

⁸ Ja' yu'un jech laj yal li Jonatane: —Jelovcutic batel le' ta jote, bat cac' jbatic ta ilel yu'un li viniquetique.

⁹ Me jech chijyalbutique: ‘Malaic te chitalcutic’, me xijyututique, xu' te no'ox chijcomutic; mu xijmuy batel yo' bu oyique.

¹⁰ Pero me jech chijyalbutique: ‘Li' xatalique’, me xijyututique, xu' chijmuy batel; ja' svinajeb ti yac'ojbutic xa ta jc'obtic li Muc'ul Diose —xut.

¹¹ Ja' yu'un te lic yac' sbaic ta ilel yu'un li jtsob filistaetique. Li filistaetique jech laj yalic: “Q'uelavilic, iloq'uic xa tal ta nailch'en li hebreoetic ti bu to'ox snac'oj sbaique”, xiic.

¹² Ta ora jech laj yalbeic li Jonatán xchi'uc yajcoltaubbaile: —Muyanic tal li' yo' bu oyuncutique; oy c'usi chacalbotcutic —xiic. Li Jonatane jech lic yalbe li yajcoltaubbaile: —La' me, chi'inun batel, yu'un li Muc'ul Diose laj xa yac'be ta sc'ob israeletic li filistaetique —xi.

¹³ Jech imuy batel li Jonatane. Ta xchanibal yoc sc'obic imuyic batel; te xchi'uc batel li yajcoltaubbaile. Li boch'otic iyalic ta lum yu'un li Jonatane, li yajcoltaubbaile te no'ox la smilan ta ora.

¹⁴ Ja' sba pleito la spas xchi'uc yajcoltaubbail li Jonatane; ja' la smilic jtob (20) viniquetic ti bu tsobolique.

¹⁵ Scotol li boch'otic te oyic ta scarpanaique xchi'uc li boch'otic loq'uemic batel ta scarpanaique toj ep xi'el laj ya'yic. Li filista soldadoetic ti svoc'anoj sbaique xchi'uc li yantic ti buyuc no'ox chanovic ta jujutsobe ixi'ic noxtoc. Jech noxtoc tsots inic li banamile, jech yan to sba xi'el laj ya'yic.

¹⁶ Li jchabivanejetic yu'un Saúl ti te oyic ta Gabaa ta yosilal Benjamine laj yilic batel ti bats'i anil chbatic li filistaetique; ta buyuc xa no'ox ibatic ta anil.

¹⁷ Li Saule jech lic yalbe li xchi'iltac te xchi'inoje: —Q'uelic quic me oy boch'o mu'yuc li' oy cu'untique —xut. Jech la sq'uelic. Te laj yilic ti ja' mu'yuc te oy li Jonatán xchi'uc yajcoltaubbaile.

¹⁸ Li Saule jech laj yalbe li Ahiase: —Ich'ic tal li mocan c'u'ile —xut. Yu'un ja'o yorail te yich'ojic israeletic li mocan c'u'il yu'un Diose.

¹⁹ C'alal ja'o chchi'in ta lo'il pale li Saule, lic soquicuc scotol li filistaetic te ta scarpanaique; solel ijinic o scotolic. Li Saule jech laj yalbe li palee: —Mu xa xavich' tal —xut.

²⁰ Li Saúl xchi'uc li boch'otic te xchi'inoje ibatic ta pleito ta ora. Li filistaetique te lic smilan sba stuquic ta sventa ti isoc xa sjolique.

²¹ Li hebreoetic ti oy xa sc'ac'alil lic xchi'inic li filistaetique, ti ja' xa yajsoldado filista c'otemique, te ijelovic tal ta stojol li yantic xchi'iltaquic ta israelal ti te xchi'inojic li Saúl xchi'uc Jonatane.

²² Li israeletic ti te snac'oj sbaic ta vitsetic ta yosilal Benjamine laj ya'yic ti chjatovic xa batel li filistaetique, jech iloq'uic tal ta ora, bat snutsic ta anil; la smilic.

²³ Li pleito la spasic batele ic'otic c'alal to ta Bet-avén. Ja' jech c'ac'al icoltaatic yu'un Muc'ul Dios li israeletique.

Li Saule laj yal ta stojol Dios ti mu'yuc to boch'o xu' chve' yu'unique

²⁴ Pero li israeletique ja'o oy tsots svocolic, yu'un li Saule oy c'usi yaloj ta stojol li Diose. Jech yaloj: “Li boch'o oy c'usi tstun c'alal mu'yuc to chch'ay c'ac'ale, ti c'alal mu'yuc to ta jtsal li cajcontratique, ac'o stoj smul”, xi. Ja' yu'un scotol li israeletique me jutuc mu'yuc c'usi stunojic.

²⁵ Li israeletique te ic'otic ta jun toyolaltic. Oy muc'ta pom la staic te ta banamil.

²⁶ I'ochic batel ta yut te'tic; te laj yilic ti ep chloc' li pome, pero me junuc mu'yuc boch'o la spas ya'ay, yu'un ixi'ic yu'un li c'usi albil ta stojol Diose.

²⁷ Pero li Jonatane mu'yuc xa'ay c'usi yaloj ta stojol Dios li stote, jech la sts'aj tal ta pom sni' ste'; la slo', jech xoc' xi to laj ya'ay.

²⁸ Oy jun boch'o jech laj yalbe: —Li atote oy c'usi laj yal ta stojol Dios ti ac'o jpastique, jech laj yal: ‘Li boch'o oy c'usi tstun jutuque, ac'o stoj smul’, xi. Ja' yu'un li jchi'iltactique ta xa x'alubic —xut.

²⁹ Itac'ov li Jonatane: —Li jtote ta xuts'inta scotol li jchi'iltactique. Q'uelavil, li vu'une xoc' xi to jutuc chca'ay ti la jlo' li pome.

³⁰ Xjelov to jech xcuxet cha'yic scotol jchi'iltactic ti lajuc sve'ic li c'usi la jpojbetic cajcontratique. Ti jechuque solel tsalbil icom cu'untic o li filistaetique —xi.

³¹ Li israeletique ja' jech ora la stsalic li filistaetique. Lic spasic pleito te ta Micmas c'alal to ta Ajalón. Pero li israeletique solel lubenic ta jyalel.

³² Li israeletique muc xa xcuch yu'un laj ya'yic, jech la smilic li chijetic, li me' vacaxetic, li bic'tal tot vacaxetic, la spojique; te la sti'ic ta stseil xchi'uc xch'ich'al.

³³ Pero oy boch'o bat yalbe ya'ay li Saule, jech laj yalbe: —Li jchi'iltactique laj xa sa' smulic ta stojol li Muc'ul Diose yu'un la sti'ic ti'bol xchi'uc xch'ich'al —xutic. Li Saule jech laj yal: —¡Vo'oxuc j'ac'vanejoxuc ta vocol ta jyalel! Balijesbicun tal jbejuc muc'ta ton li'i.

³⁴ Jech noxtoc bat albeic scotol jchi'iltactic ti ac'o yich'bicun tal xvacaxic, o me xchijic jujunique; milic li'i, ti'anic. Jech mu xata amulic ta stojol Muc'ul Dios yu'un muc capaluc xchi'uc xch'ich'al chati'ic —xi. Te no'ox ta yac'ubalil ta jujuntal laj yich'ic tal stuquic li xvacaxique; te la smilic.

³⁵ Li Saule te lic slats jun scajleb smoton Muc'ul Dios. Ja' sba scajleb smoton Muc'ul Dios la spas li Saule.

³⁶ Li Saule jech laj yal: —Yalcutic batel ta ac'ubaltic, bat cac'betic o li filistaetique. Te oyutic o c'alal to tsacub oc'om; me junuc mu'yuc cuxul ta jcomtsantic —xi. Scotolic jech laj yalic: —Paso li c'usi toj lec ta pasel chavile —xiic. Pero li palee jech laj yal: —Pero tsc'an ba'yuc ta jac'betic li Diose —xi.

³⁷ Ja' yu'un li Saule te lic sjac'be li Diose: —¿Me xu' chbat cac'becutic o li filistaetique? ¿Me chavac'buncutic ta jc'obcutic vu'uncutic li israeluncutique? —xut. Pero li Muc'ul Diose mu'yuc c'usi laj yal li jun c'ac'al le'e.

³⁸ Li Saule jech laj yal noxtoc: —Vo'oxuc li banquilaloxuc yu'un jchi'iltactique nopajanic tal li'i, yu'un ac'o avilic boch'o oy smul tana.

³⁹ Ta xcal ta jamal ta stojol li Muc'ul Dios ti la scoltautic vu'utic li israelutique. Li boch'o oy smule ac'o chamuc, ac'o me ja' li jnich'on Jonatane —xi. Me junuc mu'yuc boch'o xtac'ov.

⁴⁰ Ja' yu'un li Saule jech lic yalbe scotol li israeletique: —Li vo'oxuque li' xavac' abaic ta jote. Li vu'uncutic jchi'uc jnich'on Jonatane li' chcac' jbacutic ta yan jote —xi. —Paso li c'usi lec chava'ye —xi itac'ov scotolic.

⁴¹ Li Saule tsots jech lic yalbe li Diose: —Muc'ul Dios, ac'o ta ilel ta bats'i melel li boch'o oy smule —xut. C'alal la spasic canal tajimole, ja' ic'ot ta stojol li Saúl xchi'uc xnich'one. Scotol li yantique colem icomic.

⁴² Li Saule jech laj yal: —Pasic canal tajimol ta jventacutic jchi'uc li jnich'on Jonatane —xi. C'alal la spasique, ja' ic'ot ta stojol li Jonatane.

⁴³ Li Saule jech laj yalbe li Jonatane: —Albun ta jamal li c'usi laj apase —xut. Li Jonatane jamal laj yal: —Ta melel la jlo' juteb li pom la jluch loq'uel ta jte' te quich'oje. Pero li' oyune, xu' chicham —xi.

⁴⁴ Li Saule jech laj yal: —Me mu xcham li Jonatane, tsots ac'o yac'bun jtoj li Diose —xi.

⁴⁵ Pero li israeletique jech laj yalbeic li Saule: —¿C'u yu'un ta jc'antic ac'o chamuc li Jonatane yu'un ja' la stsalbutic cajcontratic vu'utic li israelutique? Mu razonuc jech. Ta sventa ti cuxul li Muc'ul Diose, mu me xbaj jbejuc stsotsil sjol ta banamil li Jonatane. Yu'un scotol li c'usi la spas naxe, la spas ta sventa yu'un icoltaat yu'un Dios —xiic. Li israeletique ja' jech la scoltaic li Jonatane jech muc xcham.

⁴⁶ Li Saule te la xquechan o snutsel li filistaetique. Jech ec li filistaetique isutic batel ta yosilalic.

⁴⁷ Li Saule lic stsac lec yabtel ta ajvalilal ta stojol li israeletique. La stsal scotol li yajcontra te oy ta spat xoconique, ja' li moabetique, li amonetique, li edometique, li ajvalil ta Sobae, xchi'uc li filistaetique. Buyuc no'ox ibat, la stsal comel scotol.

⁴⁸ Lic stsob yajsoldadotac, bat stsalic li Amaleque, jech la scolta o israeletic ta sventa li j'eleq'uetic te ch-elc'aj ta stojolique.

⁴⁹ Li xnich'nabtac Saule ja' li'i: Jonatán, Isúi, xchi'uc Malquisúa. Oy chib stsebetic: Ja' Merab sbi li vixile; li muquile ja' Mical sbi.

⁵⁰ Li yajnil Saule Ahinoam sbi; ja' stseb Ahimaas. Li mero banquilal jpasmantal yu'un yajsoldadotaque ja' Abner, xnich'on Ner; ja' sjuntot li Saule.

⁵¹ Li Cise ja' stot li Saule. Li Nere ja' stot li Abnere, ja' xnich'nabtac li Abiele.

⁵² Ti jayib c'ac'al cuxul li Saule, bats'i tsots pleito la spasic xchi'uc li filistaetique. Ja' yu'un li Saule lic yic' ta yajsoldado li boch'otic lec tsots slomoic, xchi'uc lec tsots yo'ntonique.