1 Samuel 13 - Bible in Tzotzil de Chenalhó with Deuterocanon

La spasic pleito xchi'uc israeletic li filistaetique

¹ C'alal i'abtej xa'ox chib jabil ta ajvalilal li Saule,

² lic st'uj oxmil (3,000) viniquetic ta stojol li israeletique. Cha'mil (2,000) te icom xchi'in ta Micmas xchi'uc ta vitsetic ta Betel. Li yan jmile (1,000) ja' bat xchi'in Jonatán ta Gabaa ta yosilal Benjamín. Scotol li yantique i'albatic yu'un Saúl ti ac'o suticuc batel ta snaique.

³ Li Jonatane la smil scotol li jtsob soldado filistaetic te oyic ta Gabaae. C'alal jech ic'ot ta pasele, laj ya'yic scotol li filistaetique. Li Saule lic yal mantal ti ac'o yich' jupanel oq'ues ta scotol yosilalique yu'un ac'o ya'yic scotol li hebreoetique.

⁴ Scotol israeletic laj ya'yic ti jech chich' alele: “Li Saule laj xa smil scotol li jtsob filista soldadoetique, ja' yu'un toj chopol ch-ilatic yu'un filistaetic li israeletique”, xiic. Ja' yu'un scotol li israel viniquetique bat stsob sbaic ta Gilgal xchi'uc li Saule.

⁵ Jech ec li filistaetique lic stsob sba scotolic sventa tstsaquic ta pleito li israeletique. Oy lajuneb xcha'vinic ta mil (30,000) scaretaic sventa pleito, vacmil (6,000) viniquetic cajalic ta ca', xchi'uc bats'i ep viniquetic stsoboj sbaic; mu xlaj ta atel jech chac c'u cha'al yi' ta ti'nab. Tuc' ibatic ta Micmas; te c'ot spas scarpanaic ta sloq'ueb c'ac'al yu'un Bet-avén.

⁶ C'alal laj yilic israeletic ti mu'yuc xa epic ta scoj ti scotolic xi'emique, jech la snac' sbaic ta nail ch'enetic, ta vomlumetic, ta ch'entic, ta bevo'tic, xchi'uc ta pozoetic.

⁷ Xchi'uc ep ijelovic batel ta jot uc'um Jordán; tuc' ibatic ta yosilal Gad xchi'uc Galaad. Yan li Saule te to icom ta Gilgal, pero scotol li xchi'iltaque chniquic xa ta xi'el.

⁸ Li Saule te la smala vucub c'ac'al ta Gilgal yu'un jech ono'ox albil yu'un li Samuele. Pero li Samuele muc xc'ot li c'usi c'ac'alil yaloje, jech li viniquetique lic suticuc batel ta snaic.

⁹ Ja' yu'un li Saule jech laj yal: —Ich'ic tal smoton Dios sventa ta jchic'betic, xchi'uc sventa ta jmilbetic sventa co'ol co'nton jchi'uctic —xi. Jech te lic xchic'be smoton Dios li Saule.

¹⁰ C'alal ja' to no'ox ilaj yo'nton ta xchic'bel smoton Dios li Saule, ja'o ic'ot li Samuele. Li Saule iloc' batel bat snup ta be; la sc'opan.

¹¹ Li Samuele jech laj yal: —¿C'u yu'un ti jech laj apase? —xut. Itac'ov li Saule: —Yu'un laj quil ti ta xa sutic batel scotol li jchi'iltactique, xchi'uc ti muc xavul li c'usi c'ac'alil avaloje yu'un li' tsobolic o ta Micmas li filistaetique.

¹² La jnop me chtal stsaquicun ta pleito li' ta Gilgal, pero li vu'une mu'yuc bu jc'anojbe vocol li Muc'ul Diose. Ja' yu'un la jsuj jba ta xchic'bel smoton li Diose —xut.

¹³ Itac'ov li Samuele: —¡Ja' achi'il jun jchuvaj ti jech laj apase! Ti ja'uc laj ach'un c'usi yalojbot li Muc'ul Diose, j'ech'el te chcom o c'alal ta avalab anich'nab avabtel ta stojol jchi'iltactic ti jechuque.

¹⁴ Pero tana jayib no'ox c'ac'al chavich' li avabtele. Li Muc'ul Diose st'ujoj xa yan vinic ti bu lec chile; ja' chac' ochuc ta banquilal yu'un li steclumale, yu'un li vo'ote muc xach'un c'usi laj yalbot li Muc'ul Diose —xut.

¹⁵ Li Samuele la stam batel sbe yan velta. Iloc' ta Gilgal; ibat ta Gabaa ta yosilal Benjamín. Li Saule te lic yata scotol li viniquetic te xchi'uque. Ja' oy vaquib ciento (600) ta scotol.

¹⁶ Li Saúl xchi'uc xnich'on, ja' li Jonatane, xchi'uc li viniquetic te xchi'inojique ibatic ta Gabaa ta yosilal Benjamín. Li filistaetique te xa spasoj lec scarpanaic ta Micmas.

¹⁷ Iloq'uic batel ta scarpanaic li filistaetique; la spas sbaic ta oxvoc'. Jvoc' ibatic ta sbelal Ofra ta stuq'uil jun banamil Sual sbi.

¹⁸ Li xcha'voc'ale te ibatic ta stuq'uil Bet-horón; li yoxvoc'ale te ibatic ta yeloval muc'ta soplejal Zeboim ta stuq'uil xocol banamil.

¹⁹ Ta scotol yosilal li israeletique, me junuc mu'yuc scomtsanbatic jtentaq'uin. Yu'un li filistaetique la snopic ti jech mu xa xu' tspasic espada xchi'uc lanza li hebreoetique.

²⁰ Jech scotol israeletic persa te chbatic ta stojol filistaetic, chbat yaq'uic tal ta juxel slocubil banamil yu'unic jujunic xchi'uc yazaronaic, yeq'uelic, xchi'uc spicoic.

²¹ Li stojol c'alal tsc'anic juxbel slocubil banamil xchi'uc yazaronaique jutuc mu sta jun siclo tsc'anic. Yan c'alal chjuxic eq'uel xchi'uc c'alal tsmeltsanic li jun te' ti ts'ubts'ub sni' pasbil ta taq'uine, jutuc mu sta o'lol siclo tsc'anic.

²² Ja' yu'un scotol li boch'otic te xchi'inojic li Saúl xchi'uc Jonatane mu'yuc yespadaic, o me slanzaic ti c'alal ja'o yorail tsots pleitoe. Ja' no'ox oy yu'unic li Saúl xchi'uc Jonatane.

²³ Li jtsob filista soldadoetique ijelovic batel ta sjelovel to Micmas.