1 Samuel 12 - Bible in Tzotzil de Chenalhó with Deuterocanon

La xchi'in ta lo'il scotol israeletic li Samuele

¹ Li Samuele jech lic yalbe scotol li israeletique: —Li vo'oxuque laj xa avilic ti laj quich'boxuc ta muc' li c'usi laj ac'anique, jech laj xa cac'boxuc jun ajvalil avu'unic.

² Ja' yu'un li' oy li ajvalil avu'unique; ja' chastojobtasoxuc. Li vu'une molun xa, sac xa jol. Pero li jnich'nabe li' oy ta atojolic. Li vu'une biq'uitun ono'ox lic jcoltaoxuc tal c'alal to tana.

³ Li' oyune, albicun ta jamal me oy boch'o laj quich'be xvacax, o me sburo, me oy boch'o laj cuts'inta, la jchopolc'opta, me oy boch'o la jtsacbe staq'uin jech mu'yuc xa lec la jchapan o. Xu' chavalic li' ta stojol Dios, xchi'uc ta stojol li ajvalil la st'ujboxuque; xu' ta jtoj ti c'u yepal jmule —xi.

⁴ Itac'ov scotolic: —Mu'yuc c'usi chopol laj apasbuncutic; mu'yuc xavuts'intauncutic. Mu'yuc boch'o junuc laj alo'labe staq'uin —xiic.

⁵ Jech laj yal noxtoc li Samuele: —Ja' testigo chcom li Muc'ul Diose xchi'uc li ajvalil li' st'ujoj ti mu'yuc xatabicun jmul ta melele —xi. —Jech —xiic scotolic.

⁶ Li Samuele jech laj yalbe scotol li israeletique: —Li Muc'ul Diose ja' la sloq'ues tal ta Egipto banamil li jmoltot jyame'tic ta vo'one ta sventa li Moisés xchi'uc Aarone.

⁷ Ja' yu'un chapano lec abaic, yu'un chacalboxuc ava'yic ta stojol Muc'ul Dios scotol li c'usitic lec la spas ta atojolic, xchi'uc ta stojol li jmoltot jyame'tic ta vo'onee.

⁸ C'alal ibatic ta Egipto li Jacob xchi'uc smomnich'nabtaque, te laj yich'ic mozoinel yu'un li egiptoetique. Jech li jmoltot jyame'tic ta vo'onee lic sc'anbeic vocol li Muc'ul Diose. Ja' yu'un li Muc'ul Diose ja' la stac batel li Moisés xchi'uc Aarone; ja' bat sloq'uesic tal ta mozoil ta Egipto banamil li jmoltot jyame'tic ta vo'onee, jech li' ivul naquiicuc ta banamile.

⁹ Pero ts'acal ich'ay ta yo'ntonic li Muc'ul Diose. Jech laj yac' ti ac'o ochicuc ta sc'ob li Sisarae, ja' li banquilal soldado te ta Hazore, xchi'uc ta sc'ob li filistaetique, xchi'uc ta sc'ob li ajvalil ta Moabe, jech lic yich'ic tsaquel ta pleito.

¹⁰ Pero ts'acal lic sna'ic ti laj xa sta smulic ta stojol li Muc'ul Diose, ti laj xa scomtsanique yu'un ja' xa itunic yu'un li Baaletique xchi'uc li Astarote. Jech lic sc'anbeic vocol ti ac'o coltaaticuc loq'uel ta sc'ob li yajcontraique; laj yalbeic ti ja' xa no'ox chich'ic o ta muc' stuque.

¹¹ “Ja' yu'un li Muc'ul Diose la st'ujbe jchapanvanejetic yu'unic; ja' li Jerobaale, li Baraque, li Jeftee, xchi'uc vu'un li Samuelune, jech la jcoltaotcutic loq'uel ta sc'ob li avajcontraic li' ta jpat ta jxocontique, jech jun avo'ntonic li' lanaquiic.

¹² Pero c'alal laj avilic ti chtal xa stsacoxuc ta pleito li Nahas, ja' li ajvalil yu'un amonetique, lic ac'anbicun jun ajvalil avu'unic yu'un ac'o sventainoxuc, ac'o me ja' ajvalil avu'unic stuc li Muc'ul Dios cu'untique.

¹³ Pero li' oy li ajvalil avu'unic laj at'ujique. Li Muc'ul Diose laj yac'boxuc li ajvalil laj ac'anique.

¹⁴ Ja' yu'un li' ta orae, oy me ta aventaic ti ac'o avich'ic ta muc' li Muc'ul Diose. A'ibeic li sc'ope; ch'unbeic li c'usi chayalboxuque. Ti jayib c'ac'al cuxuloxuc li vo'oxuque xchi'uc li ajvalil avu'unique, ja' me pasic jech chac c'u cha'al tsc'an yo'nton stuc li Muc'ul Diose, jech lec chabatic.

¹⁵ Pero me mu xach'unic, me mu xavich'beic ta muc' c'usi chayalboxuque, ta me xayac'boxuc atoj amulic li vo'oxuque xchi'uc li ajvalil avu'unique.

¹⁶ “Malaic me, chavilic muc' senyail chlic spas ta atojolic li Muc'ul Diose.

¹⁷ A'yo ava'yic, li'i ja' yorail tuch' trigoaltic, jech mu'yuc chac' vo', ¿me mu jechuc? Pero vu'un ta jc'anbe Muc'ul Dios ti ac'o stac tal chauc xchi'uc tsots vo', yu'un jech ac'o avotquinic, ac'o ana'ic ti ta melel toj chopol c'usi laj apasic ta stojol Muc'ul Dios ti laj ac'anic jun ajvalil avu'unique —xut.

¹⁸ Ja' yu'un li Samuele lic sc'opan Muc'ul Dios, jech ta ora la stac tal chauc xchi'uc vo'. Scotol li israeletique ep ixi'ic yu'un li Muc'ul Diose xchi'uc li Samuele.

¹⁹ Scotol israeletic jech lic yalbeic li Samuele: —C'anbo vocol Muc'ul Dios ta jventacutic yu'un mu me xichamcutic. Yu'un la jta tsots jmulcutic ta sventa ti la jc'ancutic jun ajvalil cu'uncutique —xiic.

²⁰ Itac'ov li Samuele: —Mu xaxi'ic. Ta melel toj chopol li c'usi laj apasique, pero mu me xanamajic ta stojol li Muc'ul Diose; ja' lec ich'ic ta muc' ta scotol avo'ntonic.

²¹ Mu me ja'uc xbat ats'aclinic li c'usi mu ja'uc Diose, ti mu xu' yu'un chascoltaoxuque, yu'un mu ja'uc mero Dios ta melel.

²² Yu'un li Muc'ul Diose mu'yuc chascomtsanoxuc o sventa ac'o ich'atuc ta muc'. Yu'un tsc'an ti vo'oxuc steclumaloxuc chac'otic oe.

²³ Li vu'une, Muc'ul Dios ac'o scoltaun ti mu me jta jmul ta stojol ta sventa ti ta jquechan sc'anel vocol ta atojolique. Ja' no'ox venta laj calboxuc ava'yic ti bu lec tuc' be tsc'an chabatique.

²⁴ Ja' no'ox xavich'ic ta muc' li Muc'ul Diose; ja' no'ox xatunic yu'un ta scotol avo'ntonic ta melel. Nopic lec ava'yic ti toj tsotsic li c'usitic la spas tal ta atojolique.

²⁵ Pero me ja' chapasic li c'usi chopole, j'ech'el chavich'ic o ulesel c'alal ta ajvalil avu'unic —xut.