1 Samuel 11 - Bible in Tzotzil de Chenalhó with Deuterocanon

La stsal amonetic li Saule

¹ Li ajvalil Nahas te ta Amone ibat ta Jabes Galaad; te c'ot spas scarpanaic, yu'un tscontrainic li lum Jabese. Li jnaclumetic te ta Jabese jech laj yalbeic: —Jpastic ta co'ol co'ntontic; ta xicomcutic ta amozoic —xutic.

² Itac'ov li ajvalil Nahase: —Xu' ta jpas ta co'ol co'ntontic me chc'ot ta avo'ntonic ti chajloq'uesboxuc jujubej abats'isatic acotolique; ja' q'uexlal chcom ta atojolic, vo'oxuc li israeloxuque —xi.

³ Li banquilaletic te ta Jabese jech itac'ovic: —Ac'buncutic c'ac'al junuc xemuna sventa ta jtaccutic batel mantal ta scotol cosilalcutic. Me mu'yuc boch'o chtal scoltauncutique, xu' chcac' jbacutic ta ac'ob —xutic.

⁴ Li j'almantaletique ic'otic te ta Gabaa yo' bu nacal li Saule, c'ot yalbeic scotol xchi'iltaquic li a'yeje. C'alal laj ya'yique, lic yoc'ta sbaic scotolic.

⁵ Li Saule ja'o isut tal xchi'uc xvacaxtac, jech vul sjac': —¿C'usi spas li jchi'iltactic ti ch-oc' scotolique? —xi. Te lic yalbeic scotol li a'yej ti i'ay yalic li jnaclumetic ta Jabese.

⁶ C'alal laj ya'ay li Saule, ta ora iventainat yu'un li Espíritu yu'un Diose; tsots i'ilin ta sventa li a'yeje.

⁷ La stsac cha'cot vacax li Saule; lic sbasan ta jujubos. Laj yic' jayibuc viniquetic ja' bat spuquic ta scotol yosilal israeletic, jech laj yalic: “Ja' jech ta spasbat xvacaxic ec li boch'o mu xbat xchi'in li Saúl xchi'uc Samuele”, xiic. C'alal laj ya'yique, ixi'ic, jech iloq'uic batel scotolic. Xco'laj xchi'uc jun no'ox vinic laj ya'ay sbaic ta scotolic.

⁸ C'alal laj yat svinictac te ta Bezec li Saule, oy oxib ciento ta mil (300,000) israeletic ti iliquic ta Israele; ja' lajuneb xcha'vinic (30,000) ta mil iliquic ta Judá.

⁹ Jech laj yalbe li j'almantaletic ic'otique: —Bat albeic jnaclumetic te ta Jabes ti oc'om ta o'lol c'ac'al ta xbat jcoltatique —xut. Jech ibatic li j'almantaletique, bat yalbe ya'yic li jnaclumetic te ta Jabese. C'alal laj ya'yique, xcuxet ic'ot yo'ntonic.

¹⁰ Jech bat yalbeic li yajcontraique: —Oc'om ta xcac' jbacutic ta ac'ob yu'un ac'o apasbuncutic li c'usi tsc'an avo'ntone —xutic.

¹¹ Li Saule ta yoc'omal la xchapan lec li svinictaque; la spas ta oxvoc'. C'alal mu'yuc to tsacube, i'ochic batel ta yut yo' bu spasoj scarpanaic li yajcontraique; te lic smilic scotol li amonetique c'alal to ista o'lol c'ac'al. Li boch'otic cuxul to icomique ijatovic batel ta jujuntal; mu'yuc boch'o ta chib laj yic' sbaic batel.

¹² Oy jayibuc jech laj yalbeic li Samuele: —¿Boch'otic ti chib no'ox yo'ntonic ta stojol li ajvalil Saule? Ac'buncutic ta jc'obcutic, ta jmilcutic —xiic.

¹³ Pero li Saule jech laj yal: —Tana mu'yuc boch'o xu' chcham junuc, yu'un li' ta orae laj xa scoltautic li Muc'ul Diose —xi.

¹⁴ Li Samuele jech laj yalbe ya'ay scotolic: —Batic ta Gilgal; te ac'o bat jtic'tic ta ajvalilal li Saule —xi.

¹⁵ Jech ibat scotolic ta Gilgal. Te ta stojol Muc'ul Dios la stiq'uic ta ajvalilal li Saule. Te la smilbeic smoton Muc'ul Dios sventa co'ol yo'nton xchi'uquic. Li Saúl xchi'uc scotol israeletique toj xcuxet no'ox yo'ntonic.