1 Samuel 10 - Bible in Tzotzil de Chenalhó with Deuterocanon

Li Samuele la smalbe aceite ta sjol li Saule

¹ Li Samuele lic stsac jun jarro aceite. La smalbe ta sjol li Saule; la sts'uts', jech laj yalbe: —Li vo'ote voc'bilot xa yu'un Muc'ul Dios sventa chaventainbe li steclumale, ja' li israeletique.

² C'alal chaloc' batel tanae, te chanup ta be chib vinic ta nopol smuquinal anima Raquel te ta Selsa ta yosilal Benjamín. Te chayalbot ti laj xa staic li me' buroetic chat'unique, xchi'uc ti mu'yuc xa chat yo'nton li atote, ti ja' xa no'ox chat yo'nton ta aventaic li vo'oxuque, ti mu xa sna' c'usi tspase.

³ Jech noxtoc c'alal me lac'ot ta jpets tulan te ta Tabore, te chasnupoxuc ta be oxib viniquetic chmuyic batel ta Betel, chbat yich'ic ta muc' Dios. Li june yich'oj oxcot unin tot tentsun; li yane yich'oj oxib pan; li yoxibale yich'oj ya'lel ts'usub ta jun yavil pasbil ta nucul.

⁴ Te chasc'opanot xchi'uc chayac'bot chib pan, pero xatsacbe me.

⁵ Ts'acal te chac'ot ta Gabaa yu'un Dios yo' bu oy jtsob soldadoetic yu'un filistaetic. C'alal cha'och batel ta lume, te chanup jtsob j'alc'opetic te ch-ac'otajic, te chq'uejinic yalel tal yo' bu chich'ic ta muc' Dios. Te ba'yucbe tal yu'unic jmusiqueroetic, tstijic tal vob, sepseptaq'uin, ama, xchi'uc arpa.

⁶ Ventainbilot chac'ot ta stsatsal Muc'ul Dios, chlic apas jech chac c'u cha'al li yan j'alc'opetique, jech chlic jeluc atalel.

⁷ C'alal me ic'ot ta pasel jech li senyailtac le'e, xu' xa chapas li c'usi tsc'an Dios chapase; Dios chascoltaot.

⁸ Ts'acal jelovan batel ba'yuc ta Gilgal yo' bu chlic jtsob jbatic ta ts'acal sventa ta jchic'betic, ta jmilbetic smoton Dios sventa co'ol co'nton jchi'uctic. Te xamalun vucubuc c'ac'al, ja' to me lic'ote; te chacalbot c'usi tsc'an chapas —xut.

⁹ C'alal ja' to no'ox la svoc' sbaic batel xchi'uc Samuel li Saule, ta ora no'ox ijelbat yo'nton yu'un Dios li Saule. Ta jun no'ox sc'ac'alil ic'ot ta pasel scotol li senyailtac i'albate.

¹⁰ C'alal ic'ot ta Gabaae, te ital nupatuc ta be yu'un li jtsob j'alc'opetique. Li Saule iventainat ta stsatsal Dios, jech lic spas jech chac c'u cha'al li yantic j'alc'opetique.

¹¹ Pero scotol li boch'otic xotquinic ono'ox li Saule, c'alal laj yilic ti ja' jech tspas ec jech chac c'u cha'al li yantic j'alc'opetique, jech lic yalbe sbaic: “¿C'usi spas li xnich'on Cise? ¿Me ja' jun j'alc'op ec li Saule?”, xut sbaic.

¹² Oy jun boch'o jech laj yal: “¿Boch'o stotic le'e?”, xi. Ja' te liquem tal li lo'ile: “Li Saule ja' xchi'il j'alc'opetic ec”, ti xie.

¹³ C'alal ilaj yo'nton ta spasel jeche, te ic'ot ta sna.

¹⁴ C'alal ic'otic xchi'uc smozoe, jech laj yich'ic jac'bel yu'un sjuntot li Saule: —¿Bu la'ayic tal? —x'utatic. Itac'ov li Saule: —Ay jt'un tal sme' jburocutic. Pero c'alal mu'yuc la jtacutique, te bat jq'uelcutic o li Samuele —xi.

¹⁵ Itac'ov li juntotile: —¿C'usi laj yalboxuc li Samuele? Avocolicuc albicun ec —xi.

¹⁶ Itac'ov li Saule: —Laj yalbuncutic ta jamal ti tabil xa li me' buroetique —xut. Pero muc xalbe ya'ay sc'oplal li yabtel chich' ti i'albat yu'un Samuele.

¹⁷ Ts'acal to lic yic' scotol israeletic li Samuele yu'un ac'o bat yich'ic ta muc' Muc'ul Dios te ta Mizpa.

¹⁸ Jech laj yalbe: —Jech yaloj li Muc'ul Dios cu'untic, vu'utic li israelutique: ‘Vu'un la jloq'uesoxuc tal ta Egipto banamil vo'oxuc li israeloxuque. La jcoltaoxuc loq'uel tal ta sc'ob li egiptoetique xchi'uc ta sventa scotol li yantic lum ti laj yac'boxuc avocolique’, xi.

¹⁹ Pero li vo'oxuque laj xa abajic li Dios cu'untic ti la scoltaoxuc ta sventa c'opetic xchi'uc ta sventa avocolique, yu'un jech laj avalic: ‘Mo'oj, ac'buncutic jun ajvalil cu'untic’, xachiic. Ja' yu'un li' ta orae la'ic ta stojol Muc'ul Dios acotolic ta jujuchopoxuc, xchi'uc ta jujuchop abiic —xut.

²⁰ Li Samuele lic yal mantal ti ac'o nopajicuc tal scotol li jaychop israeletique. Ja' iloc' sbiic li jchop liquemic ta Benjamine.

²¹ Laj yal ti ac'o nopajicuc batel li jchop liquemic ta Benjamine xchi'uc ta jujuchop sbiic. Ja' iloc' sbiic li jchop sbiic liquemic ta Matrie; ja' te iloc' sbi noxtoc li Saúl, xnich'on Cise. La sa'ic, pero mu'yuc te oy.

²² Te lic sjac'beic Muc'ul Dios me yu'un mu'yuc te oy li Saule. Li Muc'ul Diose laj yal ti te xa oye; te snac'oj sba ta icatsiletic.

²³ Jech ibatic ta anil, bat yiq'uic tal. C'alal te xa oy ta stojol li israeletique, ja' no'ox stuc toj nat ic'ot li Saule; ta puru snecub no'ox xpaj scotol li yantique.

²⁴ Li Samuele jech laj yalbe scotolic: —¿Me laj avilic ti laj xa st'ujboxuc jun ajvalil avu'unic li Muc'ul Diose? Me junuc mu'yuc boch'o xco'laj xchi'uc li Saule —xut. —Toj lec li ajvalil cu'uncutique —xiic scotolic.

²⁵ Li Samuele lic yaptabe ya'yic li mantaletic sventa ajvalile xchi'uc la sts'iba ta vun; te la stic' ta xch'ulna Muc'ul Dios. Li Samuele lic yalbe ti xu' xa ac'o suticuc batel ta snaique.

²⁶ Jech ec li Saule isut batel ta sna te ta Gabaa. Ibat xchi'in jayibuc viniquetic ti lec tsots yo'ntonic ta sventa pleitoe yu'un itijbat yo'ntonic yu'un Dios.

²⁷ Pero oy jayibuc chopol yo'ntonic jech laj yalic: “¿Me yu'un ja' xu' yu'un chiscoltautic le'e?”, xiic. Jech muc xich'ic o lec ta muc', pero li Saule mu'yuc c'usi laj yal.