1 Reyes 9 - Bible in Tzotzil de Chenalhó with Deuterocanon

Li Salomone oy c'usi la xchapanic xchi'uc Dios

¹ C'alal ivu' yu'un spasbel xch'ulna Muc'ul Dios li Salomone, xchi'uc li spasubmantal stuque, xchi'uc scotol li c'usitic oy ta yo'nton tspase,

² li Muc'ul Diose laj yac' sba ta ilel xchibal velta ta stojol li Salomón jech chac c'u cha'al laj yac' sba ta ilel ta stojol te ta Gabaone.

³ Jech i'albat: “Laj ca'ay li ac'op c'alal laj ac'opanune xchi'uc li c'usi laj ac'anbune. Laj xa jts'u'iltas li ch'ulna laj apase yu'un ja' li' chcac' ta ich'el o ta muc' jbi scotol c'ac'al. Li' oy o jsat; li' oy co'nton scotol c'ac'al.

⁴ Me lec chapas aba ta jtojol jech chac c'u cha'al la spas li David, ja' li atote, me jun avo'nton chach'un li c'usitic calojbote xchi'uc me ja' chapasilan o batel li mantaletic, li chanubtaseletic cu'une,

⁵ ta xcac' ti j'ech'el chcom o ta atojol li abtel sventa ajvalilal te ta stojol achi'iltac ta israelal jech chac c'u cha'al laj calbe li Davide, ja' li atote. Laj ono'ox calbe ti ja' no'ox smomnich'nabtac tspas mantal te ta stojol li israeletique.

⁶ Pero me chavoc' abaic ta jtojol achi'uc li anich'nabe, me mu xach'unic li jmantaltac calojboxuque, me ja' chbat avich'ic ta muc', me ja' chlic tunanic yu'un li yantic diosetique,

⁷ ta jloq'uesoxuc batel li' ta banamil ti bu cac'ojboxuque, xchi'uc ta jloq'ues batel li ch'ulna ti ts'u'iltasbil cu'une. Ta xlic slabanoxuc yantic lumetic.

⁸ Li ch'ulna ti lec ich'bil ta muq'ue ta to xlic slabanic li boch'otic li' chjelovique. Toj ch'ayel chc'ot yo'ntonic jech chalic: ‘¿C'u yu'un jech la spasbe Muc'ul Dios li banamil li'i xchi'uc li ch'ulna li'i?’, xut sbaic.

⁹ Jech chtac'ov li yane: ‘Ja' ta scoj ti la scomtsanic yich'el ta muc' li Muc'ul Dios yu'unic ti iloq'uesat tal ta Egipto li smoltotic ta vo'onee, yu'un ja' bat yich'ic ta muc' li yantic diosetique; ja' lic tunicuc yu'un. Ja' yu'un jech i'ac'bat tsots svocolic yu'un li Muc'ul Diose’, xut sbaic”, x'utat yu'un Muc'ul Dios li Salomone.

Li Salomone oy c'usitic yan la spas

¹⁰ Li Salomone ta jtob (20) jabil ic'ot ta meltsajel yu'un li ch'ulna yu'un Muc'ul Diose xchi'uc li spasubmantale.

¹¹ Li te'etic itune ja' li ch'ut te' xchi'uc li c'uc'toje xchi'uc ti c'u yepal c'anal taq'uin la sc'ane ja' laj yac' li Hiram, ajvalil ta Tiroe. Jech ec li Salomone laj yac'be jtob (20) lumetic te ta yosilal Galilea li Hirame.

¹² Li Hirame bat sq'uel li lumetic ti i'ac'bat yu'un Salomone, pero mu'yuc lec laj yil,

¹³ jech laj yal: “¿C'usi stu cu'un li lumetic laj avac'bune, quits'in?”, xut. Ja' yu'un li banamil te yo' bu oy lumetique Cabul la sbiin; ja' jech sbi o c'alal to tana.

¹⁴ Li c'u yepal c'anal taq'uin la stacbe batel Salomón li Hirame ja' oxmil kilo xchi'uc baluneb ciento xchi'uc oxvinic (3,960).

¹⁵ Li razón yu'un Salomón ti isujvan ta abtel sventa laj yich' pasel li xch'ulna Muc'ul Diose, xchi'uc li spasubmantale, xchi'uc li sbut'benal amaq'ue, li coralton yu'un Jerusalene, xchi'uc li lumetic Hazor, Meguido, xchi'uc Gezere, ja' jech chac li'i:

¹⁶ Li Faraón ajvalil ta Egiptoe, bat stsal li lum Gezere. La xchic' comel, la smil comel noxtoc scotol li cananetic te nacalique. Li lume ja' laj yac'be smotonin li stsebe, ja' li yajnil Salomone.

¹⁷ Ja' yu'un li Salomone lic xcha'va'an li lum Gezer, li Bet-horón ta olone,

¹⁸ li Baalat xchi'uc li Tamar ta xocol banamil te ta Judae.

¹⁹ Xchi'uc la xcha'va'an noxtoc li lumetic snail ve'liletic yu'unique, xchi'uc li lumetic snail caretaetic sventa pleitoe, xchi'uc li lumetic sventa ca'etique, xchi'uc scotol li c'usitic oy ta yo'nton la spas te ta Jerusalén, ta Líbano, xchi'uc ta scotol yosilal ti c'u smuc'ul sventainoje.

²⁰ Scotol li yanlumetic te nacajtic ta yosilalique ja' li amorretic, hetetic, ferezetic, hevetic, xchi'uc jebusetic ti mu ja'uc israeletique,

²¹ ti ja'ic smomnich'nabtac li boch'otic te icomic ti muc xlaj smilic li israeletique, i'ac'bat spasic tsots abtel yu'un li Salomone. Ja' jech oyic o c'alal to tana.

²² Yan li israeletique muc xac'be yabtelic jech chac c'u cha'al mozo. Ja' no'ox laj yac' ochicuc ta soldadoil, ta yaj'abteltac, ta banquilaletic, ta banquilal soldadoetic, xchi'uc ta sventainel caretaetic xchi'uc ta sventainel soldadoetic cajajtic ta ca'.

²³ Li jpasmantaletic ta sventa li abteletic yac'oj Salomone ja' o'lol svaquibal ciento (550). Le'e ja' oy ta sventaic chalic mantal c'usi abtelal tsc'an pasel.

²⁴ Li stseb Faraone iloc' batel ta Lum yu'un David, ijelov batel ta sna ti bu ipasbat yu'un Salomone. Jech li Salomone lic tsmeltsanbe lec li sbut'benal amaq'ue.

²⁵ Li Salomone oxib velta ta jujun jabil laj yac' chic'bil matanal xchi'uc milbil matanal ta sventa lec ch-ilatic yu'un li Muc'ul Diose. Ja' te laj yac' ta scajleb ti laj yac' ta pasel ta sventa Muc'ul Diose. Xchi'uc la xchic' pom ta stojol li Muc'ul Diose. Ja' jech la spas ti c'alal meltsajem xa'ox yu'un li ch'ulnae.

²⁶ Li ajvalil Salomone la spas noxtoc barcoetic te ta lum Ezión-geber ta nopol lum Elat ta ti' Tsajal Nab te ta yosilal Edom.

²⁷ Li Hirame la stac batel ta barcoetic li j'abteletic yu'une, ja' li boch'o lec sna'ic abtel ta nab, xchi'uc li boch'otic lec xotquinic li nabe. Ja' co'ol bat xchi'inic li j'abteletic yu'un Salomone.

²⁸ Te ic'otic ta Ofir. Ja' te la staic tal jutuc mu chanlajunmiluc (14,000) kilo c'anal taq'uin; laj yich'beic batel li Salomone.