1 Reyes 7 - Bible in Tzotzil de Chenalhó with Deuterocanon

Yantic na la sva'an Salomón

¹ Li Salomone lic spas sna stuc. Ja' ta oxlajuneb (13) jabil imeltsaj yu'un.

² La spas noxtoc li spasubmantal “Toyolaltic ta Líbano” sbi. Ja' vo'ob yoxvinic (45) metro snatil, o'lol yoxibal xcha'vinic metro (22 1/2) sjamalil. Ja' o'lol xchanlajunebal metro (13 1/2) stayalil. Ja' chanchol ac'bil yoyal ta puru ch'ut te'. Ja' te cajajtic sts'amte'al, ta puru ch'ut te' noxtoc.

³ Li ts'amte'etique ja' vo'ob yoxvinic (45) ta scotol. Oxchol ac'bil; li jujuchole yich'oj vo'lajuntel. Ja' te cajajtic ta oyetic. Ta sba li ts'amte'etique macbil ta tenalte'etic ta puru ch'ut te'.

⁴ Xchi'uc pasbil oxchol sventanail. Ja' ta ox-ox stsacoj sba, xchi'uc lec sq'uelojan sbaic ta jujujot.

⁵ Scotol li macnaetic xchi'uc li ventanaetique co'ol sjamalil ta set. Ja' oxchol pasbilic; lec sq'uelojan sbaic ta jujujot.

⁶ Xchi'uc la spasbe stentenail; ep yoyaltac laj yac'be. Ja' o'lol yoxibal xcha'vinic metro (22 1/2) snatil; ja' o'lol xchanlajunebal metro (13 1/2) sjamalil. Ta yelovale la spasbe yan stentenail, oy xa smac sjol laj yac'be, xchi'uc oy ep yoyaltac noxtoc.

⁷ Jech noxtoc la spas jun muc'ta yut na sventa bu ta xchapanvan. Li stentenaile la smac lec ta tenalte'. Pasbil ta ch'ut te' li spisoal xchi'uc sjole.

⁸ Li spasubmantal bu nacal li Salomone oy stentenail ta spat, xchi'uc jun sala jmoj snitoj sbaic. Xchi'uc la spas yan na ta sventa yajnil, ja' li stseb Faraone. Ja' co'ol x'elan pasbil yu'un ta scotol.

⁹ Scotol li abtel laj yich' pasel ti xlic ta snacleb xchi'uc c'alal ta sjole ja' ta puru lequil anbil tonetic ti toyolic stojole; lec parejo snatil tuch'bilic ta sierra, ja' co'ol jech pasbil ta yut xchi'uc ta spat.

¹⁰ Li snaclebtaque puru lequil tonetic ti toyolic stojole xchi'uc lec muc'tic. Oy ta o'lol yo'bal metro snatil; oy ta oxib metro xchi'uc ch'ix snatil.

¹¹ Te xlic batel c'alal ta toyole jech ta puru lequil tonetic pasbil o. Co'ol smuc'tiquil anbil, xchi'uc ac'bil ch'ut te'etic noxtoc.

¹² Ta sti'ti' li muc'ta amaq'ue ac'bil oxcoj anbil tonetic xchi'uc jcoj natil ts'amte'etic ta puru ch'ut te'. Ja' jech pasbil noxtoc li yamaq'uil ta yut ch'ulna yu'un Muc'ul Diose xchi'uc li stentenail ta yochebale.

Li Salomone oy c'usi la xchapanic xchi'uc Hiram

¹³ Li ajvalil Salomone la stac ta iq'uel li Hiram te oy ta Tiroe.

¹⁴ Li Hirame ja' yol jun me'on ants liquem ta jchop yu'un Neftalí. Yan li stote ja' te voq'uem ta lum Tiro. Ja' yabtel ta x'abtej ta bronce taq'uin. Li Hirame toj ep sbijil, toj lec sna' spasel c'usiuc no'ox ta bronce taq'uin, jech te tal spas yabtel ta stojol li Salomone.

¹⁵ La spas chib oy, unijesbil ta bronce taq'uin. Ja' vaxquib metro snatil xchi'uc o'lol svaquibal metro syijil.

¹⁶ Xchi'uc la spas yan chib xlechlechil sjol li oyetique. Ta bronce taq'uin la spas; ja' te laj yaq'uic ta sjol li oyetique. Ja' chib metro xchi'uc oxch'ix xchi'uc oxc'ob snatil.

¹⁷ Xchi'uc la spas chib chajchajtaq'uin jalbil jech chac c'u cha'al cadena sventa li chib xlechlechil sjol oyetique: jujun xchajchajtaq'uinal li jujun sjol oye.

¹⁸ La spas cha'chol sloc'obal caranatoetic ta joyob li sti'ti' chajchajtaq'uine; ja' sventa lec macal o li sjol oye. Ja' jech la spas ta xchibal oy.

¹⁹ Li xlechlechil sjol oyetic ta stentenail ch'ulnae jutuc mu chibuc metro snatil. Ja'tic jech loc'tabil jech chac c'u cha'al campano nichim.

²⁰ Ta slajeb xa xlechlechil sjol li chib oye, ja' ti bu ven xa muc' lechleche xchi'uc ti volvole, ja' te ac'bil chib ciento (200) ta bej sloc'obal caranatoetic ta joyob, cha'chol ac'bil.

²¹ Li oyetic le'e te la sva'anan ta stentenail ch'ulna li Hirame. C'alal la sva'an li jun ta bats'ic'obe, Jaquín laj yac'be sbi. C'alal la sva'an li jun ta ts'ete, Boaz laj yac'be sbi.

²² Ta sjol li oyetique laj yac'be li xlechlechil ti xco'laj xchi'uc campano nichime, jech ivu' yu'un o pasel li oyetique.

Sc'oplal c'usitic chtun ta ch'ulna

²³ Li Hirame la spas jun yavil vo' unijesbil ta bronce taq'uin; lec balbal la spas. Ja' o'lol yo'bal metro sjamalil li sti'e. Ja' chib metro xchi'uc cha'ch'ix xchi'uc oxc'ob li stayalile. Ja' o'lol xchanlajunebal metro li syijile.

²⁴ Ta joyob li yolon sti'e oy c'usi volajtic loc'tabil jech chac c'u cha'al ch'um; cha'chol ac'bil. Ja' lajlajuneb ac'bil ta cha'cha'ch'ix xchi'uc oxc'ob; jmoj stsacoj sba pasbil o xchi'uc li yavil vo'e.

²⁵ Li yav vo'e nacal ta sba lajcha'cot sloc'obal tot vacax pasbil ta bronce. Li vacaxetique oxcot sq'uelojic batel ta sloq'ueb c'ac'al; oxcot sq'uelojic batel ta smaleb c'ac'al; oxcot sq'uelojic batel ta norte; oxcot sq'uelojic batel ta sur. Li yacanique ja' tic'ajtic batel ta yut; ja' te nacal o li yavil vo'e.

²⁶ Li yav vo'e jpach'lej li spimile. Li sti'e ja' jech pasbil jech chac c'u cha'al snacleb campano nichim. Ja' chanib yoxvinic ta mil (44,000) litro xbelin.

²⁷ Xchi'uc la spasbe lajuneb snaclebtac ta bronce taq'uin. Li jujune ja' jun metro xchi'uc chanch'ix snatil; ja' jech sjamalil noxtoc. Li stayalile ja' jun metro xchi'uc jch'ix xchi'uc jch'utub.

²⁸ Li snaclebtaque ja' jech pasbil chac li'i: Oy xlechlechil lec lats'bilic ta te'.

²⁹ Te ta sba li xlechlechil ti lec lats'bilique, te pasbil sloc'obal leonetic, tot vacaxetic, xchi'uc sloc'obal querubinetic. Te ta yac'ol xchi'uc ta yolon yo' bu loc'tabil li leonetic xchi'uc vacaxetique lec c'upil sba pasbil, loc'tabil setset nichimetic.

³⁰ Li snaclebtaque oy chanib yacan lec xjoytejoyte, pasbil ta bronce, xojajtic lec ta ste'el sventa chanov o. Ta xchanjotal xchiquin ac'bil yan taq'uin sventa lec tsots c'otem o li yacantaque. Ja' jech pasbil jech chac c'u cha'al setset nichim.

³¹ Li sti' yav vo' tiq'uil ta scajonale jeloven muyel cha'ch'ix xchi'uc oxc'ob. Li sti'e ja' setset no'ox. Li xoc' snacleb yav vo' ta yut scajonale ja' oxch'ix xchi'uc chanc'ob snatil. Xchi'uc ta sti'e oy c'usi loc'tabil. Li scajonale ja' chanib stselo pasbil, muc balbaluc.

³² Li chanib yacan ta yolon bu lechajtic ta jujujot xocone xchi'uc li ste'el bu xojol o yacantaque ja' co'ol stsacoj sba xchi'uc li snaclebe. Li yacantaque ja' oxch'ix xchi'uc jch'utub stayalil.

³³ Ja' co'ol pasbil jech chac c'u cha'al yacan careta. Li ste'el bu xojol o yacane, li xotxot taq'uinal yacane xchi'uc li yan taq'uinetic sventa yacane ja' pasbilic ta bronce taq'uin.

³⁴ Li chanib taq'uin ac'bil ta xchiquin sventa lec tsots c'otem o yacantaque jmoj stsacoj sba pasbil ta scotol.

³⁵ Ta sti'e ac'bil yan jcoj xotxot taq'uin; ja' jch'ix xchi'uc jbej c'ob stayalil. Li smac ta jujujot xocon scajonale xchi'uc li sti'e jmoj stsacoj sba pasbil.

³⁶ Li Hirame la spas sloc'obal querubinetic, leonetic, xchi'uc xanetic te ta jujujot xocon c'alal ta xlechlechil sti'; ja' ti c'u smuc'ul x'och jujune, xchi'uc la spasbe sloc'obal setset nichimetic ta joyob.

³⁷ Ja' jech x'elan la spas slajunebal li snaclebtaque. Ta puru unijesbil taq'uin la spas, co'ol smuc'tiquil.

³⁸ La spas noxtoc yan lajuneb yav vo'etic. Li jujune ja' jun metro xchi'uc chanch'ix. Ja' vaxquib ciento xchi'uc chanvinic (880) litro xbelin. Jujun laj yich' nacanel ta lajuneb snacleb.

³⁹ Vo'ob snacleb ac'bil ta jot xocon ch'ulna ta bats'ic'ob; vo'ob ac'bil ta jot xocon ch'ulna ta ts'et. Yan li jun muc'ta yav vo'e ja' te laj yich' aq'uel ta jot xocon ch'ulna ta bats'ic'ob ta xocon sloq'ueb c'ac'al ta sur.

⁴⁰ Li Hirame la spas noxtoc binetic, palaetic, xchi'uc muc'tic tazaetic. Jech ivu' o yu'un spasel scotol li abtel ti la sc'an pasbel Salomón ta sventa li ch'ulna yu'un Muc'ul Diose.

⁴¹ Ja' li chib oyetique, li xlechlechil sjol oyetique, li chajchajtaq'uinetic sventa smac sjol oyetique,

⁴² xchi'uc li chanib ciento (400) ta bej sloc'obal caranatoetic sventa li chib chajchajtaq'uinetique. Ja' cha'chol caranatoetic laj yich' li jujun chajchajtaq'uine. Ja' sventa tsmac o li xlechlechil sjol chib oyetique,

⁴³ xchi'uc li lajuneb yav vo'etique, xchi'uc li lajuneb snaclebtaque,

⁴⁴ li muc'ta yav vo'e, li lajuneb sloc'obal tot vacaxetic snaclebinoje,

⁴⁵ li binetique, li palaetique, xchi'uc li muc'tic tazaetique. Scotol li c'usitic la spasbe Salomón Hiram ta sventa ch'ulna yu'un Muc'ul Diose ta puru bronce taq'uin, lec ts'abbil la spas.

⁴⁶ Li ajvalile ja' te la spas ta smorteal pasbil ta chablum ta stenlejaltic ta uc'um Jordán ti cacal ta o'lol yu'un li lum Sucot xchi'uc lum Saretane.

⁴⁷ Bats'i ep li c'usitic laj yich' pasel ta broncee. Li Salomone mu'yuc xa sc'oplal laj ya'ay ti ac'o yich' bisel c'u yalale.

⁴⁸ Jech noxtoc laj yac' ta pasel scotol li c'usitic yan chtun te ta ch'ulna yu'un Muc'ul Diose: ja' li scajleb smoton Dios pasbil ta c'anal taq'uine, li mexa pasbil ta c'anal taq'uin sventa te chich' aq'uel li pan ta stojol Muc'ul Diose,

⁴⁹ li candelero pasbil ta c'anal taq'uin ti vo'ob oy ta bats'ic'ob, vo'ob ta ts'et, te ta yeloval bats'i lequil ch'ul cuartoe xchi'uc li xnichtaque, li sluzaltaque, li stsacubiltac c'usitic tstsaquique,

⁵⁰ li svasoaltaque, li xtuch'ubiltac xmechaile, li muc'tic tazaetique, li muc'tic cucharaetique, xchi'uc li xchic'ubiltac pome. Ja' ta puru c'anal taq'uin pasbil scotol. Li stsacleb smac bats'i lequil ch'ul cuartoe xchi'uc li stsacleb smac ch'ulnae ja' ta c'anal taq'uin pasbil.

⁵¹ C'alal ivu' spasel scotol li c'usitic laj yac' ta pasel Salomón ta sventa ch'ulnae, la stic' ochel scotol li c'usitic pasbil ta c'anal taq'uin xchi'uc ta saquil taq'uin ti voc'bil ono'ox ta stojol Muc'ul Dios yu'un Davide, ja' li stote. Te la stic' ta snail te ta ch'ulna.