1 Reyes 6 - Bible in Tzotzil de Chenalhó with Deuterocanon

Lic sva'an ch'ulna li Salomone

¹ C'alal stsacoj xa'ox chanib jabil yochel ta ajvalilal ta Israel li Salomone, lic sjapu sva'anel li ch'ulnae. Ja' ta xchibal u yochel li xchanibal jabile, ja' li Zif sbie. Oy xa'ox ta chanib ciento xchi'uc chanvinic (480) jabil sloq'uelic tal ta Egipto li israeletique.

² Li xch'ulna Muc'ul Dios la spas ajvalil Salomone ja' vucub cha'vinic (27) metro li snatile; ja' baluneb metro li sjamalile; ja' o'lol xchanlajunebal metro li stayalile.

³ Li yeloval ti'ch'ulnae oy stentenail. Ja' baluneb metro snatil jech chac c'u cha'al sjamalil li ch'ulnae. Li sjamalile ja' o'lol yo'bal metro.

⁴ Li Salomone la spasbe sventanail li ch'ulnae. Ta yute lec muc'; ja' biq'uit xa xloc' ta spat.

⁵ Jech noxtoc la spas yan jc'ol na ta joyob te no'ox stsacoj sba xchi'uc li ch'ulnae; ep ta c'ol cuartoetic la spas.

⁶ Oxcoj yut la spasbe. Li sba cojale ja' chib metro xchi'uc jch'ix xchi'uc oxc'ob sjamalil li yute. Ta xcha'cojale ja' chib metro xchi'uc o'lol xchanch'ix sjamalil, li yoxcojale ja' oxib metro xchi'uc jch'utub sjamalil. Yu'un li ch'ulnae quechajtic pasbil ta joyob ta spat xocon ta sventa bu chcaji li sts'amte'al c'alnae, jech mu persauc la svomic ochel li spac'benal ch'ulnae.

⁷ C'alal la spasic li ch'ulnae, ja' la stunesic li tonetic ti lec xa meltsajemique, jech mu'yuc xa junuc abtejebal itun yu'unic, me martillo, me eq'uel, me xtuch'ubil tsatsal taq'uin. Mu'yuc xa c'usi xbac' o.

⁸ Li sti' na ta sba cojal jolnae ja' te xcom ta jot xocon ch'ulna ta bats'ic'ob. Xchi'uc c'alal chmuyic batel ta xcha'cojal ta yoxcojale oy jun tec'ubal pasbil; sts'ototet chmuy batel.

⁹ C'alal iva'i xa yu'un spac'benal ch'ulna li Salomone, laj yac'be sts'amte'altac, xchi'uc la smac ta ch'ut te'etic.

¹⁰ Xchi'uc la spas noxtoc li jc'ol na ti stsacoj sba xchi'uc li ch'ulnae; ja' chib metro xchi'uc jch'ix xchi'uc oxc'ob stayalil. Li sts'amte'altaque te cajajtic ta spat ch'ulna ti bu quechajtic pasbile; ja' puru ch'ut te'.

¹¹ Ja' yu'un li Muc'ul Diose la sc'opan li Salomone, jech laj yalbe:

¹² “Ta sventa ti abats'il xa spasel li ch'ulnae, jech chacalbot: Me ja' chach'un li chanubtaseletic cu'un xchi'uc li c'usitic yan caloje, me ja' chapasilan o batel li mantaletic cu'une, ta xcac' c'otuc ta pasel c'usi laj calbe ta aventa li Davide, ja' li atote.

¹³ Jech te oyun o ta stojol li achi'iltaque; mu'yuc ta jcomtsan o li jun lum Israele, ja' li jnich'nabtaque”, x'utat li Salomone.

¹⁴ Li Salomone ivu' yu'un spasel li ch'ulnae.

¹⁵ La xpix lec ta ch'ut te' scotol li spac'benal ta yute. Xchi'uc la smac lec ta tenalte' li sjole. Li spisoale la smac ta tenalte' noxtoc pasbil ta c'uc'toj.

¹⁶ Jech noxtoc li jun cuarto ta slajeb xa yut ch'ulnae la xpix ta tenalte' pasbil ta c'uc'toj xlic ta banamil c'alal to ta sjol. Ja' baluneb metro snatil. Ja' li bats'i lequil ch'ul cuartoe.

¹⁷ Li yut ch'ulna ta yeloval lequil ch'ul cuartoe ja' vaxaclajuneb (18) metro snatil.

¹⁸ Li spac'benal ta yute ta puru ch'ut te' laj yich' maquel o; pasbil sloc'obal nichimetic xchi'uc te'tical ch'umetic. Puru ch'ut te' scotol, jech mu jbejuc ton xvinaj.

¹⁹ Lec c'upil sba la spas li bats'i lequil ch'ul cuarto te ta yut ch'ulnae yu'un ja' te chac' li xcaxail smantal Muc'ul Diose.

²⁰ Li bats'i lequil ch'ul cuarto te ta yut ch'ulnae ja' baluneb metro snatil, baluneb metro sjamalil xchi'uc baluneb metro stayalil. La xpix lec ta bats'i c'anal taq'uin li yute. Jech noxtoc la xpix ta c'anal taq'uin li scajleb smoton Dios pasbil ta ch'ut te'e.

²¹ Li Salomone la xpix lec ta c'anal taq'uin noxtoc li yut ch'ulnae xchi'uc li bats'i lequil ch'ul cuartoe. Te ta yelovale laj yac' cadenaetic pasbil ta c'anal taq'uin.

²² Ja' jech la xpix ta c'anal taq'uin scotol li yut ch'ulnae xchi'uc li scajleb smoton Dios te oy ta yeloval bats'i lequil ch'ul cuartoe.

²³ La spas noxtoc chib sloc'obal querubinetic te ta yut li bats'i lequil ch'ul cuartoe; ja' ta oliva te' la spas. Ja' o'lol yo'bal metro snatil li jujune.

²⁴ Li jujun xic' querubinetique ja' chib metro xchi'uc jch'ix xchi'uc oxc'ob. Ta xcha'jotal xiq'uique ja' o'lol yo'bal metro ta scotol; xlic ta jot sni' xic' c'alal to ta yan jot sni' xic'.

²⁵ Li xchibal sloc'obal querubinetique ja' co'ol snatil pasbil li xiq'uique; ja' o'lol yo'bal metro snatil xchi'uc co'ol x'elan pasbilic.

²⁶ Li snatile ja' o'lol yo'bal metro; ja' jech chac c'u cha'al li yane.

²⁷ Li Salomone te laj yac' ta yut ch'ulna ta bats'i lequil ch'ul cuarto li sloc'obal querubinetique. Lich'ajtic li xiq'uique, li jujun sni' xiq'uique t'ixajtic ta jujujot spac'benal na. Yan li jujun sni' xiq'uique snupojbe sbaic.

²⁸ La xpix lec ta c'anal taq'uin li sloc'obal querubinetique.,

²⁹ Scotol li spac'benal ta spat xocon ch'ulna xchi'uc ta yute laj yac' ta loc'tael sloc'obal querubinetic, sloc'obal xanetic, xchi'uc sloc'obal nichimetic.

³⁰ La xpix lec ta c'anal taq'uin noxtoc li spisoal ta yut, xchi'uc ta spat xocone.

³¹ Li smac sti'e ja' ta oliva te' la spas. Li smarcoal xchi'uc li stsacleb ta jujujote vo'ob stselo pasbil.

³² Xcha'jotal macna ta puru oliva te' pasbil, xchi'uc pixbil ta c'anal taq'uin. Xchi'uc loc'tabil sloc'obal querubinetic, sloc'obal xanetic, xchi'uc sloc'obal nichimetic; pixbilic lec ta c'anal taq'uin noxtoc.

³³ Ta sventa li stsaclebtac smaque ja' ta oliva te' pasbil noxtoc, xchi'uc chanjot stselo.

³⁴ Li xcha'c'olal macnae ja' pasbil ta c'uc'toj. Xcha'pechel lec xvelte-velte pasbil.

³⁵ La spasbe sloc'obal querubinetic, xanetic, xchi'uc nichimetic. La xpix ta jayal c'anal taq'uin.

³⁶ Li stentenail ch'ulnae la set ta ton. Ja' oxcoj laj yac' anbil tonetic, xchi'uc jcoj laj yac' natiquil ch'ut te'.

³⁷ Ta xchanibal jabil yochel ta ajvalilal li Salomón ta yual Zife, ja'o lic yaq'uic li snacleb ch'ulna yu'un Muc'ul Diose.

³⁸ Ta xbuluchibal jabil ta yual Bul, ja' li xvaxquibal ue, ivu' yu'unic spasel li ch'ulnae xchi'uc scotol li c'usitic te chtune. Ja' ta vucub jabil ic'ot ta meltsajel yu'un li Salomone.