1 Reyes 5 - Bible in Tzotzil de Chenalhó with Deuterocanon

Oy c'usi laj xchapanic li Salomón xchi'uc Hiram, ajvalil ta Tiroe

¹ C'alal laj ya'ay Hiram, ajvalil ta Tiro, ti t'ujbil xa ta ajvalilal li Salomón sventa ch-och ta xq'uexol stot ja' li Davide, la stac batel yaj'abteltac ta stojol li Salomone yu'un lec ono'ox chil sbaic xchi'uc li David c'alal cuxul to'oxe.

² Li Salomone jech laj yalbe batel ec li Hirame:

³ “Li jtote, lec xana' ti muc xu' yu'un la spasbe xch'ulna li Muc'ul Diose, ja' li Dios yu'une, yu'un toj ep ital contrainatuc yu'un li yajcontrataque, ja' to ti c'alal i'ac'bat stsal scotol yu'un li Muc'ul Diose.

⁴ Li' ta orae laj xa spajes pleito li Muc'ul Dios cu'une; mu'yuc xa boch'o chtal scontrainun ta jujujot. Mu'yuc xa cajcontra, mu'yuc xi'el chca'ay.

⁵ Ja' yu'un li' ta orae jnopoj xa ta jpasbe xch'ulna li Muc'ul Dios cu'un jech chac c'u cha'al yalojbe ono'ox li jtote, jech laj yalbe: ‘Li jun anich'on ta xcac' chotluc comel ta aq'uexole ja' ta spasbun jch'ulna’, xut.

⁶ Ja' yu'un alo mantal ti ac'o xtuch'bicun li ch'ut te'etic te ta Libanoe. Li j'abteletic cu'une xu' ta xtal scoltaic ec li j'abteletic avu'une. Xchi'uc ta jtoj ti c'u yepal chac'anbe stojolic jujun c'ac'ale, yu'un xana' ti mu'yuc boch'o jech sna'ic yaanel te'etic cu'uncutic jech chac c'u cha'al li sidonetique”, xut batel.

⁷ C'alal laj ya'ay Hiram c'usi laj yal li Salomone, toj xcuxet ic'ot yo'nton, jech laj yal: “¡Ich'biluc ta muc' li Muc'ul Dios li' ta orae yu'un laj yac'be jun xnich'on David ti toj ech'em sbijile, yu'un jech xu' yu'un ta sventain li jun muc'ta lum le'e!”, xi.

⁸ Li Hirame jech laj yalbe batel li Salomone: “Laj xa ca'ay li c'usi laj avalbun tale. Xu' ta jpasbot scotol c'u x'elan chac'an li ch'ut te'e xchi'uc li c'uc'tojetique.

⁹ Li j'abteletic cu'une xu' ta xlic yich'ic batel ta Líbano c'alal to ta nab. Vu'un ta xcal mantal ti ac'o sjelubtasic tal ta sjelubtasubil ta nabe. Te to ac'o yaq'uic ti bu chac'ane. Te ac'o stitunic comel; xu' xa te xtal avich'ic. Ja' no'ox c'otuc ta pasel avu'un li c'usi ta jc'ane, ja' ti chavac'bun tal jve'elcutic te ta jpasubmantale”, xut.

¹⁰ Ja' yu'un li Hirame laj yac'be Salomón scotol li ch'ut te'e, xchi'uc li c'uc'toj ti c'u yepal la sc'ane.

¹¹ Li Salomone laj yac'be batel sve'elic li Hiram te ta spasubmantale: ja' buluchvinic (220,000) ta mil anmul li trigoe, xchi'uc chanmil xchi'uc chanib ciento (4,400) litro sbats'i aceiteal oliva. Ja' jech laj yac' ta jujun jabil li Salomone.

¹² Li Salomone ja' jech i'ac'bat sbijil yu'un Muc'ul Dios jech chac c'u cha'al albil ono'oxe. Li Hiram xchi'uc Salomone la spas ta co'ol yo'ntonic, jech mu'yuc la tscontrain sbaic o.

¹³ Li ajvalil Salomone laj yal mantal ti ac'o abtejicuc scotol li israeletique. Ja' la sta lajuneb xcha'vinic ta mil (30,000) ta scotol.

¹⁴ Le'e ja' te laj yich'ic taquel batel ta Líbano. Ja' ta lajlajunmil (10,000) chich'ic taquel batel ta jujun u. Jun u te oyic o ta Líbano; chib u chtal ta snaic jujuvoc'. Li boch'o yich'oj yabtel tsq'uel li coman abtele ja' Adoniram sbi.

¹⁵ Li Salomone xchapanoj lajuneb xchanvinic ta mil (70,000) j'icatsnometic, xchi'uc chanvinic ta mil (80,000) j'anaejtonetic ta te'tic.

¹⁶ Ja' mu'yuc atbil li oxmil xchi'uc oxib ciento (3,300) capuraletic tsq'uelic j'abteletique.

¹⁷ Li ajvalile laj yal mantal ti ac'o sloq'uesic muc'tic tonetic ti toyolic stojole xchi'uc anbil tonetic, yu'un chtun ta sventa snacleb li ch'ulnae.

¹⁸ Li alvaniletic yu'un Salomone, xchi'uc li alvaniletic yu'un Hirame, xchi'uc li viniquetic talemic ta Gebale la xchapanic lec li te'etique, xchi'uc laj yajanic lec li tonetic sventa chich' pasel o ch'ulnae.