1 Reyes 4 - Bible in Tzotzil de Chenalhó with Deuterocanon

Li Salomone lic spas yabtel

¹ Li Salomone ja' ajvalil yu'un scotol li israeletique.

² Li j'abteletic yu'une ja'ic li'i: Azarías, xnich'on pale Sadoc;

³ Elihoref xchi'uc Ahías, xnich'nab Sisa, ja' tsts'ibaic li c'usitic chc'ot ta pasele; xchi'uc Josafat, xnich'on Ahilud, ja' jts'ibajom yu'un li ajvalile;

⁴ Xchi'uc Benaía, xnich'on Joiada, ja' li banquilal soldadoe; xchi'uc Sadoc xchi'uc Abiatare ja' paleetic.

⁵ Li Azarías, xnich'on Natane, ja' banquilal yu'un jpasmantaletic; li Zabud, xnich'on pale Natane, ja' tscolta ta snopel c'usi tspas li ajvalile.

⁶ Li Ahisare ja' chchabibe spasubmantal li ajvalile; li Adoniram, xnich'on Abdae, ja' yich'oj yabtel sventa coman abtel.

⁷ Li Salomone oy yan lajchab (12) j'abteletic yu'un ta scotol li israeletique, yu'un ja' ta sq'uelic c'u x'elan ta xve' xchi'uc yajnil xnich'nab li ajvalile. Li jujunique jun u ta jun jabil la sventainic c'u x'elan chve' li ajvalile.

⁸ Li yan lajchab (12) j'abteletique ja' jech sbiic: Ben-Hur, ja' la sventain ta vitsetic yu'un Efraín;

⁹ Ben-decar, ja' la sventain Macaz, Saalbim, Bet-semes, Elón xchi'uc Bet-hanán;

¹⁰ Ben-Hesed, ja' la sventain Arubot, Soco xchi'uc scotol yosilal Hefer;

¹¹ Ben-Abinadab, ja' la sventain yosilal Dor; li yajnile Tafat sbi, ja' stseb li Salomone;

¹² Baana, xnich'on Ahilud, ja' la sventain Taanac, Meguido xchi'uc scotol Bet-seán ti sts'aquinoj sbaic xchi'uc Saretán ti olon to xcom yu'un Jezreele. Te xlic ta Bet-seán c'alal to ta Abel-mehola ta jelovel Jocmeame;

¹³ Ben-Geber, liquem ta Ramot ta yosilal Galaad, ja' la sventain li tsobtsobnaetic ta yosilal Galaade ti ja' yu'un li Jair, xnich'on Manasese. Xchi'uc ja' la sventain yosilal Argob te ta Basán ti bu oy oxvinic (60) muc'tic lumetic setbilic lec ta coraltonetique xchi'uc ti pasbilic lec ta bronce taq'uin smaque;

¹⁴ Ahinadab, xnich'on Ido, ja' la sventain li Mahanaime;

¹⁵ Ahimaas, ja' ti laj yic' sbaic xchi'uc Basemat, stseb Salomone, ja' la sventain li Neftalie;

¹⁶ Baana, xnich'on Husai, ja' la sventain Aser xchi'uc Alot;

¹⁷ Josafat, xnich'on Parúa, ja' la sventain Isacar;

¹⁸ Simei, xnich'on Ela, ja' la sventain Benjamín;

¹⁹ Geber, xnich'on Uri, ja' la sventain yosilal Galaad ja' li yosilal to'ox Sehón, ajvalil yu'un amorretique, xchi'uc Og, ajvalil to'ox ta Basane. Li Gebere ja' no'ox stuc banquilal te ta Galaad.

Li Salomone lec bij xchi'uc lec ibat yu'un c'usi la spas

²⁰ Te ta Judá xchi'uc ta Israele mu xa stac' atel c'u yepalic, jech chac c'u cha'al yi' ta ti'nab. Xchi'uc oy lec sve'elic, oy lec c'usi chuch'ic jech xcuxet no'ox yo'ntonic.

²¹ Li Salomone la sventain scotol li yantic ajvaliletic xlic ta uc'um Éufrates c'alal to ta yosilal filistaetic xchi'uc c'alal to ta sts'aquil yosilal Egipto. Te la stoj spatanic, xchi'uc la xch'unbeic smantal li Salomón ti jayib c'ac'al cuxule.

²² Li c'u yepal chich' ac'bel c'usi chtun yu'un jujun c'ac'al li Salomone ja' vacmil xchi'uc vaquib ciento (6,600) litro lequil arina, xchi'uc oxlajunmil xchi'uc chib ciento (13,200) litro yan arina noxtoc,

²³ lajuncot lec juben tot vacaxetic, jtob (20) ta cot tot vacaxetic ch'iemic ta puru vomoletic, xchi'uc vo'vinic (100) ta cot chijetic. Ja' mu'yuc atbil li te'tical chijetique, li gacela chijetique, li gamo chijetique xchi'uc li mutetic ti lec jubenique.

²⁴ Yu'un li Salomone sventainoj scotol li banamil ta smaleb c'ac'al yu'un li uc'um Éufrates xlic ta Tifsa c'alal to ta Gazae. Xchi'uc sventainoj scotol li ajvaliletic te ta banamil le'e, jech mu'yuc c'op cha'yic o ta sjoylejal li spat xocon yosilalique.

²⁵ Ti jayib c'ac'al cuxul li Salomone, lec jun yo'nton chcuxic ta yolon ts'usubtic yu'unic, xchi'uc ta yolon higo te' yu'unic scotol li jnaclumetic ta Judá xchi'uc ta Israel ti xlic ta Dan c'alal to ta Beersebae.

²⁶ Li Salomone oy yu'un chanmil (4,000) ca'etic sventa caretaetic, xchi'uc lajcha'mil (12,000) soldadoetic chcajiic ta ca'.

²⁷ Li j'abteletic laj xa yich' albel tal sc'oplalique ja' la sventainic o yac'bel c'usitic chtun yu'un li Salomone xchi'uc li boch'otic te co'ol chve'ic xchi'uque. Li jujunique jun u la sventainic. Laj yaq'uic persa ti ac'o mu'yucuc c'usi sc'an yu'un li ajvalile.

²⁸ La staquic tal noxtoc cebada, xchi'uc taqui te'el jobeletic sventa sve'el ca'etic, xchi'uc j'icatsnom ca'etic ti bu tsc'an ac'o staquic batel ti c'alal ja'o c'otem ta stojolic li abtel jujunique.

²⁹ Li Salomone ijambat lec yo'nton, i'ac'bat ep sbijil yu'un Dios jech chac c'u cha'al epal yi' ta ti'nab.

³⁰ Ja' no'ox stuc ven jeloven sbijil ta scotol li cristianoetic ta sloq'ueb c'ac'al xchi'uc ta Egiptoe.

³¹ Ja' no'ox stuc toj ech'em sbijil ta scotol cristiano. Ja' mu sta jech sbijilic li Etán, smomnich'on Zerae, xchi'uc li Hemán, li Cacol, xchi'uc li Darda, xnich'nab Mahole. Jech ipuc o sc'oplal ta jujun banamil te ta spat xocon li yosilalique.

³² Laj yal comel oxmil (3,000) ta voc' bic'tal chanubtasel. Jmil xchi'uc vo'ob (1,005) la spas q'uejintabil c'opetic noxtoc.

³³ Ja' laj yalbe o sc'oplal te'etic, xchi'uc ts'i'laletic, xchi'uc ch'ut te'etic ta vitsetic yu'un Líbano, xchi'uc c'alal ta ts'i'laletic chch'i ta c'alc'alna. Laj yalbe sc'oplal noxtoc chonbolometic, mutetic, chon ti xquilet ta banamil chanovique xchi'uc choyetic.

³⁴ C'alal laj ya'yic ti toj ech'em sbijil li Salomone, ital ya'yic scotol li ajvaliletic ta jujun banamil ti bu to c'alal ipuc sc'oplale.