1 Reyes 3 - Bible in Tzotzil de Chenalhó with Deuterocanon

Li Salomone laj yic'be stseb Faraón

¹ Li Salomone la smuni'an li Faraón, ajvalil ta Egiptoe, yu'un laj yic'be stseb. Te laj yic' batel ta Lum yu'un David ti c'alal mu'yuc to meltsajem yu'un li spasubmantale, xchi'uc li xch'ulna Muc'ul Diose, xchi'uc li coralton ta sjoylejal Jerusalene.

² Li israeletique te to chbat smilbeic smoton Dios ta toyol c'opojebaletic yo' bu laj yich'ic ta muc' sdiosic li cristianoetique, yu'un mu'yuc to'ox pasbil ch'ulna ta sventa li Muc'ul Diose.

Li Salomone la sc'an lec sbijil ta stojol Dios

³ Li Salomone jun yo'nton o ta stojol li Muc'ul Diose, xchi'uc la xch'un li mantal i'albat comel yu'un Davide, ja' li stote. Ja' no'ox te to bat yac' milbil matanaletic, te to bat xchic' pom ta toyol c'opojebaletic.

⁴ Xchi'uc te ibat ta Gabaón noxtoc, yu'un ja' no'ox stuc lec ich'bil ta muc' li toyol vits tee. Jech te la xchic' jmil (1,000) matanaletic ta scajleb li matanale.

⁵ Oy jun ac'ubal laj yac' sba ta ilel Muc'ul Dios ta xvayech li Salomón c'alal te oy ta Gabaone. Jech i'albat: “C'anbun li c'usi chac'ane chacac'bot”, x'utat.

⁶ Itac'ov li Salomone: “Li Davide, ja' li jtote, lec laj ac'uxubin, yu'un lec c'usitic la spas, xchi'uc jun yo'nton, tuc' yo'nton ta atojol. Ja' yu'un toj ep laj ac'uxubin, xchi'uc laj avac'be jun xnich'on ti ja' chchoti ta spasubmantal jech chac c'u cha'al c'otem xa ta pasel li' ta orae.

⁷ Muc'ul Dios, Dios cu'un, vo'ot laj avac' ochcun ta ajvalilal ta xq'uexol li Davide, ja' li jtote, ac'o me queremun to, ac'o me mu'yuc to quiloj c'uxi ta pasel.

⁸ Pero li' xa jventainoj li anich'nabtac ti t'ujbilic avu'une: ja' li jun lum ti bats'i epique, ti mu xlaj jna' c'u yepale, ti mu xlaj ta atele.

⁹ Ja' yu'un ac'bun jbijil yu'un jech xu' cu'un ta jventain lec li anich'nabe, xchi'uc jech xu' ta jna' bu lec, xchi'uc bu chopol. Yu'un mu'yuc boch'o xu' yu'un tsventain li anich'nabtac li'i ti bats'i epique”, xi li Salomone.

¹⁰ Li Muc'ul Diose toj lec laj ya'ay ti jech la sc'an sbijil li Salomone,

¹¹ jech laj yalbe: “Ta sventa ti jech laj ac'anbune, muc ja'uc xac'anbun ti jal chacuxie, ti ep ac'ulejale, xchi'uc ti ac'o chamuc li avajcontrataque; ja' no'ox laj ac'anbun ti ac'o oyuc lec abijil sventa chachapanvane.

¹² Ja' yu'un ta xcac'bot li c'usi laj ac'ane. Ta xcac'bot lec abijil. Mu'yuc boch'o jech staoj sbijil, xchi'uc mu'yuc boch'o jech tsta sbijil ta ts'acal ti c'u x'elan chacac'bote.

¹³ Xchi'uc ta xcac'bot li c'usi muc xac'ane. Ta xacac'bot ep ac'ulejal, xchi'uc chacac'ot lec ta ich'el ta muc'. Ti c'u yepal c'ac'al cuxulote mu'yuc boch'o yan jech ajvalil ta xtal jech chac c'u cha'al li vo'ote.

¹⁴ Me ja' chapas o li c'usi ta jc'ane, me chach'un scotol li mantaletic li chanubtaseletic cu'un jech chac c'u cha'al la spas li Davide, ja' li atote, ta xcac' ti jal chacuxie”, xi li Muc'ul Diose.

¹⁵ C'alal ijulov li Salomone, ja' to laj yil ti ta xvayeche. C'alal ic'ot ta Jerusalene, te ibat yo' bu oy li xcaxail smantal Muc'ul Diose. Te la xchic' matanaletic, xchi'uc la smil matanal sventa lec ch-ilat yu'un Dios. Ts'acal la spas lec q'uin; laj yic' ta ve'el li j'abteletic yu'une.

Toj lec ichapanvan li Salomone

¹⁶ Te italic chib jmulavil antsetic ta stojol li ajvalile.

¹⁷ Jech c'ot yal li june: —Ajvalil, vu'un xchi'uc li ants li'i jun jnacutic. C'alal la jcuxe, te oy li ants li'i.

¹⁸ C'alal yoxibal xa'ox c'ac'al la jcuxe, ja'o la xcux ec li ants li'i. Mu'yuc boch'o yan te jchi'uccutic; ja' no'ox chibuncutic te nacaluncutic.

¹⁹ Ta ac'ubaltic c'alal ivay li ants li'i, la snet' li yole, jech icham.

²⁰ Ta o'lol ac'ubal c'alal ja'o vayemune, ay sjelbun li cole. Ja' laj yac'bun comel li yol ti chamen xae.

²¹ C'alal yu'un xa'ox ta sacub osile, litots yu'un chcac'be xchu' li cole. Ja' to la quil ti chamen xae. C'alal isacub lec osile, ja' to laj quil ti mu ja'uc li cole —xut li ajvalile.

²² Jech laj yal li yan antse: —Mo'oj, ja' col ti cuxule; ja' avol ti chamene —xi. Itac'ov li yane: —Mo'oj, ja' avol ti chamene; ja' col ti cuxule —xi. Ja' jech laj yalilanbe sbaic te ta stojol li ajvalile.

²³ Li ajvalile jech laj yal: “Toj sjeloj sba li ava'yejique. Jun chal ti ja' yol ti cuxule, ti ma'uc yol li chamene. Pero ja' no'ox jech chal ec li yane”, xi.

²⁴ Jech lic yal mantal li ajvalile: —¡Ich'ic tal junuc espada! —xi. C'alal laj yich'beic tal li espadae,

²⁵ jech laj yal: —Basic ta o'lol li olol ti cuxule. Jujuc'os xavac'beic jujunic —xi.

²⁶ Li sme' olol ti cuxule toj ep laj yat yo'nton yu'un li yole, jech laj yalbe li ajvalile: —¡Ajvalil, avocolicuc mu xamil li olole! Ja' lec ac'bo li ants li'i —xi. Pero li yan antse jech laj yal: —Mu xu' boch'o chich' junucal cu'untic. Ja' lec ac'o sbasic ta o'lol —xi.

²⁷ Ja' yu'un li ajvalile jech laj yal: —Mu xamilic li olole. Ja' ac'beic li ants le'e, yu'un ta melel ja' sme' —xi.

²⁸ Scotol israeletic laj ya'yic c'u x'elan lec ichapanvan li ajvalile. Laj yich'ic ta muc', yu'un la sna'ic ti ac'bil lec sbijil yu'un Dios sventa tuc' chchapanvane.