1 Reyes 20 - Bible in Tzotzil de Chenalhó with Deuterocanon

La stsal siriaetic li Acabe

¹ Li Ben-adad, ajvalil ta Siriae, la stsob scotol yajsoldadotac xchi'uc li lajchab xcha'vinic (32) ajvaliletic spasoj ta co'ol yo'ntonic xchi'uque. Ep scaretaic xchi'uc ep boch'otic cajajtic ta ca' ibat setuic li lum Samariae yu'un tsc'an tstsaquic ta pleito.

^2-3 La staquic batel j'almantal noxtoc ta stojol Acab, ja' li ajvalil ta Israele, jech laj yalic batel: “Jech chal li Ben-adade: ‘Li c'anal taq'uin, li saquil taq'uin oy avu'une ja' cu'un. Xchi'uc li avajniltac, li anich'nabtac ti lec c'upilic sbae ja' cu'un’, xi”, xutic c'otel.

⁴ Itac'ov li ajvalil ta Israele: “Ajvalil, li vu'un xchi'uc scotol c'usitic oy cu'une ja' avu'un jech chac c'u cha'al chavale”, xut batel.

⁵ Li j'almantaletique ibatic yan velta ta stojol li Acabe jech c'ot yalbeic: “Li Ben-adade jech laj yal tal: ‘Laj xa calbot ti chavac'bun scotol li c'anal taq'uin, li saquil taq'uin oy avu'une, xchi'uc li avajniltac li anich'nabtaque.

⁶ Oc'om jech ora chac c'u cha'al li'i, ta jtac tal j'abteletic cu'un; chtal xchajic scotol li apasubmantale xchi'uc li sna avaj'abteltaque. Ta xich'ic batel scotol li c'usitic lec c'upilic sba oy avu'une’, xi laj yal tal”, xutic c'otel.

⁷ Li ajvalil ta Israele lic stsob scotol li banquilaletic ta yosilale, jech laj yalbe: —A'yo ava'yic, li ajvalil Ben-adade ja' no'ox tsc'an chac'bun jvocol. Calojbe xa ti chcac'be li cajniltac, li jnich'nabtac, xchi'uc scotol li c'anal taq'uin, li saquil taq'uin oy cu'une —xut.

⁸ Itac'ov li banquilaletic xchi'uc scotol li israeletique: —Mu xavich' ta muc'; mu xatuc'ulan li c'usi chayalbote —xiic.

⁹ Ja' yu'un li Acabe jech laj yalbe li j'almantaletic yu'un Ben-adade: —Jech xc'ot avalbeic li ajvalile: Ta ba'yuque laj calbe ti xu' ta jpas li c'usi laj yal tale. Pero li' ta orae mu'yuc xa ta jpas li c'usi chiyalbune —xut. Li j'almantaletique isutic batel; c'ot yalbeic li c'usi itac'batique.

¹⁰ Li Ben-adade la stac batel yan velta ta stojol Acab li j'almantaletic yu'une. Jech laj yal batel: “¡Tsots ac'o yac'bun jtoj diosetic ti me mu spas ta pucuc cu'un li Samaria c'alal chbat yules li jvinictaque!”, xut batel.

¹¹ Li ajvalil ta Israele jech laj yalbe batel: “Mu to xu' chaq'uejintabe sq'uejimolal sventa chapas canal, yu'un mu to ja'uc yorail”, xut batel.

¹² Li Ben-adade jun yo'nton te ch-uch'bajic xchi'uc yantic ajvaliletic ta scarpanaic c'alal ic'ot ya'yejic li j'almantaletique. C'alal laj ya'ye, jech lic yalbe li j'abteletic yu'une: “¡Batic ta pleito!”, xut. Scotolic bat stsaquic ta pleito li lum Samariae.

¹³ Oy jun yaj'alc'op Dios ibat ta stojol Acab, ja' li ajvalil ta Israele, jech laj yalbe: —Jech chal li Muc'ul Diose: ‘Ac'o me laj xa avil ti bats'i ep li avajcontra chtal ta atojole, pero vu'un ta xcac' ta ac'ob scotol, yu'un jech ac'o ana' ti ta melel vu'un Muc'ul Diosune’, xi li Muc'ul Diose —x'utat.

¹⁴ Itac'ov li Acabe: —¿Boch'o ta sventa ti ch-och ta jc'obe? —xi. —Jech yaloj li Muc'ul Diose: Ja' ta sventa li querem soldadoetic ti chtunic yu'un li banquilaletic ta jujun lume —xi. —Pero ¿boch'o ba'yuc tsliques li pleitoe? —xi noxtoc li Acabe. —Vo'ot —xi li j'alc'ope.

¹⁵ Li Acabe lic stsob scotol li querem soldadoetic ti chtunic yu'un li banquilaletic ta jujun lume; ja' chib ciento xchi'uc lajchab xcha'vinic (232) ta scotol. Xchi'uc la stsob scotol li israeletique; ja' vucmil (7,000) ta scotol.

¹⁶ Ta o'lol c'ac'al iloq'uic batel. Li Ben-adade te oy yo' bu spasoj scarpanaique; te chyacubic xchi'uc li lajchab xcha'vinic (32) yantic ajvaliletic talemic ta coltavaneje.

¹⁷ Ja' ba'yucbe ibatic li querem soldadoetique. C'alal laj ya'ay Ben-adad ti oy xa boch'otic loq'uemic batel ta Samariae,

¹⁸ jech laj yal mantal: “Me ta sventa pleito, o me muc ta sventauc pleito ti italique, cuxul ta jc'an chavic'bicun tal”, xi.

¹⁹ Li querem soldadoetique iloq'uic batel xchi'uc li yan vucmil (7,000) soldado israeletique.

²⁰ Jujunic te no'ox la smilic li yajcontraic c'alal ital taaticuque, jech ijatovic batel li siriaetique. Li israeletique la snutsic batel, pero li Ben-adad, ja' li ajvalil ta Siriae, ijatovic batel xchi'uc jayibuc soldadoetic cajajtic ta ca'.

²¹ Li ajvalil ta Israele bat smil li boch'otic cajajtic ta ca'e. Laj yich'be li sca'ic xchi'uc scaretaique; solel tsalbil ic'ot yu'unic o li siriaetique.

²² Ts'acal te ital ta stojol ajvalil ta Israel li j'alc'ope, jech laj yalbe: —Sutan xa batel; bat tsobo lec li soldadoetic avu'une. Nopo lec c'usi xu' chapas, yu'un le' ta jun jabile ta me xtal stsacot ta pleito yan velta li ajvalil ta Siriae —x'utat.

²³ Li j'abteletic yu'un ajvalil ta Siriae jech laj yalbeic li ajvalil yu'unique: —Li diosetic yu'un israeletique ja' diosetic yu'un te'tic ta vitsetic, ja' yu'un la stsalutic. Pero me chbat cac'beic ta stenlejaltique, ta persa ta jtsaltic.

²⁴ Ajvalil, ja' jech xapas chac li'i: Ja' loq'uesano ta yabtelic li ajvaliletique; ja' ac'o ochuc ta xq'uexolic li banquilal soldadoetique.

²⁵ Li vo'ote chapano ta ora yan soldadoetic jech yepal jech chac c'u cha'al laj yich'ic tsalele, xchi'uc jech yepal ca'etic xchi'uc caretaetic. Bat jtsac jbatic ta pleito jchi'uctic te ta stenlejaltic. Jq'ueltiquic me mu ta jtsaltic —xutic. Li Ben-adade lec laj ya'ay li c'usi laj yich' alele, jech la spas.

²⁶ C'alal iloc' jun jabile, lic stsob li yajsoldadotac ta scotol Siriae. Te ibatic ta Afec, yu'un bat stsaquic ta pleito li israeletique.

²⁷ Li israeletique ibatic ec; laj yich'ic batel c'usitic chtun yu'unic, yu'un bat sva'lebin sbaic xchi'uquic li siriaetique. Pero li stuquique xco'laj no'ox xchi'uc cha'tsob tentsunetic ic'otic. Yan li siriaetique bats'i noj yu'unic li banamil tee.

²⁸ Li jun j'alc'op yu'un Diose te ic'ot ta stojol li ajvalil ta Israele, jech laj yalbe: —Jech yaloj li Muc'ul Diose: ‘Ta sventa laj yalic siriaetic ti vu'un Diosun ta vitsetique, ti muc vu'cun Diosun yu'un stenlejaltique, ja' yu'un ta xcac' ta ac'ob scotol li epal soldadoetique yu'un jech ac'o ana' ti vu'un Muc'ul Diosune’, xi li Muc'ul Diose —x'utat.

²⁹ Li siriaetic xchi'uc israeletique vucub c'ac'al te oyic ta scarpanaic; lec sq'ueloj sbaic ta jujujot. Ta svucubal c'ac'ale lic spasic pleito. Li israeletique ta jun no'ox sc'ac'alil la smilic vo'vinic ta mil (100,000) soldadoetic yu'un li siriaetique.

³⁰ Li yantique ijatovic batel ta lum Afec. Pero li coralton yu'un lume ilom tal ta sba yac'olic li vucub xcha'vinic ta mil (27,000) ta ox snac' sbaique. Li Ben-adade te bat snac' sba ta lum ec; te la snaq'uilan sba ta nanatic.

³¹ Li j'abteletic yu'une jech laj yalic: —Ca'yojcutic ti lec yo'ntonic li ajvaliletic ta Israele. Ja' lec la jlaptic batel c'u'il sventa at-o'nton ti ch'ixlajan ta lapele, xchi'uc jchuctic batel lasu ta jnuc'tic. Batic ta stojol li ajvalil ta Israele; jq'ueltiquic me chixch'aybutic to ta yo'nton li jmultique —xiic.

³² Te lic slapic batel c'u'il sventa at-o'nton ti ch'ixlajan ta lapele, xchi'uc la xchuquic batel lasu ta snuq'uic. Te ic'otic ta stojol li ajvalil ta Israele, jech laj yalbeic: —Li ajvalil Ben-adade jech chal: ‘Vu'un li avajtunelune, ta jc'anbot vocol ti ac'o ach'aybuncutic ta avo'nton li jmulcutique’, xi —xutic c'otel. Itac'ov li Acabe: —¿Me cuxul to? Li vu'une xco'laj xchi'uc jchi'il ta voq'uel chca'ay —xut.

³³ Li viniquetique toj lec laj ya'yic; te lic staq'uic ta ora, jech laj yalic: —¡Ajvalil, li achi'il ta voq'uel Ben-adade cuxul to! —xiic. Itac'ov li Acabe: —Bat iq'uic tal —xut. Li Ben-adade te ic'ot ta stojol li Acabe; te laj yac' muyuc ta scareta.

³⁴ Li Ben-adade jech laj yal: —Li lumetic spojojbot jtote ta xcac'bot sutel. Xu' chbat manulajan, chbat chonolajan te ta Damasco jech chac c'u cha'al la spas jtot te ta Samariae —xi. Itac'ov li Acabe: —Lec oy, li vu'une ta xcalbot ta jamal ec ti xu' chasut batele —xut. Jech te la spas ta co'ol yo'ntonic li Acab xchi'uc Ben-adade; te laj yac' sutuc batel.

³⁵ Pero oy jun vinic, ja' xchi'il sbaic xchi'uc li j'alc'opetique, jech i'ac'bat sna' yu'un li Diose, jech laj yalbe jun xchi'il: —¡Avocoluc yayijesun! —xut. Pero li xchi'ile muc sc'an spas.

³⁶ Li j'alc'ope jech laj yalbe: —Ta sventa ti muc xach'un c'usi yalojbun li Muc'ul Diose, c'alal me la jvoc' jbatic tanae, ta xata ta be jun león; ja' ta smilot —xut. C'alal la svoc' sbaic xchi'uc li j'alc'ope, la sta ta be jun león; te imilat comel.

³⁷ Te la sta yan vinic li j'alc'ope, jech laj yalbe: —Yayijesun comel —xut. Li vinique laj yac'be jmoj majel, jech ituch' comel sat.

³⁸ Li j'alc'ope te ibat smala ta be li ajvalil Acabe; syanijesoj sba yu'un xpixoj li xtuch'emal sate.

³⁹ C'alal ijelov li ajvalile, li j'alc'ope tsots laj yapta, jech laj yalbe: —Ajvalil, vu'un avinicun; ja' to lisut tal ta pleito. Te ital jun soldado; te yic'ojbun tal jun jchuquel. Laj yac'bun jchabi, jech laj yalbun: ‘Me ijatov avu'une, chatoj ta ach'ich'al, o chatoj ta oxmil (3,000) ta sep saquil taq'uin’, xiyutun.

⁴⁰ C'alal ja'o oy c'usi ta jpase, li vinique ijatov batel cu'un —xut. Itac'ov li ajvalile: —Persa chacham, yu'un laj aval atuc ti ja' amule —xi.

⁴¹ Li j'alc'ope ta ora la sloq'ues li smac xtuch'emal sate. Li ajvalile laj yotquin ti ja' jun j'alc'ope.

⁴² Li j'alc'ope jech laj yal: —Jech chayalbot li Muc'ul Diose: ‘Ta sventa ti laj acolta batel li boch'o chapal sc'oplal chich' milele, vo'ot chavich' milel ta sventa ti ja' cuxul icom li stuque, xchi'uc ja' chich'ic milel li achi'iltac ta sventa ti ja' cuxul icom li xchi'iltaque’, xi li Muc'ul Diose —xut.

⁴³ Li ajvalil ta Israele ch-ilin xa batel, xchi'uc ep laj yat yo'nton. C'alal ic'ot ta Samariae, te c'ot ochuc ta spasubmantal.