1 Reyes 19 - Bible in Tzotzil de Chenalhó with Deuterocanon

Li Eliase ibat snac' sba ta Horeb

¹ Li Acabe c'ot yalbe ya'ay Jezabel scotol c'usi la spas li Eliase, xchi'uc ti la smil ta espada scotol li j'alc'opetic yu'un Baale.

² Li Jezabele la stac batel jun j'almantal ta stojol li Eliase, jech laj yalbe batel: “¡Oc'om jech ora chac li'i, me mu'yuc chamenot cu'un jech chac c'u cha'al laj amil li j'alc'opetique, tsots ac'o yac'bun jtoj li diosetique!”, xut batel.

³ C'alal laj ya'ay Elías ti ta xa xich' milele, ijatov batel ta Beerseba te ta yosilal Judá, yu'un jech mu xmilat. Li smozoe te icom.

⁴ Jech te ibat ta xocol banamil; ja' jun c'ac'al ixanov batel. Te ic'ot chotluc ta yolon jpets mes te'. La sc'an ti te ac'o chamuque, jech laj yal: “¡Muc'ul Dios, li' no'ox c'alale, milun ta ora! Muc vu'cun toj lecun jech chac c'u cha'al li jmoltotaque”, xut li Muc'ul Diose.

⁵ La xmochan sba ta yolon li jpets mes te'e jech te i'och svayel. Te ital jun yaj'almantal Muc'ul Dios; te ivul tijatuc. Jech i'albat: “Lican, ve'an”, x'utat.

⁶ La sq'uel ta jujujot xocon. Laj yil te chta'aj pan ta ac'al ta sjolinab, xchi'uc te vuchul jun unin bin vo'. Jech ilic ve'uc, laj yuch' vo'; ts'acal ivay yan velta.

⁷ Ital xchibal velta li yaj'almantal Muc'ul Diose; vul yich' tijel noxtoc li Eliase jech i'albat: “Lican, ve'an, yu'un toj nom ti bu chabate”, x'utat.

⁸ Te ilic ve'uc, laj yuch' vo' noxtoc. C'alal la sve' li ve'lile, la sta o lec stsatsal, jech ivu' yu'un ixanov batel cha'vinic (40) c'ac'al xchi'uc cha'vinic (40) ac'ubal c'alal to ic'ot ta Horeb, ja' li vits yu'un Diose.

⁹ C'alal ic'ote, te i'och ta jun nailch'en; te ivay. Te ital c'opanatuc yu'un li Muc'ul Diose, jech i'albat: “¿Elías, c'usi chapas li'i?”, x'utat.

¹⁰ Jech itac'ov: “Toj nabal co'nton ta atojol Muc'ul Dios, vo'ot ti ech'em atsatsale. Yu'un li jchi'iltac ta israelale laj xa soquesic li c'usi chapanbil avu'une; laj xa sjinesic li scajleb amotone, xchi'uc laj xa smilic ta espada scotol li avaj'alc'optaque. Jtuc xa no'ox cuxulun, pero ta st'unicun yu'un tsc'an chismilicun ec”, xut.

¹¹ Li Muc'ul Diose jech laj yalbe: “Loc'an tal, bat va'an aba lec ta jtojol li' ta vitse”, x'utat. Ja'o te ijelov li Muc'ul Diose, xchi'uc ijelov ven muc'ta ic'. Iloman yu'un li te'etique xchi'uc ivoc'an li muc'tic ch'ene. Pero li Muc'ul Diose mu'yuc te oy ta ic'. C'alal ijelov li iq'ue, ital tsots niquel, pero li Muc'ul Diose mu'yuc te oy c'alal ijelov li niquele.

¹² C'alal ijelov niquele, ital c'oc', pero li Muc'ul Diose mu'yuc te oy ta c'oc'. C'alal ijelov li c'oq'ue, oy c'usi jutuc xvinaj xmuquet ibac'.

¹³ C'alal laj ya'ay li Eliase, la smac sat ta snatil c'u'. Iloc' batel; ibat sva'an sba ta ti'ch'en. Oy boch'o te ic'opanat yu'un, jech i'albat: “Elías, ¿c'usi chapas li'i?”, x'utat.

¹⁴ Itac'ov: “Toj tsots li'abtej ta aventa Muc'ul Dios, vo'ot ti ech'em atsatsale. Yu'un li jchi'iltac ta israelale laj xa soquesic li c'usi chapanbil avu'une. Laj xa sjinesic li scajleb amotone, xchi'uc laj xa smilic ta espada scotol li avaj'alc'optaque. Jtuc xa no'ox j'alc'opun, pero ta xa st'unicun yu'un tsc'an chismilicun ec”, xut.

¹⁵ Li Muc'ul Diose jech laj yalbe: “Batan, te xasut batel ta be yo' bu latal ta xocol banamil ta Damascoe. Me lac'ote, jaxbo aceite ta sjol li Hazaele yu'un ja' ch-och ta ajvalilal te ta Siria.

¹⁶ Xchi'uc li Jehú, smomnich'on Nimsie, jaxbo aceite ta sjol sventa ch-och ta ajvalilal te ta Israel. Jech noxtoc li Eliseo, xnich'on Safat liquem ta Abel-meholae, jaxbo aceite ta sjol sventa ch-och ta j'alc'op. Ja' aq'uexol chcom.

¹⁷ Li boch'otic chcol to ta milel yu'un ti Hazaele ja' xa tsmil ec li Jehue. Li boch'otic chcol to ta milel yu'un li Jehue ja' xa tsmil ec li Eliseoe.

¹⁸ Ja' xa no'ox ta jvoc' comel li vucmil (7,000) te ta Israel, ja' li boch'otic mu'yuc squejanoj sbaic ta stojol li Baale, ti mu'yuc sts'uts'ojique”, x'utat li Eliase.

It'ujat Eliseo

¹⁹ Li Eliase iloc' batel. Te la sta li Eliseo, xnich'on Safate; te ta sloc banamil xchi'uc lajcha'chop j'abtel vacaxetic. Li Eliseoe ja' xa smacoj batel ec li cha'cot j'abtel vacaxetic ta slajebe. Li Eliase te ibat yo' bu oy li Eliseoe; te la slambe comel ta yac'ol li sc'u'e.

²⁰ Li Eliseoe la scomtsan ta ora li vacaxetique; te nabal ibat ta spat li Eliase, jech laj yalbe: —Avocoluc coltaun to batel, yu'un chbat jc'opan comel jtot jme'. Ts'acal chtal jchi'inot —xut. Li Eliase jech laj yalbe: —Lec oy, batan, pero na'o me li c'usi la jpasbote —xut.

²¹ Li Eliseoe ibat; laj yic' batel cha'cot vacax, te c'ot smil. Ja' laj yac'be ta si'il li yabtejeb xvacaxe; ja' te la svo o. La smac'lin comel scotol li xchi'iltaque. Ts'acal ibat xchi'in li Eliase; te itun ta stojol.