1 Reyes 17 - Bible in Tzotzil de Chenalhó with Deuterocanon

Li Eliase laj yal ti mu'yuc chac' vo'e

¹ Li j'alc'op Elías liquem ta Tisbe ta yosilal Galaade, jech laj yalbe li Acabe: “Chcal ta jamal ta stojol Muc'ul Dios, ja' li Dios yu'un Israel ti chitun yu'une, mu'yuc ta xac' vo', xchi'uc mu'yuc ta xyal job osil li jabil li'i, ja' to me laj cal ti chtale”, xut.

² Li Muc'ul Diose jech laj yalbe li Eliase:

³ “Loc'an batel li'i; nac'o aba ta ti' uc'um Querit ta yeloval uc'um Jordán ta sloq'ueb c'ac'al.

⁴ Ja' xavuch' li bevo'e. Laj xa jpas ta mantal jojetic; ja' chtal yac'bot ave'el”, xut.

⁵ Jech ibat li Eliase; la spas jech chac c'u cha'al i'albat yu'un li Muc'ul Diose. Te la snac' sba ta ti' uc'um Querit ta yeloval uc'um Jordán.

⁶ Ta jujun sob, xchi'uc ta jujun mal c'ac'al ibat li jojetique; yich'ojic batel pan xchi'uc ti'bol, xchi'uc ja' laj yuch' li uc'ume.

⁷ C'alal i'ech' jayibuc c'ac'ale, i'ul li bevo'e yu'un muc xa xac' o li vo'e.

Li Eliase ic'uxubinat yu'un me'on ants te ta Sarepta

⁸ Jech ic'opanat yan velta yu'un Muc'ul Dios li Eliase, jech i'albat:

⁹ “Loc'an batel li'i; batan ta lum Sarepta te ta Sidón, te xanaqui. Laj xa jpas ta mantal jun me'on ants; ja' te chasmac'linot”, xut.

¹⁰ Jech iloc' batel li Eliase; ibat ta lum Sarepta. C'alal ic'ot ta yochebal xa lume, te la sta jun me'on ants sbats'il stsobel si'. Jech laj yalbe: —Avocoluc ac'bun junuc vaso ava'al cuch' —xut.

¹¹ C'alal chbat xa yich' tale, li Eliase jech to laj yalbe: —Avocoluc ich'bun tal jutuc pan jve' noxtoc —xut.

¹² Itac'ov li antse: —Jamal chcalbot ta stojol Muc'ul Dios, ja' li Dios avu'une, mu'yuc xa pasbil pan cu'un, yu jop xa arina oy cu'un, xchi'uc yu juteb xa aceite oy cu'un ta jbin. Jech li' ta jtsobbe xvach'il sventa ta jpas pan jve'cutic xchi'uc li cole. Me ilaj jve'cutique, chichamcutic o ta vi'nal —xi.

¹³ Itac'ov li Eliase: —Mu xaxi'; bat paso li pan laj avale. Ja' ba'yuc xapasbun tal li pan jve'e; ich'bun tal ta ora. Ja' ts'acal xapas li pan ave'ic xchi'uc avole.

¹⁴ Yu'un li Muc'ul Dios yu'un Israele jech yaloj: ‘Li arina te oy ta yavile xchi'uc li aceite te oy ta bine mu xlaj o, ja' to me laj cac' taluc vo' yan veltae’, xi li Muc'ul Diose —xut li antse.

¹⁵ Li me'on antse ibat; la spas jech chac c'u cha'al i'albat yu'un li Eliase. Jech ep c'ac'al oy sve'elic o xchi'uc li yole, xchi'uc li Eliase.

¹⁶ Li arina te oy ta yavile xchi'uc li aceite te oy ta bine muc xlaj o. Ja' ic'ot o ti jech i'albat yu'un Muc'ul Dios li Eliase.

¹⁷ C'alal i'ech' jayibuc c'ac'ale, itsaque ta chamel yol li me'on antse; bats'i tsots li chamel itaate jech te icham o.

¹⁸ Li antse jech laj yalbe li Eliase: —¿C'u yu'un jech laj apasbun vo'ot li yaj'alc'opot Diose? ¿Me yu'un tal avac'bun jtoj jmul ti laj avac' chamuc li cole? —xut.

¹⁹ Li Eliase jech laj yalbe: —Ic'bun tal li avole —xut. Laj yic' li olole; la spet muyel ta scuarto ta xcha'cojal jol na yo' bu chvaye; te la xmochan ta svayab.

²⁰ Tsots i'avan ta stojol li Muc'ul Diose jech laj yal: “Muc'ul Dios, Dios cu'un, ¿c'u yu'un laj avac'be svocol ec li me'on ants li' jch'amanojbe snae yu'un icham li yole?”, xut.

²¹ Oxib velta la spatan sba ta yac'ol li olole; tsots i'avan ta stojol li Muc'ul Diose, jech laj yal: “Muc'ul Dios, Dios cu'un, ¡Avocoluc cha'cuxeso li querem li'i!”, xut.

²² Li Muc'ul Diose laj ya'ibe sc'op li Eliase, jech isut tal xch'ulel li quereme jech icuxi o.

²³ Li Eliase ta ora la spet li quereme. Laj yic' yalel tal ta snaic; laj yac'be li sme'e, jech laj yalbe: —¡Q'uelavil, cuxul xa li avole! —xut.

²⁴ Li me'on antse jech laj yalbe li Eliase: —Li' ta orae laj xa jna' ti vo'ot yaj'alc'opot Dios ta melele, xchi'uc ti ja' chaval c'usi melel yaloj stuc li Muc'ul Diose —xut.