1 Reyes 16 - Bible in Tzotzil de Chenalhó with Deuterocanon

¹ Ja' yu'un li Muc'ul Diose la sc'opan li Jehú, xnich'on Hananie. Jech lic yal ta sventa li Baasae:

² “Vu'un la jpasot ta ts'u'ilum, xchi'uc la jtic'ot ta banquilal yu'un li jteclumale, ja' li israeletique. Pero co'ol laj apas jech chac c'u cha'al li Jeroboame. Laj avac'be sa' smulic ec li jteclumale. Laj asa'bun sc'ac'al co'nton ta sventa ti jech laj apase.

³ Baasa, ta sventa ti jech laj apase, ta xculesbot o ats'unubal c'alal ta avalab anich'nab. Co'ol ta jpasbot jech chac c'u cha'al la jpasbe li Jeroboam, xnich'on Nabate.

⁴ Me oy boch'o chcham avu'un ta yut lume, ta xti'atic ta ts'i'. Li boch'o chchamic ta te'tique ta xti'atic ta xulemetic”, xi laj yal Dios ta sventa li Baasae.

⁵ Li yantic sc'oplal li Baasae, xchi'uc li c'usitic ic'ot ta pasele, xchi'uc li c'usitic la spase, xchi'uc li c'usitic tsotsic ivu' yu'une te ts'ibabil scotol ta svunal yu'un ajvaliletic ta Israel.

⁶ C'alal icham li Baasae, te bat smuquic ta Tirsa. Ja' i'och ta xq'uexol jun xnich'on, Ela sbi.

⁷ Pero li c'usi laj yal Muc'ul Dios ta sventa j'alc'op Jehú, xnich'on Hananie, ti laj yal ti ch-ul o sts'unubal xchi'uc yalab xnich'nab li Baasa ta sventa ti toj chopol c'usitic la spase, ti la sa'be sc'ac'al yo'nton Muc'ul Dios ta sventa li c'usitic la spase, ja' yu'un jech ipasbat jech chac c'u cha'al li Jeroboame. J'ech'el i'ulesat o yu'un li Muc'ul Diose.

I'och ta ajvalilal ta Israel Ela xchi'uc Zimri

⁸ C'alal iloc' xa'ox vaquib xcha'vinic (26) jabil yochel ta ajvalilal te ta Judá li Asae, ja'o i'och ta ajvalilal ta lum Tirsa sventa Israel li Ela, xnich'on Baasae. Chib jabil i'abtej.

⁹ Pero oy jun xchi'il ta abtel li Elae, Zimri sbi; ja' sventainoj j'o'lol li caretaetic sventa pleitoe. Lic snop c'u x'elan xu' tsmil li ajvalil Elae. C'alal ja'o te oy ta Tirsa li Elae, te bat yacubuc ta sna Arsa, ja' li jchabina yu'un te ta Tirsae.

¹⁰ Te ibat li Zimrie, bat smil. Vucub xcha'vinic (27) jabil xa'ox yochel ta ajvalilal te ta Judá li Asa c'alal icham yu'une. Ja' i'och ta ajvalilal stuc li Zimrie.

¹¹ C'alal ichoti lec ta yabtele, lic smilbe scotol xnich'nab li Baasae, me junuc vinic mu'yuc cuxul la scomtsan. La smilbe c'alal ta yuts' yalaltac, xchi'uc li boch'otic lec sc'opan sba xchi'uque.

¹² Ja' jech laj yulesbe o sts'unubal Baasa li Zimrie. Ja' ic'ot o ti jech ono'ox laj yal Muc'ul Dios ta sventa li j'alc'op Jehue.

¹³ Ja' ta scoj li yepal smul Baasa xchi'uc xnich'one, ja' li Elae, xchi'uc ta scoj ti laj yac'beic sa' smul li israeletique, xchi'uc ta scoj li c'usitic laj yich'ic ta muq'ue, jech la sa'beic o sc'ac'al yo'nton li Muc'ul Dios yu'un Israele.

¹⁴ Li yantic sc'oplal li Elae xchi'uc scotol li c'usitic la spase te ts'ibabil scotol ta svunal c'usitic ic'ot ta pasel yu'un ajvaliletic ta Israel.

¹⁵ C'alal vucub xcha'vinic (27) jabil xa'ox yochel ta ajvalilal te ta Judá li Asae, ja'o i'och ta ajvalilal ta Tirsa li Zimrie, pero vucub c'ac'al no'ox i'och ta ajvalilal. Li israeletique ja'o te batem set sbaic ta lum Gibetón ta yosilal filistaetic, yu'un tstsaquic ta pleito.

¹⁶ C'alal te setelic xchi'uc scarpanaic sventa pleito li israeletique, laj ya'yic ti laj xa sloq'ues ta ajvalilal Ela li Zimrie, xchi'uc ti laj xa smil noxtoque. Yo' bu tsobolic li israeletique te no'ox ta ora lic stiq'uic ta ajvalilal li Omri, ja' li banquilal soldado yu'unique.

¹⁷ Li Omri xchi'uc scotol israeletique iloq'uic batel ta Gibetón; mu'yuc la spasic pleito xchi'uquic. Ja' bat stsaquic ta pleito li lum Tirsae.

¹⁸ C'alal laj yil Zimri ti i'och xa ta sc'obic li lum Tirsae, i'och ta yut spasubmantal; laj yac'be sc'ac'al li nae jech te icham o.

¹⁹ Ja' jech ic'ot ta pasel ta scoj li smul la sa'e xchi'uc li c'usitic yan chopolic la spas ta stojol li Muc'ul Diose. Yu'un co'ol chopol la spas jech chac c'u cha'al li Jeroboame. Ja' ta scoj ti la sa' smulic ec li israeletique.

²⁰ Li c'usitic yan la spas li Zimrie xchi'uc c'u x'elan la sloq'ues ta yabtel li ajvalil Elae te ts'ibabil scotol ta svunal c'usitic ic'ot ta pasel yu'un ajvaliletic ta Israel.

Li Omrie i'och ta ajvalilal ta Israel

²¹ Li israeletique lic spas sbaic ta cha'voc'. Jvoc' laj yac' sbaic ta stojol Tibni, xnich'on Ginat, sventa tstiq'uic ta ajvalilal. Jvoc' laj yac' sbaic ta stojol Omri.

²² Li boch'otic ibatic ta stojol Omrie ja' lec xu' yu'unic; ja' muc xu' yu'unic li svinictac Tibni, xnich'on Ginate. Li Tibnie icham. Ja' icom o ta ajvalilal li Omrie.

²³ Buluchib xcha'vinic (31) jabil xa'ox yochel ta ajvalilal ta Judá li Asa ti c'alal i'och ta ajvalilal ta Israel li Omrie. Lajchab (12) jabil no'ox i'abtej ta scotol, te xa tsacal o xchi'uc li vaquib jabil i'abtej ta Tirsae.

²⁴ Li Omrie la sman li vits ta Samariae; ja' la smanbe li Semere. Ja' vaquib xchanvinic (66) kilo saquil taq'uin la stoj. Ja' te la spas jun lum lec setbil ta coralton; Samaria laj yac'be sbi. Yu'un li yajval to'ox vitse, Semer sbi.

²⁵ Li Omrie toj chopol c'usitic la spas ta stojol li Muc'ul Diose; ja' toj ech'em chopol la spas jech chac c'u cha'al ijelov li yantic ajvaliletique.

²⁶ Ja' co'ol mulil la spas jech chac c'u cha'al smul li Jeroboam, xnich'on Nabate. Ja' ta scoj ti la sa' smulic ec li israeletique. Ja' yu'un li Muc'ul Dios yu'un Israele la sa'beic sc'ac'al yo'nton ta scoj li loc'ometic la scuy ta sdiosique.

²⁷ Li yantic sc'oplal Omrie, xchi'uc scotol li c'usitic yan la spase, xchi'uc li c'usitic tsots ivu' yu'une te ts'ibabil ta svunal c'usitic ic'ot ta pasel yu'un li ajvaliletic ta Israele.

²⁸ C'alal icham li Omrie, te bat yich' muquel ta Samaria. Ja' i'och ta xq'uexol jun xnich'on, Acab sbi.

Li Acabe lic stsac yabtel ta ajvalilal ta Israel

²⁹ Xvaxaclajunebal xcha'vinic (38) jabil xa'ox yochel ta ajvalilal ta Judá Asa c'alal i'och ta ajvalilal ta Israel li Acabe. Chib xcha'vinic (22) jabil i'abtej te ta lum Samaria ta stojol li israeletique.

³⁰ Li Acab, xnich'on Omrie, toj chopol c'usitic la spas ta stojol li Muc'ul Diose; ijelov to yu'un jech chac c'u cha'al la spas li yantic ajvaliletic ba'yuc ijelovique.

³¹ Mu'yuc tsots sc'oplal laj ya'ay ti co'ol la spas smul jech chac c'u cha'al la spas li Jeroboam, xnich'on Nabate. Jech noxtoc laj yic' li Jezabel, stseb Et-baal, ajvalil ta Sidone. Te lic yich' o ta muc' li dios Baale; te itun ta stojol.

³² La spas jun ch'ulna sventa Baal xchi'uc jun scajleb smoton te ta Samaria.

³³ Jech noxtoc la spas jun sloc'obal dios, Asera sbi. Ja' toj ech'em chopol la spas jech chac c'u cha'al ijelovic li yantic ajvaliletic ta Israele, jech la sa'be o sc'ac'al yo'nton li Muc'ul Dios yu'un Israele.

³⁴ C'alal yorail cuxul li Acabe, li Hiel liquem ta Betele la xcha'va'an li lum Jericoe. C'alal laj yac'be snaclebe, icham li sba xnich'on, Abiram sbie. C'alal la snacanbe sti'e, icham noxtoc li xc'ox xnich'on, Segub sbie. Ja' ic'ot o ta pasel ti jech ono'ox laj yal Muc'ul Dios ta sventa Josué, xnich'on Nune.