1 Reyes 15 - Bible in Tzotzil de Chenalhó with Deuterocanon

I'och ta ajvalilal ta Judá li Abiame

¹ C'alal xvaxaclajunebal xa'ox jabil yochel ta ajvalilal ta Israel li Jeroboam, xnich'on Nabate, ja'o i'och ta ajvalilal te ta Judá ec li Abiame.

² Oxib jabil i'abtej ta Jerusalén. Li sme'e Maaca sbi; ja' stseb Absalón.

³ Li Abiame lic spas scotol ec li muliletic jech chac c'u cha'al la spas stote. Mu'yuc tuc' yo'nton ta stojol li Muc'ul Dios jech chac c'u cha'al tuc' yo'nton li smoltote, ja' li Davide.

⁴ Ta sventa ti lec c'anbil yu'un Muc'ul Dios li Davide, ja' yu'un li Muc'ul Diose laj yac' ti te tsanal o li luz yu'un David ta Jerusalene. Jech laj to stic'be ta ajvalilal li xnich'one, xchi'uc laj to yac' tsatsubuc li Jerusalene.

⁵ Yu'un li Davide lec tuc' c'usitic la spas ta stojol Muc'ul Dios, me jbeluc mu'yuc la sbaj c'usitic i'albat yu'un Muc'ul Dios ti jayib c'ac'al cuxule. Ja' no'ox te la sta smul o c'alal laj yac' ta milel li Urías hitita vinique.

^6-7 C'alal cuxul li Roboame, puru pleito la spasic xchi'uc li Jeroboame. Jech noxtoc li Abiame puru pleito la spasic xchi'uc li Jeroboame. Li yantic sc'oplal Abiame xchi'uc li c'usitic yan la spase te ts'ibabil ta svunal c'usitic ic'ot ta pasel yu'un ajvaliletic ta Judá.

⁸ C'alal icham li Abiame, te bat smuquic ta Lum yu'un David. Ja' i'och ta xq'uexol jun xnich'on, Asa sbi.

Li Asae i'och ta ajvalilal ta Judá

⁹ C'alal jtob (20) xa'ox jabil yochel ta ajvalilal ta Israel li Jeroboame, li Asae ja'o i'och ta ajvalilal te ta Judá.

¹⁰ Jun yoxvinic (41) jabil i'abtej ta Jerusalén. Li syame'e Maaca sbi; ja' li stseb Absalone.

¹¹ Li Asae tuc' c'usitic la spas ta stojol Muc'ul Dios jech chac c'u cha'al la spas smuc'tamoltot Davide.

¹² Yu'un la sloq'uesan ta yosilal li boch'otic tstsobilan sbaic ta spasel muliletique, xchi'uc la sloq'uesan scotol li c'usitic la scuy ta sdiosic smoltotaque.

¹³ Xchi'uc la sloq'ues o ta ajvalilal li Maaca, ja' li syame'e, yu'un laj yac' ta pasel jun dios, Asera sbi. Jech noxtoc laj yulesbe o li sdios syame'e; la xchic' ta c'oc' te ta nopol bevo' Cedrón.

¹⁴ Yan li snailtac sdiosic ta vitsetique mu'yuc la sjines. Pero li Asae jun yo'nton laj yich' ta muc' Muc'ul Dios ti jayib c'ac'al cuxule.

¹⁵ La stic' ta xch'ulna Muc'ul Dios scotol li c'anal taq'uin, xchi'uc li saquil taq'uin ti c'u yepal yac'oj comel li stote xchi'uc ti c'u yepal laj yac' stuque.

Li Asae la sco'lajes yo'nton xchi'uc ajvalil Ben-adad

¹⁶ Li Asa xchi'uc Baasa ajvalil ta Israele, scotol c'ac'al puru pleito la spasic.

¹⁷ Li Baasae ibat scontrain li Judae. La set ta coralton li lum Ramae yu'un jech mu'yuc boch'o xu' chloc', mu'yuc boch'o xu' ch-och sventa chbat sc'opan li ajvalil ta Judae.

¹⁸ Li Asae lic stsob scotol li c'anal taq'uin, li saquil taq'uin te oy ta yavil ta ch'ulna yu'un Muc'ul Diose xchi'uc te ta spasubmantale. Laj yac'be li xchi'iltac ta abtele yu'un tstacbe batel ta Damasco li ajvalil Ben-adad, ta Siriae; ja' li xnich'on Tabrimón, smomnich'on Hezione. Jech laj yalbe batel:

¹⁹ “La' jpastic ta co'ol co'ntontic ec jech chac c'u cha'al la spasic li jtot xchi'uc atote. Li' ta jtacbot tal jutuc amoton c'anal taq'uin, xchi'uc saquil taq'uin. Ja' bat soqueso c'usi achapanoj achi'uc li Baasa, ajvalil ta Israele, yu'un jech mu xtal stsacun ta pleito”, xut batel.

²⁰ Li Ben-adade la xch'un c'usi laj yal batel li ajvalil Asae, jech la stac batel banquilal soldadoetic yu'un ac'o bat scontrainic li lumetic yu'un Israele. Jech la spojic o li lum Ijón, Dan, Abel-bet-maaca, sjunul Cineret xchi'uc scotol yosilal Neftalí.

²¹ C'alal laj ya'ay li Baasae, la xquechan setel ta coralton li lum Ramae; isut batel ta Tirsa.

²² Li ajvalil Asae la stac ta iq'uel scotol li israeletic ta Judae, me junuc mu'yuc boch'o xcom. Bat yich'ic tal scotol li tonetic, li te'etic sventa ta set ox ta coralton lum Ramá li ajvalil Baasae. Li Asae ja' la set o ta coralton li lum Geba ta Benjamine xchi'uc li lum Mizpae.

Icham Asa

²³ Scotol li yantic sc'oplal Asae, xchi'uc ti c'u sjalil i'abteje, xchi'uc scotol li c'usitic la spase, xchi'uc li lumetic la spase te ts'ibabil scotol ta svunal c'usitic ic'ot ta pasel yu'un li ajvaliletic ta Judae. C'alal mol xa'ox li Asae, ilic chamel ta yacan.

²⁴ C'alal ichame, te bat yich' muquel ta Lum yu'un David yo' bu mucul li smoltotac ta vo'onee. Ja' i'och ta xq'uexol jun xnich'on, Josafat sbi.

Li Nadabe i'och ta ajvalilal ta Israel

²⁵ C'alal xchibal xa'ox jabil yochel ta ajvalilal ta Judá li Asae, ja'o i'och ta ajvalilal ta Israel li Nadab, xnich'on Jeroboame. Chib no'ox jabil i'abtej.

²⁶ Puru chopol c'usi la spas ta stojol li Muc'ul Diose. Ja' co'ol la spas jech chac c'u cha'al li stote, xchi'uc ja' ta scoj ti laj yac'be sa' smulic li israeletique.

²⁷ Li Baasa, xnich'on Ahías liquem ta jchop yu'un Isacare, la stsob xchi'iltac; bat smilic li Nadab c'alal ja'o te oy ta Gibetón ta yosilal filistaetique. Yu'un li Nadabe te batem setuic li lum Gibetón xchi'uc scotol israeletique.

²⁸ Ja'o la smilic ti c'alal yoxibal xa'ox jabil yochel ta ajvalilal ta Judá li Asae. Ja' lic ochuc ta ajvalilal stuc li Baasae.

²⁹ C'alal la stsac yabtele, lic smilbe scotol li xnich'nabtac Jeroboame. Ja' ic'ot o ti jech ono'ox laj yal Muc'ul Dios ta sventa li j'alc'op Ahías nacal ta Siloe.

³⁰ Ti jech ic'ot ta pasele, ja' ta scoj smul li Jeroboame xchi'uc ta scoj ti laj yac'be sa' smulic li israeletique, jech la sa'be sc'ac'al yo'nton li Muc'ul Dios yu'un Israele.

³¹ Li yantic sc'oplal Nadabe xchi'uc scotol li c'usitic la spase te ts'ibabil scotol ta svunal c'usitic ic'ot ta pasel yu'un ajvaliletic ta Israel.

³² Li Asa xchi'uc Baasa, ajvalil ta Israele, scotol ora la stsaquilan sbaic ta pleito.

Li Baasae i'och ta ajvalilal ta Israel

³³ C'alal yoxibal xa'ox jabil yochel ta ajvalilal ta Judá li Asae, li Baasa, xnich'on Ahiase, ja'o i'och ta ajvalilal te ta Tirsa ta sventa scotol Israel. Chanib xcha'vinic (24) jabil i'abtej.

³⁴ Pero toj chopolic c'usi la spas ta stojol li Muc'ul Diose; ja' co'ol la spas jech chac c'u cha'al li Jeroboame. Ja' ta scoj ec ti la sa' smulic li israeletique.