1 Reyes 14 - Bible in Tzotzil de Chenalhó with Deuterocanon

Li j'alc'op Ahiase laj yal c'usi chc'ot ta pasel ta stojol Jeroboam

¹ Ja'o yorail itsacat ta chamel li Abías, xnich'on Jeroboame.

² Li Jeroboame jech laj yalbe li yajnile: —Jeltao aba yu'un jech mu xayotquinicot ti vo'ot cajnilote. Batan ta Silo, yu'un ja' te nacal li j'alc'op Ahías li boch'o laj yalbun ti vu'un chi'och ta ajvalilal yu'un jchi'iltactique.

³ Ich'o batel lajunebuc pan, xchi'uc yan muc'tic pan, xchi'uc jun bin spom muc'ta pom. Bat c'opano, yu'un ja' xu' chayalbot c'usi ta jpastic ta sventa li olole —xut.

⁴ Li yajnil Jeroboame jech la spas. La xchapan sba; ibat ta Silo. Te ic'ot ta sna li j'alc'op Ahiase. Li Ahiase muc xotquin, yu'un maquem xa sat ta smalubel.

⁵ Pero ac'bil xa ono'ox sna' yu'un Muc'ul Dios ti ja' yajnil Jeroboam te chbat sjac' c'usi tspas ta sventa yol ti ip cha'ye. Xchi'uc albil xa ono'ox c'u x'elan xu' tstac'be, xchi'uc albil noxtoc ti sjeltaoj sba batele.

⁶ C'alal laj ya'ay Ahías ti te xa chanov batel ta ti'na li antse, jech laj yalbe: —Ochan tal, yajnil Jeroboam. ¿C'u yu'un ti ac'atajesoj aba tale? Vu'un quich'oj cabtel ta sventa oy c'usi tsots chacalbot.

⁷ Sutan batel, xc'ot avalbe Jeroboam ti jech yaloj li Muc'ul Dios yu'un Israele: ‘Vu'un la jt'ujot loq'uel ta stojol achi'iltac ta israelal yu'un laj cac' ochan ta banquilal yu'unic li jteclumale, ja' li israeletique.

⁸ Ja' la jtuch'be yabtel li smomnich'nab Davide; vo'ot laj cac'bot. Pero li vo'ote mu jechuc laj apas jech chac c'u cha'al li cajtunel David ti scotol yo'nton laj xch'un li jmantaltaque, ti ja' no'ox la sts'aclinune. Puru lec c'usitic la spas ta jtojol.

⁹ Pero li vo'ote toj ech'em no'ox chopol laj apas jech chac c'u cha'al ijelovic li yantique yu'un laj apas yantic diosetic ta unijesbil taq'uin. Vu'un laj ava'lupatinun comel, jech laj asa'bun o sc'ac'al co'nton.

¹⁰ Jech ta xcac'be svocol li avalab anich'nabe. Ta jmil scotol li queremetic avu'une, me junuc mu'yuc cuxul ta xcom. Ta jmes loq'uel scotol li amomnich'nab jech chac c'u cha'al chich' mesel loq'uel c'a'epe.

¹¹ Me te ta yut lum chcham li queremetic avu'une, ta xlajic ta ti'el ta ts'i'. Yan li boch'otic ta xchamic ta te'tique, te ta xlajic ta ti'el ta xulem. Jech chcal, vu'un li Muc'ul Diosune’, xi li Diose, uto c'otel.

¹² “Ja' yu'un sutan batel ta ana. C'alal ja' to no'ox chajet ochel jun avacan ta yut lume, ja'o chcham li avole.

¹³ Scotol li israeletique ta xoc'taic, xchi'uc chbat smuquic. Ja' no'ox jun xnich'on Jeroboam ti ta to xich' muquele. Yu'un ja' xa no'ox jun ti oy to c'usi lec ch-ilbat yu'un Muc'ul Dios, ja' li Dios yu'un Israele.

¹⁴ Li Muc'ul Diose ta xac' ochuc yan ajvalil yu'un li Israele; ja' ta xulesbe o scotol li smomnich'nab Jeroboame. Ja' xa sc'ac'alil li'i; mu xa xjalij.

¹⁵ Li Muc'ul Diose ta to slilin li israeletic jech chac c'u cha'al ajtic ti chich' niquilanel yu'un yip uc'ume. Ta to sloq'ues batel li' ta lequil banamil ti ac'bilic ono'ox li smoltotique. Ta spuc batel ta jelovel to uc'um Éufrates ta scoj ti la spasbeic sloc'obaltac Aserae, jech laj yaq'uic ilinuc ta stojolic li Muc'ul Diose.

¹⁶ Li Muc'ul Diose ta to xac' ta c'abal israeletic ta scoj smul li Jeroboame yu'un ep la sa' smul, xchi'uc laj yac'be sa' smulic ec li israeletique —xut.

¹⁷ Li yajnil Jeroboame isut batel ta Tirsa. C'alal naca to la sjet ochel yacan ta smarcoal sti' snae, ja'o icham li yole.

¹⁸ Scotol israeletic ibat smuquic, xchi'uc laj yoc'taic. Ja' ic'ot o jech chac c'u cha'al laj yal Muc'ul Dios ta sventa li j'alc'op Ahiase.

¹⁹ Li c'usitic yantic la spas Jeroboame, xchi'uc li pleito la spase, xchi'uc ti c'u x'elan la spas yabtel ta ajvalilale te ts'ibabil ta svunal c'usitic ic'ot ta pasel yu'un li ajvaliletic ta Israele.

²⁰ Li Jeroboame chib xcha'vinic (22) jabil i'abtej ta ajvalilal. C'alal ichame, te bat yich' muquel yo' bu mucajtic li smoltotaque. Ja' i'och ta xq'uexol jun xnich'on, Nadab sbi.

I'och ta ajvalilal ta Judá li Roboame

²¹ Li Roboam, xnich'on Salomone, i'och ta ajvalilal ta Judá. Yich'oj xa'ox jun yoxvinic (41) jabil ti c'alal i'och ta ajvalilale. Vuclajuneb (17) jabil i'abtej ta Jerusalén, ja' li lum ti t'ujbil yu'un Muc'ul Dios ta scotol jaychop israeletic sventa te chich' ich'el ta muq'ue. Li sme' Roboame Naama sbi; liquem ta lum Amón.

²² Li judaetique chopol c'usi la spasic ta stojol li Muc'ul Diose. Ja' xjelov to laj yaq'uic ilinuc Muc'ul Dios jech chac c'u cha'al i'ilin ta scoj smul li smoltotic ta vo'onee.

²³ Yu'un la spas snail sdiosic ta jolvitsetic, xchi'uc la spasic loc'ometic, xchi'uc sloc'obaltac Asera. La sva'ananic ta tseltseltic ta yolon te'etic.

²⁴ Xchi'uc oy jmulavil viniquetic te oyic, Sodomaetic sbiic, la stsob sbaic ta spasel muliletic jech chac c'u cha'al la spasic li yanlum cristianoetic ti inutsbatic loq'uel yu'un Muc'ul Dios ta stojol li israeletique.

²⁵ C'alal yo'bal xa'ox jabil yochel ta ajvalilal li Roboame, li Sisac, ja' li ajvalil ta Egiptoe, ibat scontrain li Jerusalene.

²⁶ Laj yich'ic batel scotol li sc'ulejal xch'ulna Muc'ul Diose xchi'uc li sc'ulejal spasubmantal ajvalile. Scotol la stsobic batel. Laj yich'ic batel noxtoc li macubbailetic sventa pleito pasbil ta c'anal taq'uin yu'un Salomone.

²⁷ Li ajvalil Roboame la spasbe xq'uexol li macubbailetique; ta bronce taq'uin xa la spas. Ja' laj yac'be li banquilal soldadoetic ti te chchabiic sti' spasubmantale.

²⁸ C'alal chbat jujun velta ta xch'ulna Muc'ul Dios li Roboame, li jchabi ti'naetique te chich'ic batel li macubbailetique. Ts'acal te chbat yac' ta scuartoic.

²⁹ Li yantic sc'oplal Roboam, xchi'uc li c'usitic la spase te ts'ibabil ta svunal c'usitic ic'ot ta pasel yu'un li ajvaliletic ta Judae.

³⁰ Scotol c'ac'al puru pleito la spasic li Roboam xchi'uc Jeroboame.

³¹ C'alal icham li Roboame, te bat yich' muquel yo' bu mucul smoltotac te ta Lum yu'un David. Li sme'e Naama sbi; liquem ta lum Amón. Ja' i'och ta xq'uexol jun xnich'on, Abiam sbi.