1 Reyes 13 - Bible in Tzotzil de Chenalhó with Deuterocanon

Oy jun j'alc'op la staq'ui li Jeroboame

¹ Oy jun j'alc'op yu'un Dios liquem ta Judá te ic'ot ta Betel; ja' tacbil batel yu'un Muc'ul Dios. Li Jeroboame ja'o te chchic' pom ta scajleb.

² Ta smantal Muc'ul Dios tsots c'ot c'opojuc sventa tscontrain li scajleb xchic'ubil pome, jech laj yal: “Scajleb matanal, scajleb matanal, li Muc'ul Diose jech ta xal: ‘Ta stojol smomnich'nabtac David ta xvoc' jun querem, Josías sbi. Ja' te chlic smil ta aba li paleetic yu'un yan diosetic ti te chchiq'uic pom ta abae, xchi'uc te chlic xchic' sbaquil cristianoetic ta aba’, xi li Muc'ul Diose”, xi li j'alc'ope.

³ Te lic yac' ta ilel tsots sq'uelubil li j'alc'ope, jech laj yal: “Li'i ja' sq'uelubil li c'usi yaloj Muc'ul Diose: ‘Li scajleb matanal li'i biq'uitic ta xlilij. Li tan te oy ta sbae ta xtanij batel’, xi li Muc'ul Diose”, xi li j'alc'ope.

⁴ C'alal laj ya'ay ajvalil Jeroboam c'usi laj yal yaj'alc'op Dios ta sventa li scajleb xchic'ubil pom te ta Betele, lic stoy tal sc'ob ta scajleb li xchic'ubil pome, jech laj yal: “Chuquic”, xi. Pero li sc'ob xbechoje te te'el icom o; mu xa xu' tsbaq'ues.

⁵ Te no'ox ta ora ililij li scajleb xchic'ubil pome. Li tan te oy ta sbae la spuc sba batel, yu'un jech i'ac'bat spas sq'uelubil stsatsal Muc'ul Dios li j'alc'ope.

⁶ Ja' yu'un li ajvalile jech laj yalbe li j'alc'ope: —Ach'ul vocoluc, c'opano li Muc'ul Dios avu'une yu'un ac'o lecubuc yan velta li jc'obe —xut. Li j'alc'ope la sc'opan li Muc'ul Diose jech ilecub yan velta sc'ob li ajvalile, jech icom jech chac c'u cha'al ono'oxe.

⁷ Li ajvalile jech laj yalbe li j'alc'ope: —Batic ta jna; ta xcac'bot jutuc ave'el xchi'uc ta xcac'bot amoton —xi.

⁸ Pero li yaj'alc'op Diose jech laj yalbe li ajvalile: —Ac'o me chavoc'bun ta o'lol ti c'u yepal oy avu'un ta apasubmantale, mu'yuc chbat jchi'inot; mu'yuc chbat jve' pan, mu'yuc chbat cuch' vo' ti bu chavale,

⁹ yu'un jech yalojbun li Muc'ul Diose: ‘Mu xave' pan, mu xavuch' vo', xchi'uc mu me xasut batel yan velta ta be ti bu chabate’, xiyutun li Muc'ul Diose —xi li j'alc'ope.

¹⁰ Ja' yu'un li j'alc'ope yan be xa la stam batel. Mu xa ja'uc te isut batel ta be ti bu ono'ox ibat c'alal ibat ta Betele.

¹¹ Oy jun mol j'alc'op te nacal ta Betel. I'albat yu'un xnich'nab c'usi ay spas te ta Betel li jun j'alc'op liquem ta Judae, xchi'uc laj yalbeic noxtoc c'usi laj yal ec li ajvalile.

¹² Jech la sjac' li mol j'alc'ope: —¿Bu beal ibat? —xi. Te i'ac'bat yil yu'un xnich'nab ti bu beal la stam batele.

¹³ Jech laj yalbe li xnich'nabe: —Cajanbeic smontura li buroe —xut. Li xnich'nabe la scajanbeic smontura li sburoe, jech icaji batel li mol j'alc'ope.

¹⁴ Ja' te ibat yo' bu ibat li j'alc'op liquem ta Judae. Te chotol c'ot sta ta yolon jpets tulan, jech la sjac'be: —¿Me vo'ot li yaj'alc'opot Dios liquemot tal ta Judae? —xut. —Vu'un —xi.

¹⁵ —Batic ta jna, bat ve'an jutuc pan —xi li mol j'alc'ope.

¹⁶ Li j'alc'op liquem ta Judae jech la stac': —Mu xu' ta jchi'inot sutel, xchi'uc mu xu' chbat jve' pan, chbat cuch' vo' te yo' bu nacaloxuque.

¹⁷ Yu'un jech yalojbun li Muc'ul Diose: ‘Mu me xave' pan, mu me xavuch' vo' li'i, xchi'uc mu me teuc xasut batel yan velta ta be ti bu latale’, xiyutun —xi li j'alc'ope.

¹⁸ Pero li mol j'alc'ope lic epalc'opojuc, jech laj yal: —Li vu'une j'alc'opun ec jech chac c'u cha'al li vo'ote. Oy jun j'almantal tac'bil tal yu'un Muc'ul Dios laj yalbun ti persa chquic'ot batel ta jna, chbat ve'an chbat avuch' vo' tee —xut.

¹⁹ Jech li j'alc'op liquem ta Judae isut batel; te ive' laj yuch' vo' ta sna.

²⁰ C'alal ja'o te chotolic ta ti'mexae, ic'opanat yu'un Muc'ul Dios li mol j'alc'op ti i'ic'van sutel ta snae.

²¹ Ja' yu'un ta sventa Muc'ul Dios jech ic'opoj, jech laj yalbe li j'alc'op liquem ta Judae: —Ta sventa muc xavich' ta muc' c'usi yalojbot li Muc'ul Diose,

²² yu'un lasut tal ve'an avuch' vo' ti bu yalojbot Muc'ul Dios mu xu' chave' chavuch' vo'e, jech mu'yuc te ta xich' muquel abec'tal yo' bu mucajtic li amoltot ayame'e —xi.

²³ C'alal ilaj yo'nton ta ve'el ta uch' vo' li j'alc'op liquem ta Judae, li mol j'alc'ope la scajanbe smontura sburo;

²⁴ te laj yac' cajiuc batel li j'alc'op liquem ta Judae. Pero te ital macatuc ta be yu'un jun león, jech te imilat o; te telel icom ta be. Li buro xchi'uc li leone te oyic o ta sts'el li animae.

²⁵ C'alal oy boch'o te ijelovique, laj yilic ti te telel ta be li animae xchi'uc te oy noxtoc li leone. C'alal ic'otic ta lum te yo' bu nacal li mol j'alc'ope, c'ot yalic li c'usi laj yilic ta bee.

²⁶ C'alal laj ya'ay li mol j'alc'ope, te it'ab ta yo'nton ti ja' li j'alc'op laj yac' sutuc batel ta snae, jech laj yal: “Ja' li j'alc'op ti la sbajbe smantal Muc'ul Diose. Ja' yu'un li Muc'ul Diose laj yac' milatuc ta león jech chac c'u cha'al yalojbe ono'oxe”, xi.

²⁷ Jech ta ora lic yalbe xnich'nab ti ac'o scajtsanbeic smontura jcotuc sburoe, jech lic scajtsanic.

²⁸ Icaji batel ta ora li mol j'alc'ope. Te telel la sta ta be li animae, xchi'uc te oy noxtoc li leone xchi'uc li buroe. Li leone mu'yuc la sti' li animae, xchi'uc mu'yuc la smil noxtoc li buroe.

²⁹ Li j'alc'ope laj yich'be batel sbec'tal li j'alc'op liquem ta Judae. La scajan batel ta sburo; la xcuch sutel ta slumal, yu'un ac'o yat yo'ntonic, xchi'uc ac'o smucbe li sbec'tale.

³⁰ Te bat smuc ta smuquinal stuc; te lic yoc'ta, jech laj yal: “Ay, toj abul aba quits'in”, xut.

³¹ C'alal mucbil xa'ox yu'une, jech laj yalbe li xnich'nabe: —C'alal me lichame, li' xamuquicun yo' bu la jmuc li yaj'alc'op Diose. Te jmoj xavaq'uic li jbaquilcutique.

³² Yu'un ta ono'ox xc'ot ta pasel li c'usi laj yal ti i'ac'bat sna' yu'un Muc'ul Dios ta sventa li scajleb matanal ta Betele xchi'uc ta sventa li snailtac diosetic ta lumetic li' ta Samaria banamile —xut.

³³ Ac'o me jech i'albat, pero li Jeroboame mu'yuc ono'ox la scomtsan li c'usi chopol tspase, yo'to lic st'ujan paleetic yu'unic te ta stojol li israeletique yu'un ac'o tunicuc te ta snail li diosetic yu'unique. Li boch'o jech la sc'anique la sts'u'iltas o sventa paleal.

³⁴ Ta sventa ti toj chopol c'usi la spas li Jeroboame jech la sta smul o, jech j'ech'el laj yich' tu'pbel sts'unubalic xchi'uc xnich'nab xchi'uc smomnich'nabtac li' ta sba banamil.