1 Reyes 12 - Bible in Tzotzil de Chenalhó with Deuterocanon

Ipas ta chib ajvalil yu'un li israeletique

¹ Li Roboame ibat ta Siquem, yu'un te batemic scotol israeletic sventa tstiq'uic ta ajvalilal li Roboame.

² Li Jeroboam, xnich'on Nabat ti te oy ta Egipto ta scoj ijatov batel yu'un li ajvalil Salomone, laj ya'ay ti jech ic'ot ta pasele.

³ Jech la staquic ta iq'uel, c'alal ivule bat xchi'in scotol li israeletique, yu'un bat sc'opanic li Roboame jech c'ot yalbeic:

⁴ —Li atote toj tsots cabtel laj yac'buncutic. Ja' yu'un li vo'ote yochbuncutic jutuc li cabtelcutique yu'un xco'laj xchi'uc alal icatsil ta cuchel chca'icutic, jech jun co'nton li' chituncutic avu'un —xutic.

⁵ Itac'ov li Roboame: —Sutanic to batel. Ja' to xatalic ta oxib c'ac'al —xut. Jech isutic batel.

⁶ Li ajvalil Roboame lic sjac'be li moletic yu'un israeletic ti i'abtejic yu'un Salomón c'alal cuxul to'oxe. Jech la sjac': —Coltaicun ca'tic. ¿C'uxi ta jtac'be xana'ic li jchi'iltactique? —xut.

⁷ Jech laj yalic: —Me lec chacolta li jchi'iltactic le'e, me chapasbe li c'usi tsc'anique xchi'uc me lec chatac'bee, jech xu' li chtunic o ta atojol —xiic.

⁸ Pero li Roboame muc' xich'be ta muc' c'usi laj yalic li moletique. Ja' bat sc'an coltael yu'un li queremetic ti co'ol te ich'iic xchi'uque, ti te ch-abtejic yu'une,

⁹ jech la sjac'be: —¿C'uxi ta jtac'be xana'ic li jchi'iltactic le'e ti tsc'anic ta jsayubtasbeic jutuc yicatsic ti ac'bilic comel yu'un li anima jtote? —xut.

¹⁰ Itac'ov li queremetique: —Li jchi'iltactique ja' jech xatac'be chac li'i: ‘Ti me toj tsots la smozoinoxuc li jtote, li vu'une xjelov to stsatsal ta xcac' avocolic.

¹¹ Me toj ol avicatsic laj yac'boxuc li jtote, li vu'une xjelov to yalal chacac'boxuc. Me nucul no'ox laj yac'boxuc li jtote, li vu'une chacac'boxuc nucul ti oy staq'uinal sni'e’, uto —xiic.

¹² Ta yoxibal c'ac'al italic li Jeroboam xchi'uc scotol israeletique yu'un jech i'albatic yu'un li ajvalil Roboame.

¹³ Pero li ajvalile toj tsots la stac'be; muc ja'uc xich'be ta muc' sc'opic li moletique.

¹⁴ Ja' laj yalbe jech chac c'u cha'al laj yalic li queremetique, jech laj yalbe: “Me ol avicatsic laj yac'boxuc li jtote, li vu'une xjelov to yalal chacac'boxuc. Me nucul no'ox laj yac'boxuc li jtote, li vu'une chacac'boxuc nucul ti oy staq'uinal sni'e”, xut.

¹⁵ Li ajvalile muc xich'be ta muc' sc'opic li xchi'iltaque yu'un jech xa snopoj Muc'ul Dios ac'o c'otuc ta pasel c'usi laj yalbe li Jeroboam, xnich'on Nabat, c'alal la xch'amanbe ye li j'alc'op Ahías liquem ta Siloe.

¹⁶ C'alal laj yil scotol israeletic ti muc x'ich'atic ta muc' yu'un li ajvalile, jech laj yalbeic: “Mu xa co'oluc co'ntontic xchi'uc li Davide; mu xa co'oluc jmoltot jyame'tic jchi'uctic. Sutcutic ta jnatic vu'utic li israeletique; ac'o sventain stuc yalab xnich'nab li Davide”, xiic. Jech isut batel ta snaic scotol li israeletique.

¹⁷ Li israeletic te nacalic ta lumetic ta yosilal Judae, ja' ajvalil icom yu'unic li Roboame.

¹⁸ Li ajvalil Roboame la stac batel ta tij vinic li Adorame yu'un ja' sventainoj li abtel ti oy sujelal chich' pasele. Pero li israeletique la smilic ta ton. Ja' yu'un li ajvalil Roboame imuy ta scareta ta ora; ijatov batel ta Jerusalén.

¹⁹ Ja' jech la svoc' sbaic ta stojol smomnich'nabtac David li israeletique. Ja' jech oyic o c'alal to tana.

²⁰ C'alal laj ya'yic scotol israeletic ti sutem xa tal li Jeroboame, la staquic ta iq'uel, yu'un ac'o taluc yo' bu tsobol scotol li jteclume. Jech te la stiq'uic ta ajvalilal yu'unic ta sventa li Israele; me jchopuc mu'yuc boch'o la snaban sba ta stojol li smomnich'nabtac Davide. Stuc no'ox icomic o li jchop yu'un Judae.

²¹ C'alal ic'ot ta Jerusalén li Roboame, la stsob balunvinic ta mil (180,000) yajsoldadotac ti st'ujanoj loq'uel ta jchop yu'un Judá xchi'uc Benjamine, yu'un chbat spasic pleito xchi'uc li israeletique yu'un jech ac'o suticuc tal ta stojol.

²² Pero li Muc'ul Diose la sc'opan li yaj'alc'op Semaiase, jech laj yalbe:

²³ “Jech xbat avalbe li Roboam, ajvalil ta Judae, ja' li xnich'on Salomone, xchi'uc scotol li judaetic, xchi'uc li benjaminetique, xchi'uc li yan xchi'iltaquique:

²⁴ ‘Vu'un ta xcalbeic ti mu me xbat spasic pleito xchi'uc li achi'iltaquic ta israelale. Ac'o suticuc batel ta snaic. Ti jech ic'ot ta pasele yu'un jech ono'ox jnopoj’, uto li Roboame”, x'utat li Semaiase. C'alal laj ya'yic c'usi i'albatic yu'un li Muc'ul Diose, isutic batel ta snaic.

Li Jeroboame la sta smul ta sventa ti ja' laj yich' ta muc' li yan diosetique

²⁵ Li Jeroboame la xcha'va'an lec li lum Siquem te ta vitsetic ta yosilal Efraine; ja' te inaqui o. Ts'acal la xcha'va'an noxtoc li Penuele.

²⁶ Ts'acal jech la snop li Jeroboame: “Oy yic'al xu' te chlic muq'uibuc o yabtelic ta ajvalilal smomnich'nabtac David

²⁷ me te chc'ot yaq'uilanic o milbil matanal ta xch'ulna Muc'ul Dios ta Jerusalén li jteclumale. Xu' te chlic yac' sbaic o ta stojol yan velta li Roboame. Li vu'une xu' chlic smilicun; ja' te chbatic o ta stojol Roboam, ajvalil yu'un Judae”, xi la snop.

²⁸ C'alal laj xa'ox snopilan c'usi xu' tspas, te lic spas cha'cot sloc'obal ch'ium tot vacaxetic, jech laj yalbe li israeletique: “Jchi'iltac, toj ep xa ta velta lac'otilanic ta Jerusalén. Li' oy diosetic avu'unic, ja' ti la sloq'uesoxuc tal ta Egiptoe”, xut.

²⁹ Jun laj yac' ta Betel, jun ta Dan.

³⁰ Ja' jech la sta smulic o ta stojol Dios li israeletique yu'un scotolic te ibatic ta Betel xchi'uc ta Dan, bat yich'ic ta muc'.

³¹ La spasbe snailtac noxtoc bu xu' chich'ic ta muc' li sdiosique, xchi'uc la st'uj paleetic yu'unic ti muc ja'uc levietique.

³² Jech lic spas jun muc'ta q'uin ta yo'lajunebal c'ac'al yochel li xvaxquibal u jech chac c'u cha'al yorail muc'ta q'uin yu'unic te ta Judae. Li Jeroboame ja' stuc laj yac' milbil matanal te ta scajleb li matanale. Ja' jech la spas noxtoc te ta Betel. La smilbe smoton li sloc'obal ch'ium tot vacaxetic la spase, xchi'uc la st'uj paleetic yu'unic sventa te ch-abtej ta snail li diosetic yu'unique.

³³ Ja' yu'un li Jeroboame ta yo'lajunebal c'ac'al yochel li xvaxquibal ue, bat yac' milbil matanal ta scajleb ti yac'oj ta meltsanel te ta Betele. Ja' li u la snop ta yo'nton stuque. Laj yal ti ja' q'uin yu'un israeletic sventa sdiosique, xchi'uc ti ja' yual chbat xchiq'uic pom te ta scajlebe.