1 Reyes 10 - Bible in Tzotzil de Chenalhó with Deuterocanon

Ay vu'lanatuc yu'un ajvalil ants ta Sabá li Salomone

^1-2 C'alal laj ya'ay ajvalil ants ta Sabá ti toj lec puquem sc'oplal ta sventa Muc'ul Dios li Salomone, ibat ta Jerusalén yu'un oy c'usi toj tsotsic bat sjac'be li Salomone. Yan to sba yepal xchololetic tal li j'abteletic yu'une. Bats'i ep perfumeetic xcuchojic batel ta camelloetic, xchi'uc ep c'anal taq'uinetic, xchi'uc lequil tonetic ti c'upilic sbae. C'alal ic'ot ta stojol li Salomone, c'ot sjac'be scotol li c'usitic snopoj tsjaq'ue.

³ Li Salomone ivu' yu'un staq'uel scotol li c'usitic la sjaq'ue, me jbeluc mu'yuc c'usi ti muc sna' staq'uele.

⁴ C'alal laj yil ajvalil ants ta Sabá c'u x'elan sbijil li Salomone, xchi'uc c'u yutsil li spasubmantal spasoje,

⁵ xchi'uc c'u x'elan ve'liletic oy ta xmexae, xchi'uc c'u x'elan oyic li j'abteletic yu'une, xchi'uc c'u x'elan li smozotaque xchi'uc li sc'u' spoq'uique, xchi'uc sc'u' spoq'uic li j'ac' ya'lel ts'usub yu'une, xchi'uc c'u x'elan li smoton Dios chchic'beic ta ch'ulna yu'un Muc'ul Diose, toj ch'ayel ic'ot yo'nton.

⁶ Jech laj yalbe li ajvalile: “Ta melel yu'un ono'ox jech ti c'u x'elan ca'yoj ac'oplal te ta jlumal ti toj lec avabtele, xchi'uc ti toj ech'em abijile.

⁷ Muc to'ox jch'un, pero tana ta jch'un, yu'un tal jq'uel ta jsat jtuc. Ti c'u yepal yalojbicun ac'oplale, bats'i mu sta o'lol. Yu'un li abijile xchi'uc li c'usitic oy avu'une toj ep jeloven jech chac c'u cha'al ca'yoje.

⁸ Toj xcuxet no'ox yo'ntonic li avinictaque, xchi'uc li j'abteletic avu'un ti li' oyic ta ats'el ti scotol c'ac'al cha'yic c'u x'elan li abijil chac'opoje.

⁹ Ac'o Ich'atuc ta muc' li Muc'ul Dios avu'une yu'un lec laj yilot, jech la xchotanot ta ajvalilal sventa Israel. Yu'un li Muc'ul Diose lec ono'ox sc'anoj li jun lum Israele, jech laj yac' ochan ta ajvalilal yu'unic, jech tuc' ac'o apas mantal, xchi'uc tuc' ac'o chapanvanan”, xi li ajvalil antse.

¹⁰ Li ajvalil antse lic yac'be ta sc'ob oxmil xchi'uc baluneb ciento xchi'uc oxvinic (3,960) kilo c'anal taq'uin, xchi'uc epal perfumeetic xchi'uc lequil tonetic ti c'upilic sbae. Mu'yuc ono'ox bu xilic jech epal perfumeetic jech chac c'u cha'al yepal laj yac'be ajvalil Salomón li ajvalil ants ta Sabae.

¹¹ Jech noxtoc li barco yu'un Hiram ti ay yich'ic o tal c'anal taq'uin te ta Ofire, laj yich'ic o tal ep sándalo te'etic xchi'uc lequil tonetic.

¹² Li sándalo te'etique ja' la stunes Salomón c'alal la spas li smac tec'ubal yu'un xch'ulna Muc'ul Diose xchi'uc li spasubmantale, xchi'uc ja' la spas o li arpaetic ta sventa sonetique. Mu'yuc ono'ox baq'uin jech xilic epal sándalo te' c'alal to tana.

¹³ Li Salomone laj yac'be ajvalil ants ec scotol li c'usi la sc'ane. Ja' slecoj o li c'usitic laj yac' ta yutsil yo'nton stuc li Salomone. Ts'acal isut batel ta yosilal li ajvalil antse xchi'uc li j'abteletic yu'une.

Ipuc sc'oplal xchi'uc sc'ulejal li Salomone

¹⁴ Ti c'u yepal c'anal taq'uin chich' ta jujun jabil li Salomone ja' chib xcha'vinic ta mil (22,000) kilo.

¹⁵ Ja' mu'yuc atbil li spatanic jmanulajeletic jchonolajeletique, xchi'uc li muc'tic ajvaliletic ta Arabia banamile, xchi'uc li jpasmantaletic te ta slumale.

¹⁶ Li Salomone laj yac' ta pasel chib ciento (200) muc'tic macubbailetic sventa pleito ta c'anal taq'uin. Li jujune ja' yich'oj vaquib kilo c'anal taq'uin lec tenbil.

¹⁷ Jech noxtoc laj yac' ta pasel yan oxib ciento (300) bic'tal macubbailetic. Li jujune ja' ech'em jutuc ta o'lol xchibal kilo c'anal taq'uin lec tenbil. Te la sjoc'anan ta spasubmantal yo' bu “Toyolaltic yu'un Líbano” sbie.

¹⁸ Laj yac' ta pasel noxtoc jun muc'ta chotlebal pasbil ta sts'uts'up tsemen; la xpixic lec ta c'anal taq'uin.

¹⁹ Li muc'ta chotlebale oy vaccoj stec'ubal; li sjol squiclebale ja' sepsep no'ox, xchi'uc oy jujun scajleb sc'ob ta jujujot. Te ta scajleb sc'obe oy jujucot sloc'obal leonetic te cotajtic.

²⁰ Te ta vaccoj tec'ubale oy yan lajchab (12) sloc'obal leonetic te, jujucot ta jujujot sjol li stec'ubale. Mu'yuc bu jech yantic ajvalil spasojic lequil chotlebal jech chac c'u cha'al la spas li Salomone.

²¹ Scotol li vasoetic yu'un ajvalil Salomone pasbilic ta c'anal taq'uin. Jech noxtoc scotol li c'usitic chtun ta xmexa te ta spasubmantal “Toyolaltic yu'un Líbano” sbie pasbilic ta puru c'anal taq'uin noxtoc. Me junuc mu'yuc c'usi pasbilic ta saquil taq'uin, yu'un c'alal yorail cuxul li Salomone ma'uc epal taq'uin li saquil taq'uine.

²² Yu'un li muc'tic barco yu'un ajvalil chanovic ta nab xchi'uc li sbarco Hirame, chtalic jun velta ta ox-ox jabil, chich'ic tal ep c'anal taq'uin, saquil taq'uin, sts'uts'up tsemen, maxetic, xchi'uc te'tical cotstuluq'uetic; chc'ot yac'beic li Salomone.

²³ Li ajvalil Salomone ja' no'ox stuc toj muc' ic'ot ta scotol yantic ajvaliletic li' ta banamil ta sventa li sbijil xchi'uc sc'ulejale.

²⁴ Scotol li ajvaliletic li' ta banamile chac sq'uelbe ya'yic sat li Salomone, xchi'uc chac ya'ibe ya'yic c'u x'elan li sbijil ac'bil yu'un Diose.

²⁵ Jech scotolic laj yich'beic batel smoton ta jujun jabil: c'usiuc no'ox laj yich'ic batel, me pasbil ta saquil taq'uin, ta c'anal taq'uin, vasoetic, c'u'iletic, abtejebaletic sventa pleito, xchi'uc c'usitic lec mu yic', ca'etic, xchi'uc mulaetic.

Li Salomone la xcha'chon caretaetic xchi'uc ca'etic

²⁶ Li Salomone la stsob ep caretaetic xchi'uc boch'o lec sna' xcajiic ta ca'. La sta jmil xchi'uc chanib ciento (1,400) caretaetic, xchi'uc lajcha'mil (12,000) lec sna' xcajiic ta ca'. Te laj yac'an ta lumetic sventa caretaetic sventa pleito, xchi'uc ta sna soldadoetic yu'un li ajvalil ta Jerusalene.

²⁷ Li Salomone bats'i ep saquil taq'uin la stsob te ta Jerusalén, busul no'ox jech chac c'u cha'al ton, xchi'uc ep ch'ut te'etic jech chac c'u cha'al te'tical higoetic ta stenlejaltic.

²⁸ Li ca'etic yu'un Salomone te liquemic tal ta Egipto xchi'uc ta Cilicia; ja' la smanic tal li jchonolajeletic yu'un ajvalile.

²⁹ Li jcot careta liquem tal ta Egiptoe ja' vaquib ciento (600) ta sep saquil taq'uin stojol. Li jcot ca'e ja' o'lol xchibal ciento (150) ta sep saquil taq'uin stojol. Scotol li ajvaliletic yu'un hetetique xchi'uc siriaetique ja' tal xcha'manbeic ec li j'abteletic yu'un Salomone.