1 Juan 4 - Bible in Tzotzil de Chenalhó with Deuterocanon

Sc'oplal boch'o oy lec xch'unojel yo'nton

¹ Quermanotac, vo'oxuc ti lec jc'anojoxuque, mu me xach'unic c'usi chalic me oy boch'o chayalboxuc ti ja' ac'bil sna'ic yu'un Ch'ul Espiritue. Ja' lec q'uelic ba'yuc me ja' Espíritu yu'un Dios oy ta stojolic, o me ma'uc. Yu'un oy xa ep jlo'lavanej j'alc'opetic li' ta banamil.

² Ja' jech xu' chavotquinic me ja' ventainbilic yu'un li Espíritu yu'un Diose: Me jamal chalic ti i'ay yich' sbec'tal li' ta banamil li Jesucristoe, ja' ventainbilic yu'un li Espíritu yu'un Diose.

³ Yan me mu jamaluc chalbeic sc'oplal li Jesucristoe, mu'yuc yich'ojic li Espíritu yu'un Diose; ja' yajcontratac Cristo. Ava'yojic ti ta ono'ox xtal li yajcontra Cristoe; oy xa li' ta banamil ta ora.

⁴ Jnich'nabtac, vo'oxuque xnich'naboxuc xa li Diose, jech laj xa atsalic li jlo'lavanej j'alc'opetique. Yu'un ja' xjelov svu'el li Ch'ul Espíritu oy ta atojolique; ja' mu sta jech svu'el li pucuj ti sventainoj li boch'otic oyic ta sventa banamile.

⁵ Yu'un li stuquique oyic ta sventa banamil, ja' yu'un ja' chalilanic c'usi sventa banamil. Jech ec li boch'otic oyic ta sventa banamile toj lec cha'yic.

⁶ Yan li vu'utique xnich'nabutic xa li Diose. Li boch'otic xotquinic Diose ta xa'ibutic li jc'optique. Yan li boch'o mu xotquinic Diose mu xich'ic ta muc' li jc'optique. Ja' jech ta xcotquintic li boch'otic ja' ventainbilic yu'un li Espíritu ti ja' melele. Jech ta xcotquintic noxtoc li boch'otic ja' ventainbilic yu'un jlo'lavaneje.

Ja' stalel jc'anvanej o li Diose

⁷ Quermanotac, vo'oxuc ti lec jc'anojoxuque, jc'anan me jbatic. Yu'un li c'anvaneje ja' te liquem tal ta stojol Dios. Scotol li boch'otic ta xc'anvanique ja' xa xnich'nab Dios, xotquin xa li Diose.

⁸ Yan li boch'otic mu xc'anvanique, mu to xotquinic li Diose. Yu'un li Diose ja' stalel ta xc'anvan o.

⁹ Li Diose laj yac' quiltic ti ep sc'anojutique, yu'un la stac tal li' ta banamil li jun no'ox Xnich'one, yu'un jech xu' ta jtatic jcuxlejaltic ta sventa.

¹⁰ Ja' jech laj quiltic c'u x'elan li c'anvaneje. Yu'un muc vu'uticuc ba'yuc la jc'antic li Diose; ja' ba'yuc la sc'anutic. Jech la stac tal li Xnich'one; ja' milbil matanal ic'ot ta sventa jmultic.

¹¹ Vo'oxuc ti lec jc'anojoxuque, me ja' jech la sc'anutic li Diose, ja' jech tsc'an ta jc'anan jbatic ec.

¹² Mu'yuc boch'o yiloj li Diose, pero me ta jc'anan jbatique, li' nacal ta co'ntontic. Jech yantic ch-epaj batel ta co'ntontic li c'anvanej yu'une.

¹³ Ti c'u x'elan ta jna'tic ti oyutic ta stojol Diose, xchi'uc ti li' nacal ta co'ntontic eq'ue, ja' ti laj xa yac'butic li Ch'ul Espíritu yu'une.

¹⁴ Li vu'uncutique laj quil jtuccutic ti la stac tal Xnich'on li Jtotic Diose sventa tal scolta li cristianoetic li' ta banamile.

¹⁵ Li boch'o ta xal ta jamal ti ja' Xnich'on Dios li Jesuse, te oy Dios ta yo'nton, jech ec li stuque te oy ta stojol li Diose.

¹⁶ Li vu'utique laj xa jna'tic, xchi'uc jch'unojtic xa ti sc'anojutic li Diose. Li Diose ja' stalel ta xc'anvan o. Li boch'o ta xc'anvane te oy ta stojol li Diose. Jech ec li Diose te nacal ta yo'nton.

¹⁷ Jech ch-epaj batel ta co'ntontic li c'anvanej yu'une. Jech mu'yuc chijxi' ti c'alal tsta sc'ac'alil chapanele; oy stsatsal co'ntontic. Yu'un c'alal li' oyutic ta banamile, ja' jech co'ntontic jech chac c'u cha'al yo'nton stuc li Jesucristoe.

¹⁸ Li boch'o c'otem ta yo'nton li c'anele, mu'yuc ta xi'. Yu'un li c'anel yu'un Diose ta sloq'ues batel li xi'ele. Yu'un li xi'ele ja' xi'elal stojol mulil. Li boch'o ta to xi'e, yu'un mu'yuc to c'otem lec ta yo'nton li c'anele.

¹⁹ Li vu'utique jc'anojtic xa li Diose, yu'un ba'yuc la sc'anutic.

²⁰ Pero me oy boch'o jech ta xal: “Li vu'une lec jc'anoj Dios”, me xie, pero me xti'et yo'nton yu'un xchi'ile, ja' j'epalc'op. Yu'un li boch'o mu sc'an xchi'il ti chil ta sate, ¿c'uxi xu' ta sc'an li Dios ti mu xilbe sate?

²¹ Yu'un li smantal Cajvaltic laj yalbutic comele: li boch'o ta sc'an Diose ac'o sc'an noxtoc li xchi'iltaque, xi.