1 Crónicas 6 - Bible in Tzotzil de Chenalhó with Deuterocanon

Sc'oplal xnich'nab Leví i'ochic ta paleal

¹ Li xnich'nab Levie ja' Gersón, Coat, xchi'uc Merari.

² Li xnich'nab Coate ja' Amram, Izhar, Hebrón, xchi'uc Uziel.

³ Li xnich'nab Amrame ja' Aarón, Moisés, xchi'uc María. Li xnich'nab Aarone ja' Nadab, Abiú, Eleazar, xchi'uc Itamar.

⁴ Li Eleazare inich'naj, Finees sbi. Li Fineese inich'naj, Abisúa sbi.

⁵ Li Abisuae inich'naj, Buqui sbi. Li Buquie inich'naj, Uzi sbi.

⁶ Li Uzie inich'naj, Zeraías sbi. Li Zeraiase inich'naj, Meraiot sbi.

⁷ Li Meraiote inich'naj, Amarías sbi. Li Amariase inich'naj, Ahitob sbi.

⁸ Li Ahitobe inich'naj, Sadoc sbi. Li Sadoque inich'naj, Ahimaas sbi.

⁹ Li Ahimaase inich'naj, Azarías sbi. Li Azariase inich'naj, Johanán sbi.

¹⁰ Li Johanane inich'naj, Azarías sbi; ja' ti i'och ta paleal te ta ch'ulna ta Jerusalén la spas Salomone.

¹¹ Li Azariase inich'naj, Amarías sbi. Li Amariase inich'naj, Ahitob sbi.

¹² Li Ahitobe inich'naj, Sadoc sbi. Li Sadoque inich'naj, Salum sbi.

¹³ Li Salume inich'naj, Hilquías sbi. Li Hilquiase inich'naj, Azarías sbi.

¹⁴ Li Azariase inich'naj, Seraías sbi. Li Seraiase inich'naj, Josadac sbi.

¹⁵ Li Josadaque chucbil ibat ti c'alal ichucatic batel yu'un ajvalil Nabucodonosor li Judá xchi'uc Jerusalene, yu'un jech la sc'an li Muc'ul Diose.

Sc'oplal smomnich'nabtac Leví

¹⁶ Li xnich'nab Levie ja' Gersón, Coat, xchi'uc Merari.

¹⁷ Li xnich'nab Gersone ja' Libni xchi'uc Simei.

¹⁸ Li xnich'nab Coate ja' Amram, Izhar, Hebrón, xchi'uc Uziel.

¹⁹ Li xnich'nab Merarie ja' Mahli xchi'uc Musi. Li'i ja' smomnich'nab li Levie.

²⁰ Li xnich'on Gersone Libni sbi. Li xnich'on Libnie Jahat sbi. Li xnich'on Jahate Zima sbi.

²¹ Li xnich'on Zimae Joa sbi. Li xnich'on Joae Iddo sbi. Li xnich'on Iddoe Zera sbi. Li xnich'on Zera Jeatrai sbi.

²² Li xnich'on Coate ja' Aminadab sbi. Li xnich'on Aminadabe Coré sbi. Li xnich'on Coree Asir sbi.

²³ Li xnich'on Asire Elcana sbi. Li xnich'on Elcanae Ebiasaf sbi. Li xnich'on Ebiasafe Asir sbi.

²⁴ Li xnich'on Asire Tahat sbi. Li xnich'on Tahate Uriel sbi. Li xnich'on Uriele Uzías sbi. Li xnich'on Uziase Saúl sbi.

²⁵ Li yan xnich'nab Elcanae ja' Amasai xchi'uc Ahimot.

²⁶ Li xnich'on Ahimote Elcana sbi. Li xnich'on Elcanae Zofai sbi. Li xnich'on Zofaie Nahat sbi.

²⁷ Li xnich'on Nahate Eliab sbi. Li xnich'on Eliabe Jeroham sbi. Li xnich'on Jerohame Elcana sbi.

²⁸ Li xnich'on Samuele ja' Vasni sbi li sbae; li yane Abías sbi.

²⁹ Li xnich'on Merarie Mahli sbi. Li xnich'on Mahlie Libni sbi. Li xnich'on Libnie Simei sbi. Li xnich'on Simeie Uza sbi.

³⁰ Li xnich'on Uzae Simea sbi. Li xnich'on Simeae Haguía sbi. Li xnich'on Haguiae Asaías sbi.

Sc'oplal jq'uejimoletic ta ch'ulna la st'uj David

³¹ Li'i ja' li jq'uejimoletic la st'uj Davide. Ja' yabtelic o chq'uejinic te ta xch'ulna Muc'ul Dios ti c'alal laj xa'ox stiq'uic ochel ta yut ch'ulna li caxae.

³² Ja' te iq'uejinic o ta yeloval ti'ch'ulna pasbil ta nucul c'alal to la spas yan ch'ulna yu'un Muc'ul Dios te ta Jerusalén li Salomone. Ts'acal te la sts'aquic yabtelic noxtoc jech chac c'u cha'al yabtelic ono'oxe.

³³ Li sbi boch'o te itunic o xchi'uc xnich'nabe ja' li'i: ja' smomnich'on Coat, Hemán sbi; ja' jq'uejimol. Li stot Hemane ja' Joel; ja' smoltotac li Samuel,

³⁴ Elcana, Jeroham, Eliel, Toa,

³⁵ Zuf, Elcana, Mahat, Amasai,

³⁶ Elcana, Joel, Azarías, Sofonías,

³⁷ Tahat, Asir, Ebiasaf, Coré,

³⁸ Izhar, Coat, Leví, ja' li xnich'on Israele.

³⁹ Ta stuq'uil sbats'ic'ob li Hemane ja' te la sva'an sba ta q'ueoj li yuts' yalale, ja' li Asaf xnich'on Berequiase; ja' smoltotac ta vo'one li Simea,

⁴⁰ Micael, Baasías, Malquías,

⁴¹ Etni, Zera, Adaía,

⁴² Etán, Zima, Simei,

⁴³ Jahat, Gersón, ja' li xnich'on Levie.

⁴⁴ Yan ta sts'et c'obe ja' te la sva'an sba li yan yuts' yalale, ja' li smomnich'on Merarie, ja' Etán sbi. Li Etane ja' xnich'on li Quisie; ja' smoltotac li Abdi, Maluc,

⁴⁵ Hasabías, Amasías, Hilquías,

⁴⁶ Amsi, Bani, Semer,

⁴⁷ Mahli, Musi, Merari, ja' li xnich'on Levie.

⁴⁸ Li yantic xchi'iltaquic ti co'ol levietic xchi'uque ja' icom ta yac'olic spasel scotol li abtel te ta ch'ulna yu'un Diose.

⁴⁹ Yan li Aarón xchi'uc xnich'nabe ja' yabtelic o chchic'beic smoton Dios te ta scajleb, xchi'uc chchiq'uic pom te ta scajleb. Xchi'uc ja' tspasic o li abtel te ta bats'i lequil ch'ul cuartoe. Xchi'uc ja' chac'beic ta ch'aybel smul xchi'iltaquic ta israelal jech chac c'u cha'al yaloj li Moisese, ja' li yajtunel Diose.

Sc'oplal smomnich'nab Aarón

⁵⁰ Li xnich'on xchi'uc smomnich'nab Aarone ja': Eleazar; li xnich'on Eleazare ja' Finees; li xnich'on Fineese ja' Abisúa; li xnich'on Abisuae

⁵¹ ja' Buqui; li xnich'on Buquie ja' Uzi; li xnich'on Uzie ja' Zeraías; li xnich'on Zeraiase

⁵² ja' Meraiot; li xnich'on Meraiote ja' Amarías; li xnich'on Amariase ja' Ahitob; li xnich'on Ahitobe

⁵³ ja' Sadoc; li xnich'on Sadoque ja' Ahimaas.

Sc'oplal lumetic yu'un levietic

⁵⁴ Li'i ja' sc'oplal bu inaquiic, xchi'uc sc'oplal sts'aquiltac yosilic li smomnich'nabtac Aarone. Li jchop sbiic smomnich'nab ti iliquic ta Coate ja' ic'ot ta stojolic ta sventa canal tajimol li

⁵⁵ lum Hebrón te ta yosilal Judae xchi'uc jutuc yosilal.

⁵⁶ Pero ti c'u smuc'ul banamil smacoj li lume xchi'uc li bic'tal lumetic yu'une ja' laj yich' li Caleb xnich'on Jefone.

⁵⁷ Li smomnich'nab Aarone ja' laj yich'ic li lum Hebrone; ja' snac'ubbailic ic'ot. Xchi'uc laj yich'ic noxtoc Libna, Jatir, Estemoa,

^58-59 Hilén, Debir, Asán, xchi'uc Bet-semes. Scotol li lumetic le'e laj yich'beic jutuc yosilal jujun.

⁶⁰ Li lumetic laj yich'ic te ta yosilic jchop liquemic ta Benjamine ja' Geba, Alemet, xchi'uc Anatot. Li jujun lume laj yich'beic jutuc yosilal. Ja' yu'un li lumetic laj yich'ic jchop sbiic smomnich'nab Aarone ja' oxlajuneb (13) ta scotol.

⁶¹ Li yan jchop sbiic smomnich'nabtac Coate ja' ic'ot ta stojolic lajuneb lumetic te ta yosilalic li o'lol jchop liquemic ta Manasese.

⁶² Yan li smomnich'nab Gersone ja' oxlajuneb (13) lumetic laj yich'ic; ja' ti jaychop sbi oyique. Ja' te laj yich'ic ta yosilal Isacar, Aser, Neftalí, xchi'uc ta yosilal jchop liquemic ta Manasés ti te nacalic ta Basane.

⁶³ Li j'o'lol smomnich'nab Merarie ja' ic'ot ta stojolic lajchab (12) lumetic te ta yosilal Rubén, Gad, xchi'uc Zabulón; ja' ti jaychop sbi oyique.

⁶⁴ Li israeletique laj yac'beic lumetic yu'unic ec li smomnich'nabtac Levie xchi'uc yosilal.

⁶⁵ Li jchop liquemic ta Judá, ta Simeón, xchi'uc ta Benjamine ja' laj yaq'uic ec li lumetic ti laj xa yich' alel tale, ja' ti bu ic'ot ta stojolique.

⁶⁶ Oy jaychopuc sbiic smomnich'nab Coat ja' ic'ot ta stojolic li lumetic te ta yosilalic jchop liquemic ta Efraine.

⁶⁷ Jech noxtoc ja' laj yich'ic xchi'uc yosilal li lum Siquem te ta vits yu'un Efraine; ja' sventa snac'ubbailic ic'ot. Xchi'uc ja' laj yich'ic li lum Gezer,

^68-69 Jocmeam, Bet-horón, Ajalón, xchi'uc Gat-rimone. Laj yich'beic xchi'uc jutuc yosilal jujun.

⁷⁰ Li yantic jaychop sbiic smomnich'nab Coate ja' laj yich'ic li lum Aner, xchi'uc Bileame, xchi'uc laj yich'beic yosilal jujun. Ja' te oy ta yosilal li j'o'lol jchop smomnich'nab Manasese.

⁷¹ Li smomnich'nab Gersone ja' laj yich'ic li lum Golán te ta Basane xchi'uc li lum Astarote. Laj yich'beic jutuc yosilal. Li lumetique ja' te oy ta yosilal li o'lol jchop liquemic ta Manasese.

^72-73 Xchi'uc laj yich'ic noxtoc li lum Cedes, Daberat, Ramot, Anem te ta yosilal Isacare. Xchi'uc laj yich'beic jutuc yosilal.

^74-75 Xchi'uc ja' laj yich'ic noxtoc li lum Masal, Abdón, Hucoc, xchi'uc Rehob te ta yosilal Asere. Laj yich'beic jutuc yosilal noxtoc.

⁷⁶ Xchi'uc laj yich'ic noxtoc lumetic te ta yosilal Neftalí, ja' li lum Cedes te ta Galilea, xchi'uc Hamón, xchi'uc Quiriataim. Laj yich'beic xchi'uc yosilal jujun.

⁷⁷ Li yantic smomnich'nab Merarie ja' laj yich'ic li lum Rimón, xchi'uc Tabore xchi'uc yosilal. Ja' te oy ta yosilal Zabulón.

^78-79 Xchi'uc laj yich'ic noxtoc li lum Beser te ta xocol banamile, xchi'uc Jaza, Cademot, xchi'uc Mefaat ti te oy ta yosilal Rubén ta jot uc'um Jordán ta stuq'uil sloq'ueb c'ac'al ta yeloval lum Jericoe. Xchi'uc laj yich'beic yosilal li jujun lume.

^80-81 Laj yich'ic noxtoc li lum Ramot ta Galaad, Mahanaim, Hesbón, xchi'uc Hazer ti te oy ta yosilal Gade. Xchi'uc laj yich'beic yosilal noxtoc li jujun lume.