1 Crónicas 5 - Bible in Tzotzil de Chenalhó with Deuterocanon

Sc'oplal smomnich'nab Rubén

^1-3 Li xnich'nab Rubén, ja' li sba xnich'on Israele, ja' Hanoc, Falú, Herzón, xchi'uc Carmi. Ac'o me ja' ba nich'onil li Rubene, pero ta sventa ti la sc'opanbe yajnil stote, jech muc ja'uc laj yich' li c'usi sc'oplal chich'e. Ja' laj yich' li Josee, ja' li yan xnich'on Israele. Li Rubene muc xcom jech chac c'u cha'al ba nich'onil. Pero ta ts'acal ja' banquilal ic'ot yu'un scotol li judaetique, yu'un ja' te iloc' jun banquilal yu'unic. Pero li c'usi sc'oplal chich' li banquilale ja' laj yich' o li Josee.

⁴ Li xnich'on Joele Semaías sbi. Li xnich'on Semaiase Gog sbi. Li xnich'on Goge Simei sbi. Li xnich'on Simeie

⁵ Micaía sbi. Li xnich'on Micaiae Reaía sbi. Li xnich'on Reaiae Baal sbi. Li xnich'on Baale

⁶ Beera sbi, ja' li banquilal yu'un rubenetic ti ic'bil ibat yu'un Tiglat-pileser ajvalil ta Asiriae.

⁷ Li xchi'iltac ta voq'uel Beerae xchi'uc li yalab xnich'nabic ta jujuchop sbiic laj yich'ic tsacbele ja' Jeiel sbi li banquilal yu'unique. Ja'o te xtal Zacarías,

⁸ Bela xnich'on Azaz, smomnich'on Sema, ja' li xnich'on Joele. Li Belae te inaqui ta Aroer. Li yosile xc'ot c'alal to ta Nebo xchi'uc ta Baal-meón.

⁹ Te inaqui noxtoc ta stuq'uil sloq'ueb c'ac'al c'alal to ta sti' xocol banamil yo' bu xlic batel li uc'um Eufratese, yu'un ibol ep xvacaxic, xchijic te ta yosilal li Galaade.

¹⁰ C'alal ja'o ochem ta ajvalilal li Saule, li rubenetique la spasic pleito xchi'uc li agarenoetique. La stsalic, jech te inaquiic ta scotol yosilal Galaad ta stuq'uil sloq'ueb c'ac'al.

Sc'oplal smomnich'nabtac Gad

¹¹ Li smomnich'nab Gad ti te inaquiic ta Basán banamil c'alal to ta Salca ta yeloval bu nacalic li rubenetique,

¹² Joel sbi, ja' banquilal yu'unic te ta Basán. Ja'o xtal Safán, Jaanai, xchi'uc Safat.

¹³ Li yuts' yalalic ti ilic ta xnich'nab stotique ja' Micael, Mesulam, Seba, Jorai, Jacán, Zía, xchi'uc Heber; ja' vucub ta scotolic.

¹⁴ Le'e ja' xnich'nab li Abihail xnich'on Hurie; ja' smoltotac li Jaroa, Galaad, Micael, Jesisai, Jahdo, xchi'uc Buze.

¹⁵ Li Ahí xnich'on Abdiel, xnich'on Gunie, ja' banquilal ic'ot yu'unic li xchi'iltac ta voq'uele.

¹⁶ Scotolic le'e te inaquiic ta Galaad, ta Basán, xchi'uc ta bic'tal lumetic yu'unic xchi'uc ta scotol yav ve'um chijtic ta Sarón c'alal to ta sts'aquil yosilal li Sarone.

¹⁷ Scotolic le'e tsacajtic ta vun ta jujuchop yuts' yalal sbaic c'alal ja'o ochem ta ajvalilal ta Judá li Jotame, xchi'uc c'alal ja'o ochem ta ajvalilal ta Israel li Jeroboame.

Sc'oplal o'lol yoxchop israeletic

¹⁸ Li smomnich'nab Rubén, Gad, xchi'uc j'o'lol jchop yu'un Manasese puru tsots yo'ntonic. Oy lec smaquic, yespadaic, sflechaic sventa pleito, xchi'uc lec xchanojic c'u x'elan tstsalvanic. Ja' chanib yoxvinic ta mil xchi'uc vucub ciento xchi'uc oxvinic (44,760) ti lec chapalic ta sventa pleitoe.

¹⁹ La spasic pleito xchi'uc li agarenoetic, li Jetur, li Nafis, xchi'uc li Nodabe.

²⁰ Pero icoltaatic yu'un Dios, yu'un la sc'anbeic vocol ti c'alal ja' yochelic pleitoe. Laj yich'ic ta muc' jech icoltaatic. Jech scotol li agarenoetic xchi'uc li xchi'iltaquique laj yac' sbaic o ta c'abal.

²¹ Jech i'ich'batic o li sts'unub yovolique. Ja' lajuneb yoxvinic ta mil (50,000) camelloetic, o'lol yoxibal ciento ta mil (250,000) chijetic, cha'mil (2,000) ta cot buroetic, xchi'uc vo'vinic ta mil (100,000) cristianoetic.

²² Pero ep ichamic noxtoc, yu'un li pleito la spasique ja' ta sventa Dios. Ja' te inaquiic o li o'lol yoxchop israeletique ja' to c'alal chucbil ibatic ta yan banamile.

²³ Li yalab xnich'nabic o'lol jchop liquemic ta Manasese ibolic ta jyalel. Ja' te inaquiic ta Basán c'alal to ta Baal-hermón, ta Senir, xchi'uc ta vits Hermón.

²⁴ Li banquilaletic yu'unic ta jujuchop sbiique ja' Efer, Isi, Eliel, Azriel, Jeremías, Hodavías, xchi'uc Jahdiel. Ja' puru tsots yo'ntonic; puquem lec sc'oplalic, xchi'uc ja' banquilaletic ta jujuchop xnich'nab stotic.

²⁵ Pero la stoy sbaic ta stojol li Dios yu'un smoltotaquique. Toj chopol c'usi la spasic; ja' bat yich'beic ta muc' diosetic yu'un li cristianoetic ti inutsbatic loq'uel yu'un Diose.

²⁶ Ja' yu'un li Dios yu'un Israele la stijbe yo'nton li Pul, ja' li ajvalil yu'un asiriaetique, ja' li Tiglat-pileser yan sbie. Jech i'ic'atic batel ta Halah, ta Habor, ta Hara, xchi'uc ta uc'um Gozán li rubenetique, li gadetique, xchi'uc li o'lol jchop smomnich'nab Manasese. Te oyic o c'alal to tana.