1 Crónicas 25 - Bible in Tzotzil de Chenalhó with Deuterocanon

Sc'oplal jtijsonetic xchi'uc jq'uejimoletic

¹ Li David xchi'uc li banquilal j'abteletic yu'un Diose la svoq'uic ta sventa jchop abtel li xnich'nab Asaf, Hemán, xchi'uc Jedutune. Ja' yabtel chq'uejinic ta arpa, ta muc'ta arpa, xchi'uc ta sepsep taq'uin. Ja' tsq'uejintaic c'usi chc'ot ta pasel. Li viniquetic ti ja' yabtelic oe ja' li'i:

² Li xnich'nab Asaf ja' li Zacur, José, Netanías, xchi'uc Asarelae; ja' chnitatic yu'un li Asafe, ja' li stotique. Ja' li boch'o chal c'usi chc'ot ta pasel c'alal ch-albat mantal yu'un ajvalile.

³ Li vaquib xnich'nab Jedutune ja' Gedalías, Zeri, Jesaías, Hasabías, Matatías, xchi'uc Simei. Ja' ventainbilic noxtoc yu'un li stotic Jedutune. Ja' tsq'uejintaic c'usi chc'ot ta pasel. Oy lec yarpaic sventa chich'ic ta muc', sventa chalbeic slequilal li Muc'ul Diose.

⁴ Li xnich'nab Hemane ja' Buquías, Matanías, Uziel, Sebuel, Jeremot, Hananías, Hanani, Eliata, Gidalti, Romanti-ezer, Josbecasa, Maloti, Hotir, xchi'uc Mahaziot.

⁵ Scotol le'e ja' xnich'nab li Hemane, ja' li jun j'alc'op ti chjac'bat yu'un ajvalil c'usi tsc'an Dios tspase. Albil ono'ox yu'un Dios ti ch-ac'at ta ich'el ta muq'ue, jech i'ac'bat chanlajuneb (14) squerem xchi'uc oxib stseb yu'un li Diose.

⁶ Scotolic le'e ja' chnitatic yu'un stotic ti c'alal chq'uejinic ta sepsep taq'uinetic, ta arpaetic, xchi'uc ta muc'tiquil arpa ta stojol Dios te ta ch'ulnae. Li Asaf, Jedutún, xchi'uc Hemane ja' pasbilic ta mantal yu'un li ajvalile.

⁷ Ti c'u yepal ta scotolic li jtijsonetic ti lec chapalique ja' chib ciento xchi'uc vaxquib yo'vinic (288); te xa capal o li yantic xchi'ilic ti lec xchanojic q'ueoje.

⁸ Jech lic spasic canal tajimol, yu'un tsq'uelic c'u x'elan tsjelilan sbaic ta jujutsob. I'ochic c'alal ta muc' ta biq'uit, c'alal ta jchanubtasvanejetic, xchi'uc li boch'otic ja' to chchanique.

^9-31 Ti c'u x'elan iloc' yu'unic li canal tajimole ja' jech xcholet xyal chac li'i; xlic ta sba c'alal ta chanib xcha'vinic (24): José, Gedalías, Zacur, Izri, Netanías, Buquías, Jesarela, Jesahías, Matanías, Simei, Azareel, Hasabías, Subael, Matatías, Jeremot, Hananías, Josbecasa, Hanani, Maloti, Eliata, Hotir, Gidalti, Mahaziot, Romanti-ezer. Li jujunic le'e oy lajchabic c'alal ta xchi'iltaquic ta voq'uel xchi'uc c'alal ta xnich'nabic.