1 Crónicas 23 - Bible in Tzotzil de Chenalhó with Deuterocanon

Sc'oplal levietic xchi'uc yabtelic

¹ C'alal mol xa'ox, c'alal ep xa'ox jabil xch'iel li Davide, lic stic' ta ajvalilal sventa israeletic li xnich'one, ja' li Salomone.

² Lic stsob scotol li banquilaletic yu'un israeletique, xchi'uc li paleetique, xchi'uc li levietique.

³ Lic yatic c'u yepal li levietic ti yich'ojic lajuneb xcha'vinic (30) jabil xchi'uc c'alal ta moletique. Ja' iloc' vaxaclajuneb xcha'vinic ta mil (38,000) viniquetic.

⁴ Chanib xcha'vinic ta mil (24,000) laj yich' yabtelic sventa tspasic li abtel te ta ch'ulnae. Ja' vacmil (6,000) laj yich' yabtelic sventa tsventain xchi'iltaquic, xchi'uc chchapanvanic.

⁵ Chanmil (4,000) icomic ta jchabi ti'naetic, xchi'uc chanmil icomic ta q'uejimol ta stojol Muc'ul Dios ta sonetic ti laj yac' ta pasel li Davide.

⁶ Li Davide lic svoc'an ta jujuchop; ja' ti c'u x'elan voq'uemic li xnich'nab Levie. Ja' li Gersón, Coat, xchi'uc Merarie.

⁷ Li xnich'nab Gersone ja' Laadán xchi'uc Simei.

⁸ Li xnich'nab Laadane ja' oxibic: Li sbae ja' Jehiel; ja'o xtal Zetam; ja'o Joel.

⁹ Li xnich'nab Simeie oxibic noxtoc. Ja' Selomit, Haziel, xchi'uc Harán. Le'e ja' banquilaletic yu'un li xnich'nabtac Laadane.

¹⁰ Li yantic xnich'nab Simeie ja' chanibic: Jahat, Zina, Jeús, xchi'uc Bería.

¹¹ Li sbae ja' Jahat. Li xchibale ja' Zina. Pero li Jeús xchi'uc Beriae mu'yuc ep xnich'nabic; ja' yu'un jbej no'ox ta na laj yich'ic tsaquel ta xchibalic.

¹² Li xnich'nab Coate oy chanib: Ja' Amram, Izhar, Hebrón, xchi'uc Uziel.

¹³ Li xnich'nab Amrame ja' Aarón xchi'uc Moisés. Li Aarone ja' laj yich'ic t'ujel yu'un Dios xchi'uc xnich'nab sventa tsventainic o li ch'ul matanaletique, xchi'uc ja' chchiq'uic pom ta stojol li Muc'ul Diose. Ja' te chtunic o ta stojol Dios, xchi'uc chaq'uic bendición ta sventa Dios scotol ora.

¹⁴ Li xnich'nab Moisés, ja' li jun vinic ti lec itun yu'un Diose, te nabal laj yich' atel xchi'uc li jchop liquemic ta Levie.

¹⁵ Li xnich'nab Moisese ja' Gersón xchi'uc Eliezer.

¹⁶ Li xnich'on Gersone Sebuel sbi li banquilale.

¹⁷ Li Eliezere jun no'ox xnich'on; ja' Rehabías sbi. Pero li Rehabiase oy ep xnich'nab.

¹⁸ Li sba xnich'on Izhare Selomit sbi.

¹⁹ Li xnich'nab Hebrone oy chanib: Jerías sbi li banquilale; ja'o xtal Amarías, Jahaziel xchi'uc Jecamán.

²⁰ Li sba xnich'on Uziele Micaía sbi. Li xchibale Isías sbi.

²¹ Li xnich'nab Merarie ja' Mahli xchi'uc Musi. Li xnich'nab Mahlie ja' Eleazar xchi'uc Cis.

²² Li Eleazare mu'yuc squeremetic c'alal icham; ja' no'ox oy stsebetic. Li stsebetique ja' i'ic'bat yu'un li sjunich'nabe, ja' li xnich'nab Cise.

²³ Li xnich'nab Musie oy oxibic; ja' Mahli, Edar, xchi'uc Jeremot.

²⁴ Scotol ti li' tsacajtic icom sbiique ja' yalab xnich'nab li Levie. Ja' banquilaletic ta jujuchop sbiic ti xlic ta jtob (20) jabil sjabilalique. Ja' la sventainic o spasel li abtel te ta ch'ulnae.

²⁵ Li Davide jech ono'ox laj yal: “Li Muc'ul Dios yu'un Israele laj xa spajes pleito ta stojol li steclumale, xchi'uc laj xa st'uj jun yavil stuc te ta Jerusalén.

²⁶ Ja' yu'un li levietique mu xa persauc bu chq'uechilanic batel li ch'ulna pasbil ta nucule xchi'uc li c'usitic chtun tee”, xi ono'ox.

²⁷ Ja' yu'un laj yich'ic tsacbel sbiic scotol li smomnich'nab Leví ti xlic ta jtob (20) jabil jech chac c'u cha'al yaloj ono'ox li Davide.

²⁸ C'alal tspas yabtelic te ta ch'ulna, ta yamaq'uil ch'ulna, ta cuartoetic, xchi'uc c'alal chaq'uic ta lecubtasel scotol li c'usitic te chtune, ja' chq'uelatic yu'un li paleetic smomnich'nab Aarone.

²⁹ Ja' tsq'uelic noxtoc li pan te oy o ta stojol Dios scotol c'ac'ale, li arina chich' aq'uel ta smoton Diose, li bic'tal jayal vaj ti mu'yuc yich'oj svolesubil xch'ute, xchi'uc li c'usi ch'ilbil ta xalteme, li vots'bil arinae, xchi'uc scotol li c'usitic bisanbil xa c'u yalal xchi'uc c'u yepale.

³⁰ Jech noxtoc tsc'an te oyic ta ch'ulna ta jujun sob, ta jujun mal c'ac'al sventa tstojbeic ta vocol Muc'ul Dios, xchi'uc sventa chich'ic ta muc'.

³¹ Xchi'uc ja' chchic'beic smoton Muc'ul Dios ta sc'ac'alil chcux yo'ntonic, ta yorail unin u, xchi'uc ta jujun muc'tic q'uinetic. Ti c'u yepal tsacajtic sbiique ja' te chtunic o ta stojol Muc'ul Dios scotol c'ac'al.

³² Ja' oy ta yac'olic o xchabiel li ch'ulna pasbil ta nucule xchi'uc ti c'u smuc'ul smacoj li ch'ulnae. Ja' ventainbilic yu'un li xnich'nab Aarón ti jun sts'unubal xchi'uquique.