1 Crónicas 19 - Bible in Tzotzil de Chenalhó with Deuterocanon

La stsal amonetic xchi'uc siriaetic li Davide

¹ C'alal i'ech' jayibuc c'ac'ale, icham li Nahas ajvalil ta Amone. Ja' i'och ta xq'uexol li xnich'one.

² Li Davide tsc'an ti lec chil sba xchi'uc li Hanún xnich'on Nahase, yu'un lec ono'ox laj yil sbaic xchi'uc li stote. Jech la stac batel yaj'abteltac, yu'un bat spatbeic yo'nton ta sventa ti icham stote. Pero c'alal ic'otic ta yosilal li amonetique,

³ li banquilaletic yu'un amonetique jech bat yalbeic li ajvalil Hanune: “¿Me chacuy ti yu'un lec yo'nton li David ti la stac tal yaj'abteltac tal spatbicot avo'nton ta sventa ti icham li atote? Le'e ja' no'ox tal spamuc'taic, tal sjaq'uilan ya'yic, tal yotquinic c'u x'elan li cosilaltique”, xutic.

⁴ Ja' yu'un li Hanune laj yal mantal ti ac'o stsaquic li j'abteletic yu'un Davide. La sloc'beic yisim; la xtuch'beic sc'u' c'alal ta yolon xchucbenal xch'utic. Jech la staquic batel.

⁵ C'alal laj ya'ay David c'usi laj yich' pasbel li viniquetique, bat snupic ta be, yu'un toj q'uexlal sba li c'usi laj yich'ic pasbele. Laj yal mantal ti te to ac'o comicuc ta Jericoe ja' to me ich'i li yisimique.

⁶ C'alal la sna'ic amonetic ti chopol xa c'usi la spasbeic li Davide, li Hanún xchi'uc amonetique la staquic batel oxmil (3,000) kilo saquil taq'uin te ta Mesopotamia, ta Siria, ta Maaca, xchi'uc ta Soba. Ja' sventa sloc' caretaetic xchi'uc stojol soldadoetic cajajtic ta ca'.

⁷ Ja' la stacbeic batel sloc' sventa lajchab xcha'vinic ta mil (32,000) caretaetic sventa pleito, xchi'uc sventa stojol li ajvalil ta Maaca xchi'uc yajsoldadotaque. Jech italic, te vul spas scarpanaic ta stuq'uil lum Medeba. Jech ec li amonetique iloq'uic tal sventa pleitoe ec.

⁸ C'alal laj ya'ay li Davide, la stac batel li Joab xchi'uc scotol li soldadoetic ti lec tsots yo'ntonique.

⁹ Li amonetique lic xchapan sbaic lec ta sventa pleito te ta yochebal lum. Li ajvaliletic te xchi'uquique te icomic ta stenlejaltic.

¹⁰ C'alal laj yil Joab ti chtal ta stuq'uil, xchi'uc ta spat li yajcontraique, lic st'uj ta ora soldadoetic ti lec xu' yu'unic te ta stojol israeletique. La xchapan lec sventa chbat yac'beic li siriaetique.

¹¹ Li scomelal soldadoetic la st'uje laj yac'be ta sc'ob li Abisaie, ja' li yits'ine, yu'un ja' ac'o xchapan lec sventa chbat yac'beic ec li amonetique.

¹² Jech laj yalbe: “Ti me ja' tsots xaq'uic li siriaetic jech chac c'u cha'al vu'une, tsc'an chtal acoltaicun. Yan me ja' toj tsots xaq'uic li amonetic jech chac c'u cha'al vo'ote, vu'uncutic chbat jcoltaotcutic.

¹³ Tsotsan me, cac'tic persa sventa ta jpojtic li jlumaltique xchi'uc li lumetic yu'un Dios cu'untique. Ja' ac'o spas c'usi lec chil stuc li Muc'ul Diose”, xut.

¹⁴ Ja' yu'un li Joabe inopaj batel xchi'uc li svinictaque, bat spasic pleito xchi'uc li siriaetique, pero ijatovic loq'uel ta stojol li Joabe.

¹⁵ C'alal laj yil amonetic ti ijatovic xa batel li siriaetique, ijatovic loq'uel ta stojol ec li Abisai yits'in Joabe; te i'ochic ta yut lum. Ja' yu'un li Joabe isut batel ta Jerusalén.

¹⁶ C'alal laj yil siriaetic ti itsalatic yu'un li israeletique, lic staquic batel boch'o chbat yiq'uic tal li yantic xchi'iltaquic te oyic ta jot uc'um Eufratese. Ja' banquilal soldado yu'unic li Sofac, ja' li banquilal soldado yu'un Hadad-ezere.

¹⁷ Pero laj ya'ay li Davide, jech la stsob ta ora li israeletique; la xtuch'ic jelovel li uc'um Jordane, bat staic li siriaetique. Lic xchapan lec yajsoldadotac, jech bat yac'beic.

¹⁸ Pero li siriaetique ijatovic batel. Li Davide la smil vucmil (7,000) soldadoetic cajajtic ta careta, cha'vinic ta mil (40,000) chanov ta yacanic. Te la smil comel noxtoc li Sofaque, ja' li banquilal soldado yu'unique.

¹⁹ Li siriaetic ti oyic ta stojol Hadad-ezere laj yilic ti itsalatic yu'un li israeletique, jech lic sco'lajes yo'ntonic xchi'uc li Davide; te icomic o ta smozo. Li siriaetique mu'yuc xa ta yo'ntonic tscoltaic o yan velta li amonetique.