1 Crónicas 18 - Bible in Tzotzil de Chenalhó with Deuterocanon

Ja' smelol c'alal la smuq'uibtas batel yosilal li Davide

¹ C'alal ilaj yo'ntone, ibat stsal filistaetic li Davide. La sbic'tajes o ta jyalel; la spojbe li lum Gat xchi'uc li bic'tal lumetic sventainoje.

² Jech noxtoc la stsal li moabetique, jech te icomic o ta sc'ob li Davide; te la stoj spatanic.

³ Bat stsal noxtoc li Hadad-ezere, ja' li ajvalil ta Soba ta Hamate, ja'o ti c'alal tsc'an ox tsventain batel yosilal li uc'um Eufratese.

⁴ Li Davide laj yich' comel jmil (1,000) ta cot careta, vucmil (7,000) soldadoetic cajajtic ta ca', xchi'uc jtob ta mil (20,000) chanov ta yacanic. La sc'asbe yacan scotol li ca'etique; ja' xa no'ox la scomtsan sventa tsnitic vo'vinic (100) ta cot caretaetic.

⁵ Li siriaetic te ta Damascoe italic ta stojol li ajvalil Hadad-ezere, ja' li ajvalil ta Sobae, yu'un tal scoltaic. Pero li Davide la stsal noxtoc li siriaetique; la smil jun xcha'vinic ta mil (21,000).

⁶ Li Davide laj yac' jtsob soldadoetic ta lum Siria ta yosilal Damasco, jech te icomic o ta smozo David li siriaetique; te lic stoj spatanic. Li Davide ja' jech icoltaat yu'un Muc'ul Dios ta pleito ti buyuc no'ox ibate.

⁷ Li Davide laj yich'be noxtoc li smaquic pasbilic ta c'anal taq'uin ti la stunesic li j'abteletic yu'un ajvalil Hadad-ezere. Te laj yich' batel ta Jerusalén.

⁸ Jech noxtoc bats'i ep laj yich'be bronce taq'uin yu'unic li lum Tibhat xchi'uc Cune, ja' li lumetic ti sventainoj li Hadad-ezere. Li bronce taq'uine ja' la stunes ta ts'acal Salomón c'alal la spas li yavil vo'e, li yoyaltac ch'ulnae xchi'uc li c'usitic yan la spas ta broncee.

⁹ Li ajvalil Toi ta Hamate laj ya'ay ti itsalvan xa li Davide yu'un la smilbe scotol yajsoldadotac li ajvalil ta Sobae, ja' li Hadad-ezere.

¹⁰ Jech la stac batel ta stojol ajvalil David li xnich'one, ja' li Adorame, yu'un bat sc'opan, bat spatbe yo'nton ti la spas pleito xchi'uc li Hadad-ezere, xchi'uc ti la stsale. Yu'un li ajvalil Toie laj ono'ox spasic pleito xchi'uc ec li Hadad-ezere. La stacbe batel noxtoc li c'usitic pasbil ta c'anal taq'uin, ta saquil taq'uin, xchi'uc ta broncee.

¹¹ Li Davide lic yac' ta stojol Muc'ul Dios scotol li c'usitic la stae, xchi'uc li saquil taq'uin, li c'anal taq'uin laj yich' tal ta yantic banamil ta Edom, ta Moab, ta Amón, ta yosilal filistaetic, xchi'uc ta yosilal amalequetique.

¹² Jech noxtoc li Abisai yol Sarviae la smil vaxaclajunmil (18,000) edometic te ta Stenlejaltic Ats'am.

¹³ Jech noxtoc bat yac' jtsob soldadoetic ta Edom, jech icomic ta smozo David scotol li edometique, yu'un i'ac'bat spas canal yu'un Muc'ul Dios ti buyuc no'ox ibate.

Sc'oplal j'abteletic yu'un David

¹⁴ Li Davide ja' lic ochuc ta ajvalilal yu'un scotol li israeletique. Lec tuc' la xchapan scotol li slumale.

¹⁵ Li Joab yol Sarviae ja' banquilal yu'un scotol li soldadoetique. Li Josafat xnich'on Ahilude ja' tsts'iba ta vun li c'usitic chc'ot ta pasele.

¹⁶ Li Sadoc xnich'on Ahitob, xchi'uc li Abimelec xnich'on Abiatare ja' paleetic. Li Savsae ja' yajts'ibajom li ajvalile.

¹⁷ Li Benaía xnich'on Joiadae ja' sventainojic li ceretetic xchi'uc peletetique. Li xnich'nab Davide ja' banquilal yajcoltaubbailtac ta abtel li Davide.