1 Crónicas 13 - Bible in Tzotzil de Chenalhó with Deuterocanon

Li Davide la snop chich' jelovel ta Jerusalén li xcaxail smantal Diose

¹ Li Davide lic sjac'be c'usi tsnopic li banquilaletic yu'un jmil (1,000), xchi'uc li banquilaletic yu'un vo'vinic (100) soldadoetique xchi'uc scotol li banquilaletique.

² Ts'acal jech lic yalbe scotol li israeletique: “Me lec chava'yic c'usi chcale, xchi'uc me jech tsc'an li Muc'ul Dios cu'untique, jtactic batel mantal ta stojol scotol li yantic jchi'iltactic te comenic ta scotol cosilaltique xchi'uc ta stojol li paleetic, li levietic ti te oyic ta lumetic yu'unic, o me te nacalic batel ta yosilal li slumalique yu'un ac'o stsob sbaic tal scotolic.

³ Yu'un tsc'an chbat quich'betic tal li xcaxail smantal Dios cu'untique, yu'un vo'one xa mu'yuc bu ta jtuc'ulantic; ja' no'ox te icom o ti c'alal cuxul to'ox li Saule”, xut.

⁴ Scotol israeletic lec laj ya'yic; laj yalic ti jech ac'o yich' pasele.

Li Davide laj yac' persa laj yich' jelovel li xcaxail smantal Diose

⁵ Li Davide la stsob scotol li israeletic xlic ta Sihor ta sts'aquic xchi'uc Egipto c'alal to ta yochebal lum Hamate, yu'un chbat yich'ic tal li xcaxail smantal Dios te ta Quiriat-jearime.

⁶ La xchi'in batel scotol israeletic ta Baala, ja' li Quiriat-jearim yan sbi te ta yosilal Judae, yu'un bat yich'ic loq'uel tal li xcaxail smantal Muc'ul Dios ti te nacal ta o'lol yu'unic li sloc'obal chib querubinetique,, ja' ti bu chich' c'anbel vocol ta stojole.

⁷ Laj yich'ic loq'uel ta sna Abinadab li xcaxail smantal Diose, la scajanic batel ta ach' careta. Li Uza xchi'uc Ahioe ja' la sbeiltasic batel li caretae.

⁸ Li David xchi'uc scotol israeletique toj xcuxet no'ox yo'ntonic ta stojol Dios. Ta scotol stsatsalic chq'uejinic ta arpaetic, ta sonetic, ta musicaetic, ta oq'uesetic.

⁹ C'alal ic'otic ta yav smajubil trigo Quidón sbie, li Usae laj yico ta sc'ob li caxae yu'un c'an balch'ujuc yu'un li vacaxetique.

¹⁰ Pero li Muc'ul Diose i'ilin ta stojol li Uzae yu'un laj yac' sc'ob ta caxa, jech te no'ox la smil ta ora.

¹¹ Li Davide toj vocol laj ya'ay ti imilat yu'un Muc'ul Dios li Uzae, jech Pérez-uza laj yac'be sbi li banamile. Ja' jech sbi o c'alal to tana.

¹² Li Davide te lic xi'uc ta stojol li Diose, jech laj yal: “¿C'u yu'un jech la jpas ti laj quich'be tal xcaxail smantal Diose?”, xi.

¹³ Jech muc xich' o batel ta Lum yu'un David li caxae; te no'ox laj yich' batel ta sna Obed-edom ta lum Gat.

¹⁴ Oxib u te oy ta sna Obed-edom li xcaxail smantal Diose. Li Muc'ul Diose laj yac'be ep bendición yajnil xnich'nab li Obed-edome xchi'uc scotol li c'usitic oy yu'une.