1 Corintios 10 - Bible in Tzotzil de Chenalhó with Deuterocanon

Tsc'an j'ech'el chacomtsanic yich'el ta muc' li c'usitic cuybilic ta diosetique

¹ Quermanotac, ta jc'an chana'ic c'u x'elan li jmoltot jyame'cutic ta vo'onee. Scotolic tojobtasbilic tal lec ta toc, xchi'uc scotolic lec ijelovic tal ta Tsajal Nab.

² Scotolic laj yich'ic vo' ta sventa Moisés ya'yel, yu'un laj yac' sbaic ta stojol ti c'alal ixanovic tal ta yolon toque xchi'uc ti c'alal ijelovic tal ta nabe.

³ Jech noxtoc scotolic la sve'ic li ch'ul ve'lile.

⁴ Scotolic laj yuch'ic li ch'ul vo'e, yu'un laj yuch'beic ya'lel li ch'ul ch'en te xchi'uquique. Li ch'ene ja' li Cristoe.

⁵ Pero jutuc mu scotolicuc chopol i'ilatic yu'un Dios, jech te tanpuc icom sbec'talic ta xocol banamil.

⁶ Scotol li c'usitic ic'ot ta pasel ta stojolique ja' senyail ta jventatic. Yu'un jech mu me jpich'-o'ntatic c'usi chopol ec jech chac c'u cha'al la xpich'-o'ntaique.

⁷ Mu me xavich'ic ta muc' c'usitic cuybilic ta dios jech chac c'u cha'al oy jech la spasique. Yu'un jech ts'ibabil sc'oplalic ta sc'op Dios: “Scotolic ichotiic, te ive'ic, i'uch'bajic; te lic spasic c'usi tsc'an yo'ntonic”, xi ts'ibabil.

⁸ Jech noxtoc, mu me xamulivajic jech chac c'u cha'al imulivajique. Ja' yu'un ta jun no'ox c'ac'al ichamic oxib xcha'vinic (23,000) ta mil.

⁹ Mu me xapasbeic preva yo'nton Dios jech chac c'u cha'al oy jech la spasique. Yu'un ti'bil ta chon ichamic.

¹⁰ Mu me xabic'talvulajeticuc jech chac c'u cha'al la spasique. Yu'un ital tsots chamel ta stojolic, te ichamic o.

¹¹ Ti jech ic'ot ta pasel ta stojolique, ja' sventa ac'o quiltic ti mu xu' jech ta jpastic ec li vu'utique. Ja' yu'un ts'ibabil icom sc'oplalic sventa ac'o bijubcutic, vu'utic ti po'ot xa sc'an jtatic slajebal c'ac'ale.

¹² Ja' yu'un li boch'o tsnop ti toj jun yo'nton xch'unoje, ac'o me sq'uel sba, naca me yaluc ta lum.

¹³ Li vo'oxuque mu'yuc to bu chtal ta atojolic tsots preva ti mu'yuc boch'o c'otem ta stojol jeche. Yu'un li Diose mu sna' sjel yo'nton o, jech mu xac' taluc ta atojolic tsots preva ti me mu xa sts'ic avu'unic chile. Jech noxtoc c'alal oyoxuc ta prevae, ja' chac' avilic c'u x'elan xu' chacolic loq'uel, yu'un jech chcuch avu'unic.

¹⁴ Ja' yu'un, vo'oxuc ti lec jc'anojoxuque, j'ech'el comtsanic yich'el ta muc' li c'usitic cuybil ta diosetique.

¹⁵ Li' ta orae ja' jech chajc'opanoxuc tal jech chac c'u cha'al li boch'otic bijique, ja' yu'un nopo ava'yic li c'usi chacalboxuc tale.

¹⁶ C'alal chcuch'betic sbel li vaso ti yich'oj bendicione xchi'uc ti ta jtojbetic ta vocol Diose, ¿me mu ja'uc svinajeb ti jun lijc'ot xchi'uc Cristo ta sventa ti la smal xch'ich'ale? Jech noxtoc c'alal ta jvoc'tic pane, ¿me mu ja'uc svinajeb ti jun lijc'ot jchi'uctic li Cristo ta sventa ti laj yac' sbec'tal ta jcojtique?

¹⁷ Ac'o me eputic, jun no'ox pan ta jve'tic. Ja' senyail ti jun c'otemutic ta jcotoltique, yu'un jcotoltic ta jve'tic li jun no'ox pane.

¹⁸ Nopo ava'yic c'u x'elan la spasic li israeletique. Li boch'o la sti'ic smoton Diose, ¿me mu ja'uc li boch'o jun oyic xchi'uc Diose?

¹⁹ Ti jech chacalboxuque, mu yu'unuc ja' chcal ti ja' jech oy stu ec li c'usitic cuybilic ta diose xchi'uc ti oy stu li smoton chac'beique.

²⁰ Yu'un li boch'otic chac'beic milbil matanal li c'usitic cuybilic ta diose, pucujetic chac'beic; mu ja'uc Dios chac'beic. Ja' yu'un mu jc'an ti jun chac'ot achi'uquic pucujetic li vo'oxuque.

²¹ Mu xu' chavuch'beic sbel svaso Cajvaltic ti me ts'acal chbat avuch'beic sbel svaso noxtoc li pucuje. Mu xu' chave'beic c'usi oy ta xmexa Cajvaltic me ts'acal chbat ave'ic c'usi oy ta xmexa li pucujetique.

²² ¿Me lec ti chcac'tic it'ixajuc yo'nton li Cajvaltique? ¿Me yu'un vu'utic ech'em jtsatsaltic?

Ja' ac'o jpastic li c'usi ja' sventa slequilal yantique

²³ Jech chalic: “Scotol xu' ta jpastic”, xiic. Pero mu scotoluc lec. Chalic ti scotol xu' ta jpastique, pero mu scotoluc tstsatsub co'ntontic ta stojol Dios yu'un.

²⁴ Mu me ja'uc no'ox chasa'ic li c'usi lec chava'ay atuquique; ja' sa'ic li c'usi ja' sventa slequilal yan achi'ilique.

²⁵ Scotol li ti'bol ta xchonic ta ch'ivite mano ati'ic. Pero mu me xajaq'uic c'usi sventa, yu'un jech mu xlo'ilaj avo'ntonic.

²⁶ Yu'un li banamile xchi'uc scotol li c'usitic oye ja' yu'un li Cajvaltique.

²⁷ Me oy chayic'oxuc ta ve'el li boch'o mu'yuc xch'unoje, me chanop chabatique, ve'anic li c'usi chayac'boxuque. Mu me xajaq'uic c'usi sventa, yu'un jech mu xlo'ilaj avo'ntonic.

²⁸ Yan me oy boch'o jech chayalboxuque: “Li ti'bol li'i ja' smoton li c'usitic cuybil ta diose”, me xie, mu me xati'ic, yu'un jech mu xlo'ilaj yo'nton avu'unic li boch'o laj yale.

²⁹ Ma'uc chcal ti jech mu xlo'ilaj avo'ntonic li vo'oxuque. Ja' chcal ti mu me xlo'ilaj yo'nton avu'unic li yantique. Pero me oy boch'o jech chale: “¿C'u yu'un chquich' ventainbel c'usi ta jpas ta sventa li c'usi tsnop yane?

³⁰ Yu'un ta jtojbe ta vocol Dios ti c'alal ta jve'e, ¿c'u yu'un chalic ti chopol me la jve'e?”, me xie;

³¹ pero ti c'alal chijve'e, ti c'alal oy c'usi chcuch'tique, xchi'uc scotol li c'usiuc no'ox ta jpastique, ac'o jpastic ta sventa lec chbat sc'oplal cu'untic li Diose.

³² Mu me boch'o xbolib yo'nton avu'unic, me judío, me yanlum cristiano, o me steclumal Dios.

³³ Li vu'une ja' ta jc'an ti scotolic lec ac'o yilic scotol li c'usitic ta jpase, yu'un ma'uc no'ox oy ta co'nton ta jsa' li c'usi ja' sventa jlequilal jtuque. Oy ta co'nton noxtoc li c'usi ja' sventa slequilal yepal cristianoe, yu'un jech xu' chcolic ec.