Zacarías 9 - Bible in Tzotzil de Chamula

Ti muc'tiquil jteclumetic ti nopol no'oxe ta xich'ic tsitsel

¹ Xi s'elan laj yal ti Dios ta scontrainel ti muc'tiquil lum Hadraque xchi'uc ti jteclum Damascoe: “Ti jteclumetic ti oy ta Siriae ja' c'otem ta yu'untac ti Diose jech c'u cha'al scotol snitilultac ti Israele.

² Ja' jech xtoc, ja' yu'un ti jteclum Hamate, ti ja' uts' alal jteclumetic taje, xchi'uc ti jteclum Tiroe, ti Sidone xchi'uc scotol ti c'usitic jun yutsiquil ta q'uelel ti oy yu'unique.

³ Smeltsanoj pojobbailetic yu'un ti jteclum Tiroe. Laj sta ti ep laj sbusanbe sba ti oroe, ti platae, jech c'u cha'al junuc ti buch'u ta sbusan ti ach'ele.

⁴ C'u stu un, scotol ta xpojbat batel yu'un ti Diose. Ta xtenbat batel ta nab ti sc'ulejale. Ta j'ech'el ta xchic'bat ti steculmale.

⁵ “C'alal ta xil ti jteclum Ascalón ti va'i s'elan taje, ta xbat xch'ulel ta xi'el xchi'uc. Ep ta xich' svocol xtoc ti jteclum Gazae. Laj yipal yu'un ti jteclum Ecrón ti ja' to ox spatoj yo'nton yu'une. Ta xlaj sc'oplal ti ajvalil yu'un ti jteclum Gazae. Ta xtub sc'oplal ti jnaclejetic yu'un ti jteclum Ascalone.

⁶ Cha'cap sts'unubalic ta xlic naquiicuc ti ta jteclum Asdode. Ja' to jech ta xc'ot ta pec'tsajel stoyobbailic ti filisteoetique.

⁷ Ti jech capal xchi'uc xch'ich'el ti beq'uet ta sti'ique, ta jpojbeic ta ye ta sti'ic. Yu'un ti c'alal snitic xa ta ti'el ti sve'elic ti albil sc'oplal mu stac' slajesique, ta jpojbe ta ye ta sti'ic. Ja' no'ox un, ti jnaclejetic taje, oy jlom ti ta xc'ot ta cu'un ti ta xlic slumalinic ti jteclum Judae. Ja'uc ti jteclum Ecrone, jech ta x'ilatic jech c'u cha'al ti jnaclej jebuseoetique.

⁸ Yu'un tey ono'ox oyun ta stojol ti cu'untaque yo' jech ta jpoj ta stojol ti buch'uuc no'ox ta x'ech' li'e, ti mu xlic cha'ilbajinaticuc yu'un ti j'ilbajinvaneje, yu'un vu'un ta jva'an jba ta sq'uelel ta xchabiel.”

Ti ajvalil ti ta xvul ta loq'uel ta stojol ti Israele

⁹ Muyubajan no'ox ta j'ech'el, jteclum Sión. Q'uejinan no'ox ta muyubajel, jteclum Jerusalén. Ti ajvalil avu'une, tuc' sjol yo'nton tal ta atojol ti tsalvanem xa talele, peq'uel yac'oj sba ti cajal talel ta burroe, ja' ti ta jcot uni ch'in burro ti ja' yol jcot me' burroe.

¹⁰ Ti stuque ja' ta slilinbe scarretatac ti Efraine, ti ca'etic yu'un ti jteclum Jerusalene, xchi'uc ti ac'ob-leto yolob yu'une. Yu'un ta scaj'al ti ta slamajes c'op yu'un ti muc'tiquil lume. Ta jujujot to nab, ta xc'ot yu'un ti ta xventainvane; ta xlic yu'un ta uc'um Eufrates, ti ta xc'ot ti bu xa c'alal jujuti' oy ti banomile.

Ta xich' cha'va'anel ti jteclum Israele

¹¹ Xi s'elan ta xal ti Diose: “Jteclum Jerusalén, ti jech laj cac'bot ti jtrate ti oy yip ta sventa xch'ich'el ti milbil mantanale, ja' yu'un un, ta jnitboxuc loq'uel ti jchuqueletic ti tic'ajtic ta joc' ti ch'abal ya'lele.,

¹² Ti vo'oxuque, jchuqueletic ti staoj yav ti apatoj avo'ntonique, sutanic xa batel ta anac'obbailic. Ta xcalboxuc ava'iic ti x'ech' to ta jva'an jba ta atojolic avi tana li'e, ja' mu sta ti c'alal lic ata ti avocolique.

¹³ Ta jtunes ta jyolob ti jteclum Judae; ta jtunes ta sni' jyolob ti Efraine. Jech ti vo'ot ec une, Sión, ta xac'ot cu'un ta jun espada ti xvolet no'ox liquel cu'un ti avalab anich'nab ta scontrainel ti jteclum Greciae.”

¹⁴ Ti Diose ta xac' sba iluc ta stojol ti steclumale, ti xjaplajet no'ox ti sni' syolobtac jech c'u cha'al ti chauque. Ti Dios ti ja' Ajvalile ta xoq'uisan ti yoq'ues ti xvolet no'ox batele, ti capal ta sutub ic' xchi'uc ya'lel ti xi ta stuq'uil yolon ti yac'ol xocon sloq'ueb c'ac'ale.

¹⁵ Ti Dios ti scotol xu' yu'une, yu'un ta xchabi ti yu'untaque. Ja' yu'un un, ti stuquique ta xpech'ic ta teq'uel ti jim jimich'etique, ta sesintaic ti scontraique, ti co'ol s'elan vino ta xuch'beic ti xch'ich'ele, ti co'ol s'elan lech-lech taq'uin ti noj ta xcom xchi'uquique, mi mo'oje, co'ol s'elan ti xbein no'ox yalel ta xulubtac ti altare.

¹⁶ Ti jech c'ac'al taje, ti Ajvalil ti ja' Dios yu'unique, ta spoj loq'uel ti steclumale jech c'u cha'al ti jq'uel-chij ta spoj ti xchijtaque, yu'un xlaplun no'ox xojobaltac ti yu'untac ta steclumal stuquique, co'ol jech c'u cha'al c'upil sba tonetic ti yich'oj ti jun ronae.

¹⁷ C'u nan yutsil, c'u nan slequil liquel ti muc' ta lum taje. Ti jech mu no'ox albajuc ta xloc' yu'un ti trigo xchi'uc ti vinoe, jech ti querem tsebetique xcuxojic lec ta xch'i xc'opojic.