Zacarías 8 - Bible in Tzotzil de Chamula

Ta xc'ot ta pasel ti c'usi yaloj ti Diose

¹ Ti Dios ti scotol xu' yu'une xi s'elan laj yal ti laj sc'oponun talele:

² “Xi s'elan ti oy ta co'nton ti vu'un Diosun ti scotol xu' cu'une: Yu'un oy ono'ox ta co'nton ta jc'an ta jcolta ti jteclum Sione, jech o xal lic ti sc'ac'al co'nton yu'un ti yajcontrae.

³ Ja' yu'un un, ta xisut batel ta jteclum Jerusalén. Ta xinaqui ti bu taje. Va'i unbi, ja' Lequil Jteclum Le'e, xi liquel sc'oplal ti Jerusalene. Jech ti vits yu'un ti Dios ti scotol xu' yu'une, ja' Ch'ul Vits Le'e, xi liquel sc'oplal.

⁴ Ti moletique, ti yayiletique, ta to xvinaj ti ta xchotiic liquel ta yamaq'uil ti Jerusalene. Yu'un naca xa ta namte'al xvujte-vujteic ti laj yilic lec ti ch'iel c'opojele.

⁵ Ti queremetique, ti tsebetique, xvoletic no'ox ta yamaq'uil ti jteclum ta tajimole.

⁶ “Ti jech yorail taje, scotolic ti c'u yepal scomelal ti jteclumale, vocol ta ch'unel ta xa'iic. Ja'uc ti vu'une mu jechuc ta xquil. Ti vu'un Diosun ti scotol xu' cu'une, mu me lo'iluc no'ox ti xi ta xcale:

⁷ Vu'un ta jtic' jba ta spojel ta scoltael ti jteclumal ti jech ochemic ta c'abal yu'un ti lum ti oy ta stuq'uil sloq'ueb c'ac'ale, xchi'uc ti oyic ta stuq'uil smaleb c'ac'ale.

⁸ Ta xquiq'uic talel ta jteclum Jerusalén yo' jech ta xnaquiic tey. Jech ti stuquic une ta xc'otic ta jteclumal. Ja' jech xtoc ta slequilal yutsilal co'nton ta xic'ot ta Dios yu'unic.”

⁹ Taje, xi s'elan ta xal ti Dios ti scotol xu' yu'une: “Tsatsajanic ec un ti vo'oxuc ti laj xa ava'iic ti c'opetic ti yacalic ta yalel ti j'alc'opetic yu'un ti Dios ti c'ac'al li'e, xchi'uc ti sc'ac'alil xtoc ti laj yich' ac'bel sliqueb yoc xcha'va'anel xch'ulna Dios ti scotol xu' yu'une.

¹⁰ C'alal ch'abal to ox liquem ti abtele, ch'abal to ox stojol ti j'abtel viniquetique xchi'uc sloc' ta abtel ti chon bolometique. Ta scoj ti jcontrainvanejetique mu junuc yo'ntonic ta xa'iic ti jnaclejetique. Laj cac' que jti' ti ac'o stsacan sbaic ta leto ta jujun tale.

¹¹ Avi tana li' une, ti c'u xa yepal ta xcomic ti jnaclejetic li' ta jteclume, mu xa jechuc ta jpas ta stojolic jech c'u cha'al laj jpas ta sliquebal c'ac'al talele. Ti vu'un Diosun ti scotol xu' cu'une, mu me lo'iluc no'ox ta xcal.

¹² Ti jech lamajem banomil ta xa'iique, loq'uem ayanem ta yo'ntonic. Jech ti uvaetique ta xac' lec ti sate. Ti banomile ta xac'be lec sat ti c'usi ta xich' ts'unele. Ta xac' lec ts'ujul ti vinajele. Ja' jech ta xcac'be yu'ninic ti jnaclejetic ti c'u yepal ta xcom ta jteclum li'e.

¹³ Ti vo'oxuc judaoxuque, ti israeloxuque, ti chopol ac'oplalic yu'unic ti muc'tiquil lumetic ti capaloxuc ta naclej xchi'uque, ja' yu'un li' une, ta jpojoxuc, ta jtic' jba ta spasel ti mu no'ox c'usi xana'ic liquele. Mu xaxi'ic, tsotsanic me.”

¹⁴ Ti Dios ti scotol xu' yu'une, xi s'elan ta xale: “C'alal laj soquesbeicun co'nton ti amolmuc'totic ta vo'nee, ta jbel sc'oplal laj ono'ox jtsitsic ta j'ech'el, mi ja'uc jutebuc laj jel.

¹⁵ Avi tana une, laj xa jel. Ja' xa no'ox ta jnop ti lecuc c'otuc ta pasel ta stojol ti Jerusalene xchi'uc ti jteclum Judae. Ja' yu'un un cha'e, mu xaxi'ic.

¹⁶ Xi s'elan ma' ti tsots sc'oplal sc'an xapasic ono'ox une: Jamal xavalbe abaic ti ac'opic ta jujun tale. Lequil chapanic ti c'usi sc'an chapanele. Ac'beic yipal ti lamajemuc avo'ntonic ti jech oyoxuc ta chapanobbailetique.

¹⁷ Mu xavilbajin abaic ti jujunoxuque, mi ja'uc ti lec xa xava'iic ta xava'an abaic ta jeche' rexticoe. Scotol ti va'i s'elan taje, mu ts'icbaj ta xca'i yu'un. Ti vu'un Diosune, mu me lo'iluc no'ox ta xcal.”

¹⁸ Ti Dios ti scotol xu' yu'une, xi laj yalbun ti laj sc'oponune:

¹⁹ “Ta xjoybij liquel ta muyubajel sc'oplal ti ictaej vaj c'alal ta xc'ot sc'ac'alil ti jujun chanchan (4) ue, ti yo'obal (5) ue, ti yucubal (7) ue, ti slajunebal (10) ue. Ta xc'ot liquel ta q'uin ta smuyubajel yo'ntonic snitilultac ti Judae. ¡Ja' yu'un un cha'e, oyuc ta avo'ntonic ti bu ja' melele, xchi'uc ti lamajem ti c'op avu'unique!”

²⁰ Ti Dios ti scotol xu' yu'une, xi s'elan ta xale: “Ta to me xtalic jnaclejetic xchi'uc yan jnaclejetic yu'un ti muc'tiquil lume.

²¹ Ja' yu'un un, ti jun lume ta xbat ta yan lum ti xi ta xalbeic xtoque: ‘¡Ba jsa'tic ti Dios ti scotol xu' yu'une yo' jech ta jc'anbetic ti ac'o xiyac'botic ti slequilal yutsilale!’ Jech ti yan jteclumetique xi ta xtac'batic yu'unic xtoque: ‘¡Ta xibatcutic ec!’

²² Ti ta jteclum Jerusalene, ta xtalic ep jteclumetic xchi'uc mu no'ox albajuc ta xtalic muc'tiquil lumetic ta sa'el ti Dios ti scotol xu' yu'une, ta sc'anbel ti ac'o ac'baticuc ti yutsilal slequilale.

²³ Ti jech yorail taje, lajunvo' (10) jyanlumetic yu'un ti yan muc'tiquil lumetique, ti stsoylajetic no'ox ta sti'il sc'u' jun judá vinic ti xi ta xalbeic xtoque: ‘¡Yu'un chbat jchi'inotcutic, ja' ti c'ot ta jni' ta jchiquincutic ti chi'inbiloxuc yu'un ti Diose!’ ”