Zacarías 5 - Bible in Tzotzil de Chamula

Jam ba satil ta yilel ti balbil ts'ibabil vune

¹ Jam jba jsat no'ox xtoc, laj quil jlic ts'ibabil balbil vun ti xvililete.

² Xi laj sjac'bun ti ánjele: “¿C'usi ta xavil yilel?” Xichi laj jtac'bee: “Ja' jlic ts'ibabil balbil vun ti xvililet ta xquile, ti yich'oj baluneb (9) metro ti snatile, ti ja' yich'oj o'lol yo'obal (4.50) metro ti sjamleje.”

³ Va'i un, xi laj yalbune: “Le'e, ja' tey ts'ibabil ti oy sc'oplal ta staic bac vocol scotol ti jnaclejetic yu'un ti muc' ta lume. Ti c'usi ts'ibabil ta jujujote, ja' ta xal ti jbel sc'oplal ta stojic ti buch'u ta x'elc'ajique, xchi'uc ti buch'u jeche' no'ox ta xal ti ta sva'an sba ta rexticoe.

⁴ Ti Dios ti scotol xu' yu'une, yu'un mu lo'iluc no'ox ti xi ta xale: ‘Ta xcac' c'otuc bac vocol ta stojol ti buyuc no'ox nailal nacal ti buch'u ta x'elc'aje, xchi'uc ti bu nailal nacal ti buch'u ta jeche' no'ox ta sva'anun ta rexticoe. Yu'un lamal ta xcom o ti bac vocole, ja' to ti c'uxi ta xc'ot ta tsutsesel ti mu xa jbejuc sts'amte'altac, mi ja'uc jbejuc xa stanaltac ta xcom ti bu to ox ti nae.’ ”

Jam ba satil ta yilel ti muc' ta almul cajon te'e xchi'uc ti jun antse

⁵ Laj taj une, ti ánjel ti buch'u yacal ta xilo'ilaj xchi'uque, xi laj yalbun ti nopaj talele: “¡Tuc'ulano avil lec ti c'usi ta xvinaj talel tana une!”

⁶ Xichi laj jac'bee: “¿C'usi xa ono'ox tana taj une?” Xi laj stac'bun ti stuque: “Ja' jun muc' ta almul ti ja' c'otem ta sbisobil mulil yu'unic ti buch'utic nacalic ta muc' ta jteclume.”

⁷ Ti almule, bonbil ta c'unil taq'uin ti smac nujanbile. Laj yich' jambel ti smaque. Chotol jun ants xtoc ta yut ti almule.

⁸ Ti ánjele xi laj yalbune: “Ti ants le'e ja' me' mulil.” Tey laj stic' ochel ta yut ti almule, laj snujanbe smac sti' ti bonbil ta c'unil taq'uine.

⁹ Laj quil no'ox xtoc vul ta loq'uel chib antsetic ti oy xiq'uique, ti cuchbil ta xbatic yu'un ti iq'ue. Jun to xic' muc' ta sac ichin yilel ti xchechet batel yu'unic ta vinajel ti almule.

¹⁰ Va'i un, xichi laj jac'be ti ánjel ti yacal ta xilo'ilaj xchi'uque: “¿Bu c'alal ta xba yaq'uic ti almul le' une?”

¹¹ Xi laj stac'bun ti stuque: “Ta xich' meltsanbel xch'ulnail ta jteclum Babilonia. C'alal mi tsuts xa ox ta meltsanel ti ch'ulnae, ta xich' tiq'uel ochel, ta xich' chotanel ta scajleb.”