Salmos 96 - Bible in Tzotzil de Chamula

Ti ach' q'uejimol ta sventa ti Diose

¹ Q'uejintaic ta jun ach' q'uejimol ti Diose. Jnaclejetic ta sbejel banomil, q'uejintaic ti Diose.

² Q'uejintaic ta lequil c'optael ti Diose. Scotol c'ac'al, alilanic sc'oplal ti coltael yu'une.

³ Ti slequil yutsilale xchi'uc ti c'usi ch'ayal ta xc'ot o'ntonal yu'une, alic ta scotol ti jteclumetique xchi'uc ti muc'tiquil lumetique.

⁴ Yu'un ti Diose, jelavem smuc'ul, sc'otebal o ti xi lequil c'optabile: spajebal o xi'bal sba ta scotol ti diosetique.

⁵ Ti diosetic yu'un ti yan jteclumetique, mu'yuc c'usi xu' yu'unic, ja'uc ti Diose laj smeltsan ti vinajele.

⁶ Xojobin no'ox ta j'ech'el ti yutsilal ta stojole. Oy smuc'ul stsatsal xchi'uc yutsilal ti ta xch'ulnae.

⁷ Ac'beic Dios ti c'usi sbel avo'ntonic talel ta jujuchop jnaclejoxuc ta jujun lum; ac'beic Dios ta yalbel ti smuc'ul xchi'uc ti yutsilale.

⁸ Ac'beic yich'obil ta muc' Dios ti c'u s'elan sc'otebal o ta xich' albele; ochanic batel ta yamaq'uil xch'ulna ti oyuc xa ta ac'obic ech'el ti matanaletique.

⁹ Ich'biluc ta muc' c'otuc ti Dios ti oy ta c'upil sba xch'ulnae. Xi'tabiluc xc'otuc yu'unic.

¹⁰ Xachi xavalbeic ya'i ti muc'tiquil lumetique: “Ajvalil ma' ti Dios une.” Ti stuque laj xchotan lec ti vinajel banomile, ti j'ech'el lec va'al com yu'une; co'ol ta sventain ti jteclumetique.

¹¹ Muyubajicuc ti vinajeletic xchi'uc ti banomil une. Vo'etuc no'ox ta muyubajel ti nabe, xchi'uc scotol ti c'usitic oy une.

¹² Muyubajicuc ti osile, xchi'uc scotol ti c'usitic oy yu'une. Muyubajicuc ta avanel ti te'etic oy ta vitse,

¹³ ti oy ta stojol ti Dios ta xvul ta loq'uele. Jech, ta x'och ta Ajvalilal yu'un ti banomile, melel oy stuq'uil ta sventain ti jteclumetic ta sbejel banomile.