Salmos 94 - Bible in Tzotzil de Chamula

Ti Diose, jchapanvanej ta sjunlej banomil

¹ Cajval, ac'o ta ilel un ti jpac-c'opot Diosote.

² Ti jchapanvanejot yu'un ti banomile, va'ano tec'ano aba ta scontrainel ti jtoyobbaetique, ti stojicuc avu'un ti c'usi laj xa spasique.

³ ¿Bu to c'alal ta xc'ot un, Cajval, bu to ta xc'ot ti stse'inic no'ox ti buch'u mu'yuc xch'ulel xa'i sbaique?

⁴ Pimunebic, toyobba xa'iic sbaic scotol ti jchopol joletique; cajal ma' ti ye sti' xa'i sbaique.

⁵ Le'e, ilbaj xut ti ateclumal une, Ch'ul Dios; ta xaq'uic ta lo'il maxil ti avu'untac une.

⁶ Ta smilic ma' ti me'unal antsetic une, ti jyanlumetique; ta xch'aybeic sc'oplal ti buch'u mu'yuc buch'u x'ayan yu'unique.

⁷ Ti yalojique, mu sna' ti Diose, mu xil ti Dios yu'un ti Jacobe.

⁸ Tuc'ulanic lec ava'iic un, pimil toyobba jnaclejetic. ¿Baq'uin to ta xava'ibeic ti smelol une?

⁹ ¿Mi mu xa'i avalojic ti Buch'u laj yac' ti chiquinale? ¿Mi mu xil avalojic ti Buch'u laj yac' ti satile?

¹⁰ ¿Mi mu stsitsvan avalojic ti Buch'u ta stojobtas ti muc'tiquil lume? ¿Mi mu sna' avalojic ti Buch'u ta xac'be sbijil ti jnaclejetic yo' xtojob snopele?

¹¹ Ti Ajvalile sna' lec ti naca sbolil o'ntonal jelavem yu'unique.

¹² Ch'ul Dios, mu'yuc c'usi sna' ti buch'u ta xatojobtase, ti buch'u ta xachanubtase

¹³ yo' oy smuc'ul yo'nton c'alal ta sta yorail ti oy c'usi chopol ta xc'ot ta pasele. Ti buch'u mu'yuc xch'ulel xa'i sbae, yacal xa ta xchapanbat ti smucobbaile.

¹⁴ Ti Ajvalil une mu sjip sten comel ti steclumale, mi ja'uc ta scomtsan stuc ti yu'untaque.

¹⁵ Ta xatojobtas ti yav ti tuq'uil chapanele; ta xlic spasic ec un scotol ti buch'utic oy slequil yo'ntonique.

¹⁶ ¿Mi oy la buch'u xana' ta stic' sba ta jpojel ta yoc ta sc'obic ti buch'u mu'yuc xch'ulel xa'i sbaique, ti jchopol joletique?

¹⁷ Ti manchucuc laj scoltaun ti Diose, libat xa bu sts'ijlajan ti muquinale.

¹⁸ Oy bu xichi laj cale: “Jaxbuj xa ti coc une”, ti syail xc'uxul avo'nton une, Cajval, laj scoltaun.

¹⁹ C'alal oyun ta vul o'ntone, ti xvoc'vun xa xc'uxul jol yu'un une, laj apatbun co'nton, ximuyubaj liquel avu'un.

²⁰ Ti vo'ot une ma'uc ta xaco'oltas aba xchi'uc ti jchapanvanejetic ti mu'yuc stuq'uil yo'ntonique, ti yabtelinojic ta scontrainel ti oy c'usi jbel tsots albil avu'une,

²¹ ta spaybel sc'oplal, ta yaq'uel ta milel ti buch'utic mu'yuc smulique, ti lec sc'oplalique.

²² Le' une, c'otem ta jnac'obbail ti Cajvale; ti Diose ta xispojun co'ol s'elan jbej ton ti bu ta jnac' jbae.

²³ Ti buch'u mu'yuc xch'ulel xa'i sbae, ta xc'ot ta pasel yu'un ti Cajvale, ti ta xtubbat sc'oplalic ta scoj ti mu stac' alel ti c'usi ta spasique. Ta xtubbat sc'oplalic yu'un ti Dios cu'untic une.