Salmos 92 - Bible in Tzotzil de Chamula

Q'uejimol ta yalbel ti yutsilale

¹ Dios, ti oyot ta toyole, jun yutsil ta j'ech'el ti colaval xa'utate, ti ta xich' q'uejintael q'uejimoletic sventa avich'el ta muq'ue.

² Ta sob ic'lumane, ta ac'ubaltique, jun yutsil ta xich' alel ti sc'oplal avutsile, ti syail xc'uxul avo'ntone,

³ ti jmoj xa xlamet xchi'uc ti c'usitic ta xich' tijel une, ti xlamet no'ox yutsil ta xich' tijel ti arpae, xchi'uc ti jchop o ta vobe.

⁴ Ch'ul Dios, laj jta smuyubajel co'nton avu'un ta sventa ti c'usitic ta xapase.

⁵ Ch'ul Dios, ech'em no'ox smuc'tiquil ma' ti avabtel une, j'ech'el mu na'bajuc ti c'u s'elan ta xanope.

⁶ Mu xa'ibeic xchiquinal jutebuc ma' ti buch'utic pimunebic une.

⁷ Yacal ta epajel un ti buch'u mu'yuc xch'ulel xa'i sbaique, ti jchopol joletique ta xch'i jech c'u cha'al ti momole, le' une, talic yo' ta xich' tubbel ti sc'oplalic ta j'ech'ele.

⁸ Ja'uc ti vo'ot une, Dios, sbatel osil oyot ta toyol cajal.

⁹ Xi laj aval jbel ac'op ti melel une, Cajval: ta xc'ot ta pasel ta xtub sc'oplal ti avajcontrae, ti tan puc ta xbat scotol ti jchopol joletique.

¹⁰ Ta xavepajesbun quip jech c'u cha'al yip jcot tot vacax; laj aq'uebbun muil poxil ta jol.

¹¹ Ta jq'uel c'u s'elan ta xyalic ta lum ti jcontrataque; ta xca'i ca'i c'u s'elan x'avlajetic yu'un svocolic ti buch'u mu'yuc xch'ulel xa'i sbaique.

¹² Ts'o'ol no'ox ta nich jech c'u cha'al junuc xan ma' ti buch'u lec yo'ntonique; ta xch'i jech c'u cha'al ti ch'ut te'etic ta Libanoe.

¹³ Va'anbil, tec'anbil ta xch'ulna ti Diose, ts'o'ol no'ox ta nich ta yamac' ti Dios cu'untique.

¹⁴ Yacal to ta satinel manchuc mi mol xa, lec to tsots, oy to yipal yu'un.

¹⁵ Ta scaj'alilanbe sc'oplal ti jchabivanej Dios cu'une, ti oy slequile, ma'uc ma' ti mu'yuc stuq'uile.