Salmos 91 - Bible in Tzotzil de Chamula

Ti Diose c'otem ta jnac'obbailtic

¹ Ti buch'u yac'oj sba ta chabiel ta yolon squeoval yaxinal ti Buch'u oy ta toyol cajale, ti scotol xu' yu'une,

² xi ta xalbe ti Diose: “Vo'ot ti jnac'obbailote, ti c'otemot ta natil luchlebale, Dios ti jpatoj co'nton ta atojol une.”

³ C'ajomal no'ox stuc xu' ta spojot yo' mu tsalbiluc ta xac'ot ta pets'etic ti buyuc no'ox nac'ajtique, xchi'uc ti chamel lajel q'uelel talele.

⁴ Ta smucot ta yolon xic' un; ta snac'ot ta yolon yoc sc'ob, mu'yuc c'usi xal avo'nton un. Co'ol s'elan c'otem ta amacobbail ti yutsil slequil yo'ntone.

⁵ Mu xaxi' yu'un ti jsibtasvanej sbel ac'ubale, mi ja'uc ti xjayluj ayolobal yu'unique,

⁶ mi ja'uc ti sbel ac'ubal me'chamele, mi ja'uc ti ma'uc to ta sjac' c'usi ora ta stsutsesvane.

⁷ Jmil (1,000) ta vo' chamemic ta xyalic ta lum ta stuq'uil ats'et c'ob; lajunmil (10,000) ta vo' chamemic ta xyalic ta lum ta stuq'uil abats'i c'ob, ti vo'ot une, mu'yuc c'usi xanuptan xayain.

⁸ C'ajomal no'ox ta xaq'uel ti xi s'elan ta xc'ot ta pasele: ti buch'u mu'yuc xch'ulel xa'i sbaique, ta xich'beic ti stojole.

⁹ Ti c'otem ta jpojvanej avu'un ti Diose, ti c'otem ta jchabivanej avu'un ti Buch'u oy ta toyol cajale,

¹⁰ mi jtosuc oy c'usi chopol ta xc'ot ta atojol un, mi ja'uc jset'uc chamel ta xc'ot ta ana un.

¹¹ Yu'un ta stac talel yaj'ánjeltac ta xchabielot ti buyuc no'ox ta xabate.

¹² Ta yoc ta sc'ob icbil japbilot yo' mu xabosi avoc yu'un jbejuc ton.

¹³ Xu' xa capet xaxanav xchi'uc ti jti'oval leonetique, xchi'uc ti c'usitic yan xi'bal sba jti'ovaletique, ti jti'oval quiletel chonetique.

¹⁴ “Ta jtic' jba ta spojel yo' mu xtae ta tsaquel yu'un mi junuc, yu'un mu tuch'bajun ta yo'nton, xchi'uc xiyojtiquinun.

¹⁵ C'alal ta xiyavtaune, ta jtac'be, ta jva'an jba ta stojol. Ta jpoj ta jcolta ti oy ta vocole, ta xcac' ta ich'el ta muc'.

¹⁶ Xi s'elan ta xcac'be sc'upin sjalil ti xch'iel sc'opojele: ta sta ti xmuyubaj ta sventa coltael cu'une.”