Salmos 9 - Bible in Tzotzil de Chamula

Q'uejimol sventa pojel c'uxubinel yu'un ti Diose

¹ Ch'ul Dios, loc' ayan ta co'nton ta j'ech'el ta jlequil-c'optaot une, ta sq'uejintael ti yepal no'ox ch'ayal ta xc'ot o'ntonal avu'une.

² Ti oyot ta cajal toyol une, yepal no'ox muyubajel ta xi'avan ta atojol; ta jq'uejinta q'uejimoletic ta aventa.

³ Jatvilic ta xloq'uic ta atojol ti jcontrataque, toj yalel ta lum ta aba ta asat ti toj chamel ta xc'ote.

⁴ Xi s'elan ti tuq'uil jchapanvanejote: lachoti ta apasob mantal ta xchapanelun.

⁵ Laj avulilan ta j'ech'el ti buch'u yan yajvalique, laj atsutses ta j'ech'el ti mu'yuc xch'ulel xa'i sbaique, laj atub o ta o'ntonal ti sc'oplalique.

⁶ Cham laj xa ti jcontrainvaneje, jmoj laj xchi'uc ti steclumale; laj alilin ta j'ech'el, sicotan com, mi ja'uc xvul ta o'ntonal ti sc'oplale.

⁷ Ajvalil o sbatel osil ti Dios une. Xi s'elan ma' ti j'ech'el choti ta jchapanvaneje:

⁸ ta slequil-chapan sbejel ti banomile, ta ye sti' stuc ta xal c'u s'elan ta xich' chapanel ti yajval lumetique.

⁹ Ti Diose ta stic' sba ta spojel ti buch'u mu x'ech' svocolic ta ilbajinele; ta sva'an sba ta pojvanej c'alal yorail ti svocolique.

¹⁰ Dios, ti buch'u ta xastaot ta na'ele, spatoj yo'ntonic ta atojol; ta j'ech'eluc mu xajip xaten comel ti ta sa' spojelic ta atojole.

¹¹ Q'uejintaic q'uejimoletic ta stojol ti Dios ti chotol ta spas mantal ta Sione; pucbeic sc'oplal ta stojol jteclumetic ti c'usitic laj spase.

¹² Ti Diose ta svules ta sjol ti buch'utic oyic ta vocole, mu xch'ay xa'i c'u s'elan xme'inal oq'uic yu'un ti vocole; ta stsits ti buch'utic yabtelinojic ti ilbajinvaneje.

¹³ Dios, c'uxubajan ta jtojol un, q'uelo avil c'u s'elan ta xiyilbun jvocol ti buch'u xti'et ti sjolic ta jtojole, tamun loq'uel ti nopol xa oyun ta sti'tac ti lajebal chamebale.

¹⁴ Ti jech une, ti ta ochebaletic yu'un ti Jerusalene, ta xcalbe ya'i scotol ti jteclume, ti ac'otebal o avich'uc lequil-c'optaele, xchi'uc ximuyubaj no'ox ec un, yu'un laj atic' aba ta spojelun.

¹⁵ Ti buch'u yan yajvalique ta syac sbaic ta spets' stuquic; yacal ta xcom yacanic ta syacobbail ti bu nac'al xa yu'unique.

¹⁶ Ti Diose xi s'elan laj yac' sba ta ojtiquinele: c'ot xa ta jchapanvanej. Ti buch'u mu'yuc xch'ulel xa'i sbae, chucul com ta spets' stuc ti smeltsanoje.

¹⁷ Ti buch'u mu'yuc xch'ulel xa'i sbaique, ti yan yajvalique, ti mu baluc xa'iic ti Diose, ta xc'otic ta tsutsel ta chamebal.

¹⁸ Mu'yuc ma' ti ch'aybil ta o'ntonal ti buch'u abol sbaique, ma'uc ma' ti j'ech'el xch'ay o ta be ti spatobil yo'nton smalaojique.

¹⁹ Va'lan tec'lan un, Dios, mu aq'ueloj no'ox ti toyobba xa'i sbaic ti viniquetique. Ti buch'u yan yajvalique, chapano ya'i ta ats'el un.

²⁰ Ya'iuc xi'el avu'un un, Dios, ac'bo sna' ti naca vinic no'ox ta banomile.