Salmos 89 - Bible in Tzotzil de Chamula

Strate ti Dios laj spas xchi'uc ti Davide

¹ Mu xlaj ta yalel aq'uejintael, Cajval, ti oy yutsil slequil avo'ntone, ta yalilanel ti jun avo'ntone.

² Sbatel osil ta jpuc ta yalel ti oy syail xc'uxul avo'ntone, xchi'uc ti yutsil slequil avo'nton ti mu'yuc ta xyanije, jech c'u cha'al ti vinajel mu xyanije.

³ Laj apas atrateic xchi'uc ti Davide, ti xachi laj avalbe sc'oplal ti avajtunel t'ujbil avu'une:

⁴ “Ta xc'ot ta pasel cu'un ti ta xcuch comel avabtel ta ajvalil ti anitilultaque.”

⁵ Ch'ul Dios, scotol ti c'usitic oy ta vinajele, ta slequil-c'optaic ti avutsil alequile, xchi'uc ti ch'ayal ta xc'ot o'ntonal avu'un ti c'usi ta xapase.

⁶ Ta vinajel une, ta j'ech'el mu junuc dios stac' co'oltasel jech c'u cha'al ti vo'ot une, Cajval.

⁷ Jelavem smuc'ul stsatsal un, Cajval, toj xi'bal aba, ti joyobtabilot yu'un ti c'usitic oy xiq'uique.

⁸ Scotol xu' avu'un, Cajval, Dios, oy ta atojol ti amuc'ul atsatsale; joyol ta atojolal ti melel xavale, mu'yuc yan jech c'u cha'al ti vo'ote.

⁹ Abainoj ta spajesel ti muc' ta nab c'alal capeme; ta xats'ijan ti xva'i xcoti no'ox ti syuc'benale.

¹⁰ Co'ol s'elan junuc anima laj apech' ta teq'uel ti j'ac'-xi'el chon ta nabe; ta smuc'ul stsatsal avoc ac'ob tan puc bat avu'un ti acontrae.

¹¹ Avu'un ti vinajel banomil une; ameltsanoj ti banomile xchi'uc scotol ti c'usi oy ta stojole.

¹² Laj ameltsan ti yolon yac'ol xocon sloq'ueb c'ac'ale, xchi'uc ti yac'ol yolon xocon sloq'ueb c'ac'al une; xmuyubajic no'ox ta q'uejimol ta aventa ti vits Tabore, xchi'uc ti Hermone.

¹³ Jelavem smuc'ul stsatsal ti avoc ac'obe; j'ech'el xu' yu'un ti abats'i c'obe, tsalvanem ta xc'ot ta j'ech'el.

¹⁴ Ta sventa ti atuq'uil alequilale, oyot ta ventainvanej; ti syail xc'uxul avo'nton une, ti melel xavale, ta xvinaj ta sventa ti c'usi ta xapase.

¹⁵ Ch'ul Dios, mu'yuc c'usi sna' ti jteclum ti xmuyubajic no'ox ti sna' slequil-c'optaote, ti ta xanavic ta squeoval axojobale.

¹⁶ Ta aventa xmuyubaj scotol c'ac'al ti jteclume; ta xbat yo'ntonic yu'un ti oy ti atuq'uile.

¹⁷ Ta melel un, c'otemot ta avutsil, xchi'uc jelavem xu' yu'unic ta sventa slequil yutsil avo'nton ti yantic xich' batel yip ti jelavem xu' cu'untique.

¹⁸ C'otem ta jmacobbailcutic ma' ti Dios une. Ti Ch'ul Dios yu'un ti Israele c'otem ta Ajvalil cu'untic un.

¹⁹ Le' talel ta vo'nee, xi s'elan laj avac'be yilic ti laj ac'oponan ti avajtuneltac ti buch'u oy slequil ti sjol yo'ntone: “Laj xa jt'uj jun vinic ta stojol ti jlumale, mu sna' xi', tsots yo'nton; laj xa cac'be ta toyol ti sc'oplale, xchi'uc laj xa jcolta.

²⁰ Laj jta ta sa'el ti cajtunel Davide. Laj xa cocanbe jtunel aceite ta sjol ti laj snup yabtel ta ajvalil cu'une.

²¹ J'ech'el mi ja'uc ta jaltabe ti scoltaele, ta xcac'be yip ta sventa jmuc'ul jtsatsal.

²² Mu stsaque ta c'op yu'un ma' ti scontratac une, mi ja'uc ta stsale yu'un ti buch'u mu'yuc xch'ulel xa'i sbaique.

²³ Ta jpech' ta teq'uel ma' ti scontrataque; ta jch'aybe ech'el ta sba ta sat un. Ta jlilin ya'iic ti buch'u xti'et sjolic ta stojole.

²⁴ Ta xcom ta stojol cu'un ti jlequil cutsile, ti syail xc'uxul co'ntone, yantic xich' batel yip ti jelavem xu' yu'une.

²⁵ J'ech'el ta xcac'be smuc'ul stsatsal ta yu'ninel ti muc' ta nab Mediterráneoe, ti ta xlic c'alal to uc'um Eufrates un.

²⁶ Xi ta xalbun une: ‘Vo'ot ti jtotote, vo'ot ti Diosot cu'une, ti ta xispojune, ti ta sva'an sba cu'une.’

²⁷ Ta xcac'be yich' un, jech c'u cha'al oy sc'oplal ti ba nich'onile; stuc no'ox cajal ta xc'ot sc'oplal ta stojol ti yan ajvaliletic ta banomile.

²⁸ Mu jalan ma' ti syail xc'uxul co'nton ta stojole; mu stselbuj ti caloj jtrate ta stojol une.

²⁹ Ti jech to oy ti vinajele, ti snitilultaque j'ech'el ta xcom o xquechet ta x'ech' chotluc ta ajvalil ta spasob mantale.

³⁰ “Le' une, mi ta sbaj ta sten ti c'u s'elan ta jchanubtasique, ti ma'uc ta spasic c'u s'elan ta xal ti jmantale,

³¹ ti mu xc'ot ta pasel yu'unic ti oy c'usi jbel tsots albil cu'une, ti mu xch'unic ti jmantaltaque,

³² ta scoj ti stoyobbailique, ti mu'yuc xch'ulel xa'i sbaique, ta jtsitsic ya'iic ta vach' un.

³³ Le' une, mu xquicta jba ta xc'uxubinel ti Davide. Mu sbauc no'ox que ti jun co'nton ta stojole.

³⁴ Mu jch'aybe sc'oplal ti jtratee, mu stselbuj cu'un ti jc'ope.

³⁵ Ta sventa ti oy jlequil cutsile, j'ech'el xi laj jva'an jba ta rextico ta stojol ti ma'uc ta jute:

³⁶ Ti jech to xojobin ti c'ac'ale, ti snitilultaque j'ech'el ta xcom xquechet ta x'ech' chotluc ta ajvalilal ta spasob mantal.

³⁷ J'ech'el ta sta yavalic jech c'u cha'al ti ue. J'ech'el ta xcomic o ti jech oy to ti vinajele.”

³⁸ Manchuc mi jech un, laj xa abaj laj aten ti ajvalil ti laj at'uj une, laj avilta un.

³⁹ Ch'ay sc'oplal avu'un ti atrate ta stojol ti avajtunele; laj ajipbe ta lum ti sronae.

⁴⁰ Laj achol-jombe scotol ti moquetic yu'une; stuc slilijemal busul laj avictabe ti jteclumetic yu'unique.

⁴¹ Scotol ti j'ech'el-beetique ta xelc'anic batel ti c'usi xal ti yo'ntonique; labanbilic yu'un ti slac'naique.

⁴² Laj apas no'ox jech ti stoy xa sc'obic avu'un ta muyubajel ti yajcontraic ti laj yil ti tsaleic xa une.

⁴³ Ch'ayolaj avu'un xchi'uc ti yespadae; asat xa no'ox xaq'uel ti xc'anobaj stsaquel ta letoe.

⁴⁴ Laj atubbe ti xtixet yutsilale; laj atubbe sc'oplal ti spasob mantale.

⁴⁵ Laj atuch'be ti xch'iel sc'opojelique; j'ech'el c'ot ta q'uexlal apun avu'un.

⁴⁶ Ch'ul Dios, ¿c'u no'ox sjalil ti anac'oj abae? ¿Mi staoj yav xtiltun sc'ac'al avo'nton jech c'u cha'al ta xtil ti c'oq'ue?

⁴⁷ Vuleso ta avo'nton un, Cajval, ti mu natuc ti jcuxleje, ti xi no'ox snatil xcuxlej ti vinic laj ameltsane.

⁴⁸ Mu'yuc buch'u ma' ti cuxul o mu xcham ta j'ech'ele. Mu'yuc buch'u ma' ti mu xil ti lajebale.

⁴⁹ Cajval, ¿bu bat ti syail xc'uxul avo'nton jech c'u cha'al ta sliquebe, ti laj ava'an aba ta yalbel David ti yutsil slequil avo'ntone?

⁵⁰ Cajval, vuleso ta ajol yepal no'ox ta xcontrainatic yu'un jnaclejetic ti avajtuneltaque, ti tiq'uil c'ot ta co'nton ti c'usitic chopol ta xalique.

⁵¹ Ch'ul Dios, jech ta scontrainuncutic ti avajcontrataque. Jech ta scontrainic ti buch'u t'ujbil avu'un ti buyuc no'ox ta xbate.

⁵² Lequil c'optabiluc sbatel osil ti Diose. Jechuc.