Salmos 88 - Bible in Tzotzil de Chamula

Cajval, ¿c'u cha'al bajbil tenbilun avu'un un?

¹ Cajval, Ch'ul Dios, ti jcoltavanejot cu'une, c'ac'al ac'ubal, ta jc'anbot ti jcoltael une.

² Tsacbun ich'bun ti jc'opojel jti'inele; chiquintabun ti xivocolet ta atojole.

³ Yepal no'ox ta j'ech'el lamal vul ta jtojolal ma' ti jvocol une, ti ti' ch'enalun yu'une.

⁴ Mu xa nomuc oyun ta stojol ti cham lajique, yu'un c'ot ta lajel ti yipal cu'une.

⁵ Jipbil xa licom jmoj xchi'uc ti jlajel jtubeletique, jech xa lic'ot jech c'u cha'al cham lajic ta ac'-letoe, ti laj xa yich'ic muquele; lic'ot jech c'u cha'al ti mu'yuc xa chabibil avu'une, ti ch'aybil xa ta o'ntonal avu'une.

⁶ Ta snatil xa ch'en laj ajipun yalel, ti spajeb snatil oy ti ic'al osile.

⁷ Lamal c'ot ta jba avu'un ti sc'ac'al avo'ntone, xich'ayluj yalel avu'un ti c'u s'elan ta xbalvan ta j'ech'el ti sc'ac'al avo'ntone.

⁸ Laj stenun comel avu'un ti buch'utic co'ol co'nton xchi'uque; mu xa ts'icbaj ta xa'i ti c'u j'elan ta xiyilique. Co'ol j'elan jech c'u cha'al jun jchuquel ti mu xcole.

⁹ Yepal xa li'oc' un, ta xa xmac ti jsate. Scotol c'ac'al xivocolet ta atojol, Cajval, jnuboj ti coc jc'ob une.

¹⁰ ¿Mi yu'un oy to c'usi ta xapas ta stojol ti animaetic ti ch'ayal ta xc'ot o'ntonal yu'unique? ¿Mi xu' to colaval xayutot ti buch'utic chamemic xae?

¹¹ Ti ta muquinale, ti ta lajebale, ¿mi oy to la buch'u ta xalbe sc'oplal ti melel xavale, ti syail xc'uxul avo'ntone?

¹² Scotol ta xch'ay ta o'ntonal ti ta ic'al osil yu'un ti lajebale. ¿Mi oy to van buch'u ta stunic ti atuq'uil avutsile, xchi'uc ti c'usi ch'ayal o'ntonal ta xc'ot avu'une?

¹³ Le' une, Cajval, xivocolet ta atojol un; ta sob no'ox, xic'opoj xa ta ac'oponel ta ati'inel.

¹⁴ ¿C'u cha'al ti jipbilun tenbilun avu'un une, Cajval? ¿C'u cha'al ta xanac' aba ta jtojol?

¹⁵ Ta jqueremal ono'ox ilbajinbilun, juteb xa mu laj cac' ti jol jbaquil yu'une; cuchem talel cu'un ti c'usitic vocol ta xvul ta jtojol avu'une, ti li' xa no'ox c'alal avi tana une.

¹⁶ Ti bu xa c'alal ti sc'ac'al avo'ntone, lamal vul ta jtojol, li'och ta be avu'un un.

¹⁷ Co'ol s'elan nojel ta vo', j'ech'el joyol ta jpat ta xocon un.

¹⁸ Laj xach'ac loq'uel ta jtojol ti buch'utic co'ol co'nton xchi'uque, xchi'uc ti jchi'iltaque, avi tana une, c'ot xa ta jchi'il un ti lajebal ti bu ic'uneb ti osile.