Salmos 86 - Bible in Tzotzil de Chamula

Atuc no'ox Diosot

¹ Cajval, va'lan, tec'lan, ts'etanbun ani' achiquin ta ya'yiel ti jc'op jti'inele, yu'un mu x'ech' xjelav ti at-o'ntone, toj me'un mu'natun ta xca'i.

² Nac'un, q'uejun, yu'un jun jol co'nton ta atojol. Ti vo'ot Diosote, Cajval, pojo ti avajtunel une ti spatoj yo'nton ta atojole.

³ Cajval, c'uxubajuc avo'nton ta jtojol, ti scotol ora xivocolet ta atojole.

⁴ Cajval, cuxetuc banomil ya'iuc liquel ti avajtunel li'e, yu'un xic'opoj xiti'in ta atojol un.

⁵ Ti vo'ot une, Cajval, oy yutsil slequil avo'nton, ta xach'ay ti mulil colo'ile; yepal no'ox syail xc'uxul avo'nton ta stojol ti buch'u xvocolet ta atojole.

⁶ Cajval, ts'etano ani' achiquin ti ta xajtaot ta c'oponele, a'yio ti xivocolet ta atojol une.

⁷ Ti oyun ta ilbajinele, xivocolet ta atojol, yu'un ta xatac'bun ti jc'ope.

⁸ Mu'yuc xa yan dios xco'olaj jech c'u cha'al ti vo'ote, Cajval. Mu'yuc xa yan xco'olaj yabtel jech c'u cha'al ti vo'ote.

⁹ Ch'ul Dios, vo'ot laj aliques scotol ti oy muc'tiquil lumetique, ta xtalic ta atojol ta yich'elot ta muc' un. ta yalel ti alequil avutsilal une.

¹⁰ Vo'ot no'ox ti Diosote, jelavem amuc'ul atsatsal, ti ch'ayal xc'ot o'ntonal yu'un ti c'usi ta xapase.

¹¹ Ch'ul Dios, chanubtasun ti bu atamoj batele yo' jech sjunul co'nton ta jtam ech'el ec. Ventainbun co'nton yo' jech cajal ac'oplal ta xc'ot yu'un.

¹² Cajval Dios, ta sjunul co'nton, ta jlequil-c'optaot, sbatel ora ta xcalbot avutsilal un.

¹³ Yepal no'ox ti syail xc'uxul avo'nton ta jtojole. Laj apojun yo' mu xipalch'uj ech'el ta muquinal.

¹⁴ Ch'ul Dios, xi to yepalic ma' ti mu'yuc xch'ulel xa'iique, ti capemic xa svoloj sbaic ta scontrainelun ta xismilic ya'iique.

¹⁵ Le' une, Cajval, Diosot ti mu xatuch'van ta o'ntonale, ti c'ux ta xa'a'yivane, oy sts'iquemal xcuchemal avu'un, melel ono'ox oy syail xc'uxul avo'nton.

¹⁶ Q'uelo avil c'u j'elan un, c'uxubajuc avo'nton ta jtojol. Pojo ti avajtunel li' une, ac'bo amuc'ul atsatsal.

¹⁷ Vinajesbun ti oy yutsil slequil avo'ntone; mi vinaj une, nijil ta xc'otic ta q'uexlal ti buch'u xti'et sjolic ta jtojole. Ti vo'ot une, Cajval, coltaun un, patbun co'nton.