Salmos 85 - Bible in Tzotzil de Chamula

Coltauncutic xtoc un

¹ Cajval, oy yutsil slequil avo'nton ta stojol ti ateclumal li'e; laj xcha'ta smuyubajel yo'nton avu'un ti Jacobe.

² Ti ateclumale, laj atubbe laj ach'aybe scotol ti xchopolalique, ti smul scolo'ique.

³ J'ech'el lamaj ti sc'ac'al avo'ntone, ti acapemale.

⁴ Dios ti jcoltavanejot cu'uncutique, la' pojuncutic, mu capemucot no'ox ta jtojolcutic.

⁵ ¿Mi ta j'ech'el ta xajalijes ti sc'ac'al avo'nton ta scontraineluncutique?

⁶ ¿Mi yu'un mu'yuc xa ta xquilcutic lequilal ch'iel c'opojel avu'un yo' xmuyubajic liquel ta atojol ti ateclumale?

⁷ Ch'ul Dios, vinajesbuncutic ti syail xc'uxul avo'ntone, coltauncutic un.

⁸ Ts'etel jchiquin ta xca'i c'u s'elan ta xlic yal ti Dios une; ta xalbe ya'i ti ch'abal xa svulelic ti steclumal ti jun yo'ntonique yo' jech mu xlic spas ti xchuvajilique.

⁹ Ti Diose melel nopol oy yo' ta stic' sba ta spojel ti buch'utic ta xi'taique, li' vulem ta jlumal cosilaltic ti yutsilal slequilal une.

¹⁰ Yu'un co'ol yabtelic ma' ti melele xchi'uc ti syail xc'uxulile; ti tuq'uilale, xchi'uc ti lamajem jol o'ntonale, co'ol yabtelic.

¹¹ Yu'un ti melele vul xa ta banomil, nitil xa xchi'uc ti tuq'uilal lic talel ta vinajele.

¹² Dios stuc ta xac' taluc vo' ta vinajel; ta satin lec yu'un ti c'usi ta xloc' ta cosil jbanomiltic une.

¹³ Ti tuq'uilale jba'be ech'el yu'un ta xchapanel ti bee.