Salmos 82 - Bible in Tzotzil de Chamula

Ti Diose, banquilal jchapanvanej

¹ Ti Diose chotol c'ot ec un xchi'uc ti j'abteletic ti yich'ojic tsots yabtelic ti oy ta toyol cajale, ti jamal xi ta x'albat ti smulique:

² “¿Bu to ora ta xavicta abaic ti mu'yuc stuq'uil ta chapanvaneje, ti ta xaco'oltas ajolic xchi'uc ti buch'u mu'yuc xch'ulel xa'i sbaique?

³ ¡Tic'o abaic ta spojel ti buch'utic mu sna' c'usi xut sbae, xchi'uc ti buch'u mu'yuc buch'u x'ayan yu'unique! Pojic ti buch'utic abol sbaique, xchi'uc ti buch'u mu'yuc c'usi x'ayan yu'unique.

⁴ Ti mu'natetic ilbaj x'utatic yu'un ti jchopol-joletique, tic'o aba ta spojel.

⁵ “Le' une, mi ja'uc xava'ibeic xchiquinal, mu xc'ot ta avo'ntonic, ic'ubem ti osil banomil ta xaxanavique. Xniquic no'ox ta j'ech'el yicobtac ti banomil une.

⁶ Acotolic dioseticoxuc ec xacutic ono'ox; acotolic xnich'naboxuc ti Buch'u oy ta toyole.

⁷ Manchuc mi jech un, ta xachamic acotolic jech c'u cha'al ta xchamic ti jnaclejetic ta banomile; ta xac'otic ta tsutsel jech c'u cha'al ti buch'u spajebal xa mu'yuc xch'ulel xa'i sbae.”

⁸ Ch'ul Dios, chapano xa aba ta xchapanel ti banomile, yu'un c'otemot ta yajval scotol ti muc'tiquil lum une.