Salmos 81 - Bible in Tzotzil de Chamula

Yutsil slequilal ti Diose, xchi'uc xchopolal ti Israele

¹ Muyubajanic ta sq'uejintael ti Diose, c'otem ta yipal cu'untic. Avananic ta muyubajel slequil c'optael Dios yu'un ti Jacobe.

² Jmojuc xa xyal anuq'uic ta q'uejimol ti xchijchun no'ox ti chij-chij taq'uine, ti jun yutsil xlomet xa sbic'tal nuc' ta stijic ti arpae, xchi'uc ti jchop o ta vobe.

³ Oq'uisanic oq'ues ta yorail ti ach' ue, ta syijil ti ue, jech yorail ta x'ech' ti muc' ta q'uin cu'untique.

⁴ Yu'un laj yal comel smantal Dios yu'un ti Jacob ta stojol ti Israele,

⁵ ti albat comel mantal ti Josee c'alal laj sva'an sba ta scontrainel Egipto ti Diose. Mu xvinaj buch'u ti oy xi c'opoj laj ca'ie:

⁶ “Laj xa jchepanbot ti avicats acuchoj une; laj xa ata ti xcuxet banomil ta xava'i ti tsots ta xa'abteje.

⁷ Laj ac'anbun vocol ti ilbajinbilote, laj jtic' jba ta apojel un; laj jtac'bot talel ta toc ti bu xc'avlajet ti chauc une; laj jq'uelbot avo'nton ta sts'el vo' ti sbiinoj Meribae.

⁸ Chiquintao ava'i, jteclumal, ti ta xajcaj-bijubtase; oc la ta alel un ti tauc xach'un une, Israel.

⁹ Mu xava'anan yan diosetic ta atojol un; mu xanijan xachiman abaic ta yich'el ta muc' yan diosetic ti mu ojtiquinbaje.

¹⁰ Vu'unun ti Avajvale, ti Dios avu'une, ti laj sloq'uesot talel ta sbanomil ti egipcioetique. Jamo ti ave ati'e, ta xacac'bot ti c'usi ta xtun avu'une.

¹¹ “Le' une, ti jteclumale mu sc'an xa'iic ti jc'ope. Mu sc'an xch'unic ti Israel une.

¹² Jech o xal un, jq'ueloj no'ox laj cac'be spasic c'usi xal ti yo'ntonique, cuxiic ta spasel ti c'usi lec ta xa'iique.

¹³ Ti lajuc xchiquinta jc'op ti jteclumale, ti j'ech'eluc st'unoj batel ti Israel ti bu jtamoj batele,

¹⁴ ta jviq'uel ta jmuts'el satil no'ox, laj cac' ta lo'il maxil ti scontraique, ta stsitsel ti jsa'-c'opetic jechuque.”

¹⁵ Ti buch'u xti'et sjolic ta stojol ti Diose, ch'abal xa ma' ti xch'ulelic ta xlomic ta lum une, staoj yav xcuchoj ti svocolique.

¹⁶ Ta jun lequil trigo, ta smalq'uinan steclumal ma' ti Dios unbi; ta staic ti ts'ajal xa yo'ntonic yu'un ti te'tical ajapome.