Salmos 79 - Bible in Tzotzil de Chamula

Mu x'ech' xjelav sme'inalil lilij ti Jerusalene

¹ Ch'ul Dios, laj xa yu'ninic avosil abanomil ti buch'utic yan yajvalique. Laj xa soquesbeic sc'oplal ti ach'ulnae; laj xa sjinesic ti Jerusalene.

² Chamem lajemic xa busul laj yictaic comel ta lum ti avajtuneltaque, ti buch'utic jun sjol yo'nton ech'ic ta atojole; c'otic ta sve'el ti jti'oval viletel mutetique, xchi'uc ti jti'oval chonetic xcotlajan ta banomile.

³ Co'ol s'elan vo' mal xch'ich'elic ta scotol ti Jerusalene; mu'yuc xa buch'u xu' ta xmuqueic un.

⁴ Lic'otcutic ta j'ac'-labal lo'il yu'un ti jlac'nacutique, ta j'ac'-tse'ej yu'unic ti c'u yepal joyol ta jpat ta jxoconcutique.

⁵ Ch'ul Dios, ¿mi staoj to yav ilinemot un? ¿Mi co'ol s'elan c'oc' staoj yav xtiltun ti sc'ac'al avo'nton une?

⁶ Lamanbo ta sba scapemal ajol ta stojol ajvaliletic yu'un ti muc'tiquil lumetic ti yan yajvalique, ti mu xayojtiquine, ti mu xvocoletuc ta atojole.

⁷ Le'e, laj xa stubbeic sc'oplal ti Jacobe, ti lilijem laj yictaic comel ti muc' ta lume.

⁸ Mu xavac' jtojcutic smul ti jtot jme'cutic laj ech'icuc ta vo'nee; ta jech yepal un, la' nupuncutic ta be ti mu tuch'bajuncutic ta avo'ntone, yu'un mu xa cha'beluc x'ech' ti jvocolcutique.

⁹ Ch'ul Dios, jcoltavanej cu'uncutic, coltauncutic un, pojuncutic un, ch'ayo ti jmul jcolo'cutic ta sventa ti avutsil alequilale.

¹⁰ Ma'ucuc xc'ot slo'il ya'yejic ti xi ta xalic ti buch'u yan yajvalique: “¿Bu la oy ti Dios yu'unic le' une?” Quiluc ta jba jsatcutic pacbo sutel ti cham lajic ta avajtuneltaque; yilicuc ec un ti buch'utic yan yajvalique.

¹¹ Chiquintabo sc'opic ti jchuqueletic ta sc'anbot chapanele; c'otuc ta pojel colel ta sventa amuc'ul atsatsal ti buch'u chapal xa sc'oplal ta xich'ic milele.

¹² Ch'ul Dios, pacbo sutel ya'i vuc-cojuc ti jlac'nacutic ti laj spasic laj sliquesbot sc'ac'al avo'ntone.

¹³ Ti vu'uncutic alumaluncutique, ti achijuncutic ti xilametcutic ta yaxaltic avu'une, j'ech'el colaval xacutcutic, sbatel osil, ta jq'uejintacutic lametel q'uejimol.